Ինչպե՞ս է Հովհաննես Բաբախանյանն ԱՄՆ-ում տոնել ամուսնության քսանամյակը
Դերասան Հովհաննես Բաբախանյանն արդեն մի քանի տարի է, ինչ ապրում ու ստեղծագործում է հայրենիքից հեռու' ԱՄՆ-ում: Իհարկե հայրենիքից հեռու լինելը արտահայտվում է միայն կիլոմետրերով, որովհետև դերասան-երգիչ-արվեստագետը հոգով ու սրտով միշտ մեզ հետ է:
Վերջերս Հովհաննես Բաբախանյանը և նրա կին' Մերի Մսրյանը տոնեցին իրենց ամուսնության քսանամյակը, ինչի առթիվ ArmStar.am-ը շնորհավորեց արվեստագետ զույգին և փոքրիկ զրույց ունեցավ նրանց հետ:
Հովհաննես-Մերի զույգի համար արդեն ավանդույթ է դարձել հարասանեկան ծեսը: Նրանք վերջին անգամ' հինգ տարի առաջ, Հայաստանում տոնեցին իրենց ամուսնության տասնհինգ ամյակը, իսկ այս տարի, ապրիլի տասնյոթին ԱՄՆ-ում տոնեցին քսանամյակը' անհամբեր սպասելով քսանհինգին: Ընդ որում հարսանիքը յուրաքանչյուր անգամ տոնվում է հավուր պատշաճի' հարսանեկան զգեստով, եկեղեցում օրհնությամբ…: «Մեր երեք բալիկները' Լիան, Էլլան և Գոռը, արդեն նորմալ են նայում այն երևույթին, որ ամեն հինգ տարին մեկ նրանք ներկա են լինում իրենց ծնողների հարսանիքին: Եթե կա առիթ և հնարավորություն կյանքն ավելի ուրախ և էկզոտիկ դարձնելու, ինչու՞ չփորձել»,-նշեց արվեստագետը:
Հայրենիքից հեռու Բաբախանյանը կրկին զբաղվում է իր աշխատանքով' խաղում է ներկայացումներում, նկարահանվում և երգում է: «Եթե ժամանակս ներում է նաև նկարում եմ»,-նշեց զրուցակիցս: «Իհարկե Հայաստանում և ԱՄՆ-ում որոշ տարբերություն կա արվեստի միջև, բայց ընդհանուր առմամբ արվեստն անսահմանության մեջ է հզորանում ու տարածում ճանաչողության թևերը: Ես հպարտ եմ, որ Հայաստանն է իմ մայրը: Արվեստի լեզուն, որ սովորել եմ իմ հրաշք ուսուցիչներից, օգնում է ինձ ինքնաարտահայտվել նաև այս մշակութային աշխարհում»,-պարզաբանեց Բաբախանյանը:
Հովհաննեսն ArmStar.am-ի հետ զրույցի ընթացքում պատմեց նաև, որ այն երգերը, որ նա կատարում է ԱՄՆ-ում, մեծ պահանջարկ են վայելում: «Այստեղ բարձր է պահանջարկն այն երգերի, որոնք ես երգում եմ:Ինձ համար մեծ պատիվ էր ստանալ "Legendary Ray Charles " շքանշանը' անձամբ Ռեյ Չարլսի դուստր Ռենի Ռոբինսոնից' ինձ համար շատ պատասխանատու համերգներից մեկի ընթացքում: Նրան շատ հուզեցին իմ խոսքերն այն մասին, որ «Ռեյ Չարլսն ինձ համար հզոր է իր զգացողությամբ, նրա ձայնն իր մեջ կրում է աշխարհի տրագիզմն Ամերիկայի Happy And–ով ամփոփված»:
Ինչպես արդեն հայտնի է' Հովհաննես Բաբախանյանը նաև նկարում է, մասնավորապես նա սիրում է նկարել իր գեղեցկուհի կնոջը' Մերի Մսրյանին: «Մերիս… շատ եմ սիրում Մերիին նկարել…»,- սիրով լեցուն պատասխանեց երգիչ-դերասան-նկարիչը:
ArmStar.am-ը տեղեկություն ուներ նաև այն մասին, որ Հովհաննես Բաբախանյանը վերջերս այցելել է հայրենիք, ինչի մասին, սակայն, ոչ ոք չի բարձրաձայնել: «Այո', բայց դա անձնական այց էր: Շատ էինք կարոտել հարազատներին: Այ եթե հաջողվի' կգամ համերգային ծրագրով և մենաներկայացմամբ' ծննդյանս 45-ամյա հոբելյանի առթիվ»: Նշենք նաև, որ դերասանի 45-ամյակը կլրանա հուլիսի մեկին:
Բնականաբար ArmStar.am-ին հետաքրքրեց նաև, թե ըստ Բաբախանյանի ի՞նչ է պետք շոու բիզնեսի զարգացման համար: Ի՞նչ նախադրյալներ կարող է առանձնացնել փորձառու և երկու տարբեր մշակույթներում ստեղծագործած անձնավորությունը: «Շոու բիզնեսի զարգացման համար պետք է նախ տաղանդ, հետո աշխատասիրություն, լավ կազմակերպիչ, փող և, որ ամենակարևորն է, Աստծո հաջողությունը»,-ավելացրեց Հովհաննես Բաբախանյանը:
Աղբյուրը' ArmStar.am