«ԻՊ»-ի ադրբեջանական ջոկատը լքում է Սիրիան՝ ԼՂ համակարտության գոտում կռվելու համար (տեսանյութ)

Ռազմական աղբուրի փոխանցմամբ՝ «Իսլամական պետության» ադրբեջանական ջոկատը՝ 50-ից 70 ահաբեկիչ, լքել է սիրիական Ռաքքա քաղաքը: Հաղորդվում է, որ ծայրահեղականները Թուրքիայի տարածքով վերադարձել են Ադրբեջան՝ Լեռնային Ղարաբաղի հակամարտության գոտում  ռազմական գործողություններին մասնակցելու համար: Այս մասին հայտնում է Lifenews.ru-ն:

Այս հանգամանքի պատճառով Սիրիայում «ահաբեկիչների ադմինիստրատիվ մայրաքաղաքում» այս պահին սկանդալ է, քանի որ «ԻՊ»-ի ահաբեկիչները  ցավասրտորեն են ընդունում կարգապահական խախտումները, մանավանդ սիրիական բանակի վերջին հաջողություններից հետո:

Հարկ է նշել, որ Ադրբեջանի ծայրահեղականներին նաև նախկինում են «ԻՊ»-ի կազմում դավաճանության մեջ մեղադրել: Այսպես, 2015թ-ի հունվարին ահաբեկիչները, կասկածելով լրտեսության մեջ, մահապատժի էին ենթարկել դաշտային հրամանատար Սիրաջ Ազերիին:

Ընդհանուր հաշվով Սիրիայի կոնֆլիկտի ընթացքում մահացել է Ադրբեջանի շուրջ 100 քաղաքացի: Այսպիսի վիճակագրություն են հրապարակել երկրի ԶԼՄ-ները: Իրականում այդ թիվը կարող է և ավելի մեծ լինել: