Միջազգային մրցույթում հաղթանակ տարած արցախցի երգիչն իր հաղթանակը նվիրել է հայ զինվորներին (լուսանկարներ)

Ղարաբաղյան հակամարտության գոտում ապրիլի սկզբին մեկնարկած պատերազմական իրավիճակը պատճառ դարձավ, որ շատ ու շատ երաժշտական նախագծեր, ելույթներ՝ թե՛ Հայաստանում, թե՛ արտերկրում, չեղյալ հայտարարվեն, սակայն արցախցի Սար Սարգսյանը չհետևեց մյուսների օրինակին: Երգիչը ոչ միայն չչեղարկեց իր մասնակցությունն արտերկրում կայացած միջազգային մրցույթին, այլև, որոշեց հերթական անգամ միջազգային լսարանի առաջ ծածանել Արցախի դրոշը:

Ապրիլի 4-9-ը Վիլնյուսում կայացած «Music League Talent 2016» միջազգային վոկալ մրցույթում բարիտոն Սար Սարգսյանը ներկայացել է Հայաստանի և Արցախի դրոշի ներքո:

Մրցույթում տարբեր երկրներից 600 մասնակիցների հետ պայքարում Սար Սարգսյանը զբաղեցրել է պատվավոր առաջին հորիզոնականը: Այս մասին Operativ.am-ի թղթակցին հայտնեց երգչին մրցույթում ներկայացրած Կատարողական արվեստի համաշխարհային ասոցիացիայի նախագահ Արման Ղուկասյանը:

Operativ.am-ի թղթակցի հետ զրույցում երգիչն ասաց, որ այս մրցույթն իր համար առանձնացել է մյուս մրցույթներից: «Մրցույթին մասնակցելու հայտում բոլորովին այլ երգ էի ներկայացրել: Իտալերեն երգ էր իմ երգացանկից: Սակայն մրցույթի օրը կազմակերիպներին խնդրեցի թույլ տալ փոխել երգս՝ պատճառաբանելով այդ օրերին տիրող բոլորիս համար ցավալի իրավիճակը: Խնդրեցի կատարել Ռոբերտ Ամիրխանյանի և Լյուդվիգ Դուրյանի «Հեյ Արցախ» երգը, որին շատ դժվարությամբ, բայց համաձայնեցին կազմակերպիչները»,-ասաց երգիչը:

Կատարումից առաջ Սար սարգսյանը հայտարարել է, որ երգը նվիրում է բոլոր նրանց, ովքեր այս պատերազմական իրավիճակում Արցախի կողքին են: 

Մրցույթում նա զբաղեցրել է առաջին պատվավոր հորիզոնականը և հաղթանակը նվիրել հայ զինվորներին:

Operativ.am-ը շնորհավորում է երգչին, իսկ հայ զինվորին մաղթում բարի ծառայություն: