Հայուհին հաղթանակ է տարել ռուսական «SOLO» մրցույթում և իր հաղթանակը նվիրել զինվորներին

Ռուսական «SOLO» մրցույթին մասնակցած հայուհին՝ Մարիամ Աղախանյանը, վերադարձել է հաղթանակով:

Operativ.am-ի թղթակցի հետ զրույցում Մարիամը կիսվել է մրցույթին մասնակցելու և հաղթական տանելու մասին: Մարիամի խոսքով՝ առաջին անգամ «SOLO» մրցույթի մասին տեղեկացել է պատահական, սոցիալական կայքերի գովազդից, ընդ որում, երբ մրցույթի հայտերը ներկայացնելուն մնացել էր 3 օր: 2 օր մտածելուց հետո՝ 3-րդ օրը գնացել և հայտ է ներկայացրել՝ մրցույթին մասնակցելու համար:  

«Հայտը ներկայացնելուց անմիջապես հետո երգեցի ձայնագրման ստուդիայում: Ձայնագրում էին երգերը և մասնակիցների ձայնագրված երգերից ժյուրին լսում էր կատարումները, ընտրում, թե ովքեր կմասնակցեն մրցույթին: Մրցույթը բաղկացած է մի քանի փուլերից: Մի քանի շաբաթ անց, զանգահարեցին ինձ, հայտնեցին, որ անցել եմ առաջին նախընտրական փուլը, և հաջորդ շաբաթ տեղի կունենա առաջին փուլը: Նշված օրը ես ներկայացա նշված վայր՝ մասնակցելու նկարահանումներին»,-ասաց երգչուհին:

Մարիամի խոսքով՝ մրցույթին մասնակցող շատ հայեր կային, բայց նրանք ներկայացնում էին Ռուսաստանի տարբեր քաղաքները: Ըստ նրա՝ բավականին պարտավորեցնող էր մրցել հայրենակիցների հետ, ովքեր ներկայանում էին Ռուսաստանի տարբեր քաղաքները: Սակայն, նա կարողացել է հաղթահարել իր մրցակիցներին՝ կատարելով Արմեն Սմբատյանի «Հայաստան» երգը, սակայն, նաև գիտակցել է, որ ընտրել է բարդ երգ:

«Ճիշտ է, ես գիտեի, որ ընտրել եմ դժվար երգ և հաճախ երգելուց դժվարանում էի, բայց կա մեկ բան. հայրենիքիս կարոտն այնքան շատ էր, որ չմտածեցի ցածր միավորներ ստանալու մասին: Միակ նպատակս այն էր, որ այդ բեմում հնչեր հայերեն երգ, և որը նվիրված կլիներ իմ Հայաստանին: ժյուրին ինձ գնահատեց՝ 7-7-7-6-6: Բոլորը միաբերան պնդում էին, որ երգս սխալ է ընտրված, որ դեռ իմ համար չէ այդ էմոցիոնալ երգը: Ինձ ուժ տվեց միայն մեկ բան, երբ ժյուրիի անդամ Վլադիմիր Լիտչենկոն ասաց, որ 2-րդ քառատունը երգելուց նա հավատաց ինձ, հավատաց այն բնության տված մաքրությամբ, որով ապրում էի ես իմ հայրենիքով: 2-րդ փուլում՝ խմբային մրցակցության արդյունքում 7 օրվա պայքարից հետո ես դարձա իմ խմբում առաջատարը, որի համար շնորհակալ եմ բոլորին ովքեր ինձ օգնեցին և քվեարկեցին իմ օգտին: Առջևում դեռ կան երեք դժվարին, բայց անչափ հետաքրքիր փուլեր, նախապես ցանկանում եմ շնորհակալություն հայտնել բոլոր այն մարդկանց, ովքեր իմ կողքին կանգնած են և հավատում են ինձ: Բարձր պատիվ է ինձ համար, երբ գրվում է իմ անուն ազգանունը ու կողքը միանգամից նշվում է Հայաստան:»,-ասաց երգչուհին:

Երգչուհին իր այս հաղթանակը նվիրում է հայ զինվորներին: 

«Թող մեր երկրի սահմանները խաղաղ լինեն,  թող ամեն հայ զինվոր վերադառնա իր ընտանիք ու ապրի մեր հզոր երկրում: Ես իմ բոլոր ելույթները նվիրում եմ բոլոր զինվորներին և նրանց ընտանիքներին: Թող մեր հերոս մայրերն ապրեն խաղաղ ու երջանիկ, թող մեր անմահացած հերոսները ննջեն հանգիստ և խաղաղ: Ես խոնարհվում եմ հայ մայրերի առաջ և շնորհակալություն հայտնում, որ իրենց կյանքով կյանք են պարգևել: Փառք ու պատիվ մեր հերոս մայրերին»,-ասաց երգչուհին:

Operativ.am-ը շնորհավորում է երգչուհուն և մաղթում նոր հաղթանակներ: