Հայաստանը Մալթայում ներկայացրած երգչուհի Լիլիթ Համբարյանը «Բացարձակ հաղթող»-ի կոչմանն է արժանացել (տեսանյութ և լուսանկարներ)

Մայիսի 27-29 Մալթայում «ARPEGGIO» երգի միջազգային մրցույթում Հայաստանը ներկայացրել է երգչուհի Լիլիթ Համբարյանը, ով գրավել է առաջին հորիզոնականն ու արժանացել՝ «Բացարձակ հաղթող»-ի կոչմանը: Operativ.am-ի թղթակցի հետ զրույցում երգչուհին պատմել է երաժշտական աշխարհում իր քայլերի մեկնարկի, երազանքի իրականացման և մրցույթի մանրամասների մասին:

-Լիլի՛թ, ինչպե՞ս է եղել Ձեր մուտքը երաժշտական աշխարհ:

-Ես ծնվել և մեծացել եմ Վանաձորում, այժմ՝ ապրում եմ Երևանում։ Մանկուց երգում եմ և զբաղվում երաժշտությամբ։ Երգարվեստում առաջին քայլերս սկսել եմ Վանաձորի երգի թատրոնից (գեղ․ ղեկավար Գագիկ Աղաբաբյան), որտեղ էլ բեմական մեծ փորձ եմ ձեռք բերել։ Ավարտել եմ Վանաձորի Հ․ Թումանյանի անվան մանկավարժական համալսարանի երաժշտության բաժինը, որից հետո անցել եմ աշխատանքի որպես վոկալ-գործիքային անսամբլի գեղ․ ղեկավար։ Տիրապետում եմ նաև ժող․ գործիքների՝ դուդուկ և շվի։ Մանկուց երգել եմ նաև առաքելական եկեղեցու երգչախմբերում։ Այժմ, երաժշտությունից բացի, զբաղվում եմ նաև դերասանի մասնագիտությամբ. սովորում եմ Աբել Աբելյանի «casting school»-ում: Ինձ սկսել եմ բացահայտել նաև այդ ասպարեզում իմ սիրելի ուսուցիչների աշխատանքի շնորհիվ: Կարող եմ ասել, որ լիարժեք ապրում եմ արվեստում՝ առանց որի ինձ չեմ պատկերացնում։

-Ե՞րբ և որտե՞ղ է տեղի ունեցել մրցույթը:
«ARPEGGIO International singing competition» միջազգային մրցույթն էր, որը տեղի ունեցավ Մալթայում՝ մայիսի 27-29-ը:

- Ինչպե՞ս իմացաք մրցույթի մասին:
-Մրցույթին մասնակցելու առաջարկը ստացել եմ «Կատարողական արվեստի համաշխարհային ասոցիացիա»-ի նախագահ Արման Ղուկասյանից:

- Քանի՞ երգ եք կատարել:
-Կատարել եմ 2 երգ: Բացման արարողության ժամանակ հանդես եմ եկել Սայաթ-Նովայի «Թամամ աշխարհ» երգով, իսկ մրցութային օրը և գալա համերգին՝ կատարել եմ Lara Fabian-ի «Je suis Malade» երգը:

-Քանի՞ երկիր էր մասնակցում մրցույթին:
-Մրցույթին մասնակցում էր 12 երկիր՝ յուրաքանչյուր երկիր մի քանի մասնակցով: Ընդհանուր թվով մոտ 60 ներկայացուցիչ կար: Հայաստանից միայն ես էի: Թուրքիան և Ադրբեջանը չէին մասնակցում, չնայած, շատ կցանկանայի, քանի որ հաղթանակս կկրկնապատկվեր:

-Ովքե՞ր էին ժյուրիի կազմում, խի՞ստ էին դատում:
-Ժյուրիի անդամները տարբեր երկրներից էին, շատ պրոֆեսիոնալ երաժիշտներ՝ պահանջկոտ և արդարացի գնահատման սկզբունքով: Արման Ղուկասյանը նույնպես ժյուրիի կազմում էր: Նրա ներկայությունը, բնականաբար, շատ օգնեց, քանի որ շատ կարևոր է այն, որ քո կողքին քեզ և քո ուժերին հավատող մարդ կա:

-Սպասու՞մ էիր հաղթանակի:
-Ինձ համար գլխավորն այն էր, որ շատ լավ ներկայացնեմ երկիրս և հպարտությամբ կարող եմ ասել, որ պատվով կատարեցի իմ առաջ դրված այդ մեծ պատասխանատվությունը, և, բնականաբար, շատ մեծ էր հաղթելուս ցանկությունը, բայց շատ անսպասելի էր միջազգային ժյուրիի կողմից նման բարձր գնահատականների արժանանալը:

-Ինպե՞ս եք ընտրում երգերը, որոնք մրցույթում եք կատարում:
-Երգիս ընտրության հարցում ինձ օգնել է իմ վոկալի դասախոսը՝ Նունե Ղազանչյանը, ումից անչափ շնորհակալ եմ, թե՛ իր տված գիտելիքների, թե՛ իր մեծ աշխատանքի համար: Երգն առաջին հերթին պետք է հոգեհարազատ լինի ինձ, որ ասելիք ունենամ, որ երգի միջոցով կարողանամ ցույց տալ հոգեվիճակս և ամենակարևորը՝ ձայնային և կատարողական հնարավորություններս:

-Ի՞նչը կփոխեք երգի հետ:
-Երգն ինձ համար ամեն ինչ է, դրանով եմ ապրում ու Աստծուն շատ շնորհակալ եմ այդ շնորհի համար:

-Ո՞րն է Ձեր հաջողության գաղտնիքը:
«Ամենակարևորը՝ հավատա քեզ, քո ուժերին և առաջ շարժվիր միմիայն լավատեսությամբ»: Ահա այս սկզբունքով էլ սկսել եմ առաջնորդվել:

-Ինչպե՞ս եք սկսում և ավարտում օրը:
-Ամբողջ օրս անցնում է պարապմունքներով, դասերով, փորձերով:

-Լիլիթ, ի՞նչ եք երազում:
-Երազանքներս շատ են, երազանքներիցս մեկը նաև միջազգային մրցույթում հաղթելն էր, որն արդեն հպարտությամբ կարող եմ ասել՝ իրականացավ:

Operativ.am-ը շնորհավորում է երգչուհուն և մաղթում նոր հաղթանակներ: