Երրորդ Հանրապետությունն Առաջին Հանրապետության օրգանական շարունակությունն է. Էդիկ Մինասյան (տեսանյութ)

Այսօր՝ մայիսի 28-ին, լրագրողների հետ հանդիպման ժամանակ պատմաբան Էդիկ Մինասյանը խոսեց Առաջին Հանրապետության, հաղթանակների, դիվանագիտական քայլերի և պատմությունից քաղած դասերի մասին:

Էդիկ Մինասյանի խոսքով՝ հինգ ու կես դար հետո պետականության վերականգման փաստը ամենամեծ ձեռքբերումներից էր: Նա հավելեց, որ կան դասեր, որոնք կարևոր նշանակություն ունեցան մայիսյան հաղթանակներից հետո:

«Առաջին հերթին, մենք պետք է հիշենք, որ դա գոյապայքարի կռիվ էր՝ մեր սեփական իրավունքները մեր իսկ հողի վրա պահպանելու համար, և այդ կռվում մենք հաղթանակով դուրս եկանք: 2-րդը՝ Հայրենական Մեծ պատերազմն էր՝ մեր ժողովրդի համաժողովրդական պայքարը, որտեղ աշխարհազորայինը և հոգևորականը միասին էին, գյուղացին, բանվորը, շինականը և մտավորականը՝ համատեղ, միասին հանդես եկան, առանց որևէ քաղաքական տարաձայնությունների՝ մի միասնական բռունցք դարձած, և դա ապահովեց մեր հաղթանակը: 3-րդ կարևոր դասը ես համարում եմ մեր կանոնավոր զորամիավորումների և աշխարհազորայինների միասնության դասը, որ հենց դրա շնորհիվ է, որ մենք կարողացանք հետագայում նույնպես հաղթանակ տանել Արցախյան պատերազմում: 4-րդ կարևոր հանգամանքը մեր ազատության և անկախության ձեռքբերումն էր՝ մեր դարավոր երազանքը»,- նշեց պատմաբան Էդիկ Մինասյանը

Պատմաբանի պնդմամբ՝ մեր անկախ պետականության պատմական նշանակությունը կայանում է նրանում, որ, եթե չլիներ մեր Առաջին Հանրապետությունը, որն այս մայիսյան հերոսամարտերի «ծնունդ» էր, չէր լինի ո՛չ Առաջին Հանրապետությունը, ոչ այս 3-րդ Հանրապետությունը:

«Առաջին Հանրապետությունը գոյատևեց ընդամենը 2,5 տարի, բայց ինչով այն նշանակություն ունեցավ. առաջին հերթին ստեղծեց կանոնավոր բանակ, 2-րդ կարևոր հանգամանքը՝ զինանշանը, օրհներգը և պետական դրոշը՝ որպես պետականության կարևորագույն խորհրդանիշ, 3-րդ պետականության բոլոր կառուցվածքները»,- ասաց Էդիկ Մինասյանը

Մանրամասները՝ տեսանյութում: