Հարկ եղած դեպքում, ես համապատասխան հակահարված կտամ. «WAPA» -ի նախագահը՝ իր դեմ ուղղված սպառնալիքների և հաջողության հասնելու գաղտնիքի մասին (լուսանկարներ)
Operativ.am-ը բազմիցս անդրադարձել է այն հաղթանակներին, որոնք հայ արտիստները գրանցել են միջազգային փառատոններում: Այս անգամ մեր թղթակիցը զրուցել է Կատարողական արվետսի համաշխարհային ասոցիացիայի նախագահ Արման Ղուկասյանի հետ, ով սպառիչ պատասխաններ է տվել մեր և ընթերցողների՝ մեկնաբանություններում տեղ գտած հարցերին:
-Արման, ե՞րբ է ստեղծվել ասոցիացիան և ինչպես ծնվեց այն ստեղծելու գաղափարը:
Կատարողական արվեստի համաշխարհային ասոցիացիան ստեղծվել է 2014 թվականի սեպտեմբերի 1-ին: Ստեղծվել է մշակույթային արժեքները բարձրացնելու նպատակով :
-Ինչպիսի՞ գործունեություն է ծավալում ասոցիացիան:
-Ասոցիացիան պրոդյուսերական աշխատանք է կատարում. երգիչ երգչուհիներին, պարողներին, երաժիշտներին ներկայացնում արտերկրում կազմակերպվող միջազգային մրցույթներում:
-Ասոցիացիան ներկայացուցիչներ ունի՞ արտերկրում, թե՞ միայն Հայաստանում է:
-Ներկայացուցիչներ ունենք 65 երկրում: Նրանք մոտ 3000-ի են հասնում:
Աշխարհում միակ ասոցիացիան է, որն անդամության համար ոչինչ չի վճարում:
-2 տարվա ընթացքում ի՞նչ հաղթանակներ է գրանցել ասոցիացիան:
-Հաղթանակները միայն ասոցիացիայինը չեն, դրանք նաև Հայաստանինն են, քանի որ արտիստներն արտերկրում ներկայացնում են հենց Հայաստանը: Միայն Հայաստանի կատարողներից ունենք 18 «1-ին մրցանակ» 12 «Գրան Պրի», 4 «2-րդ մրցանակ»:
-Իսկ նրանք, ովքեր ևս տաղանդավոր են և ցանկանում են Ձեր հաղթանակած ընտանիքի անդամը դառնալ, ինչպե՞ս դա կարող են անել:
-Մեր ընտանիքի անդամը դառնալու համար արտիստը պետք է ներկայացնի իր տվյալները, աշխատանքները, անցած ուղին: Այնուհետև, մասնագետների խորհուրդը որոշում է ընդգրկել խմբում, թե ոչ: Նաև ստուգատես քննություն ենք անցկացնում պարարվեստի ասպարեզում, որի ժամանակ ընտրվում են միջազգային կարգի մրցավարի որակավորում:
-Ինչպե՞ս են համագործակցում ներկայացուցիչները, ովքեր տարբեր երկրներում են գտնվում:
-Տարվա մեջ կոնգրեսներ են կազմակերպվում Ասիայում, Աֆրիկայում, Ավստրալիայում, Եվրոպայում, որտեղ տարբեր երկրների ներկայացուցիչները քննարկում են հետագա ծրագրերը: Կազմակերպվում են նաև միջազգային մրցույթներ, փառատոններ, մաստեր կլասեր: Անցկացվում են նաև Եվրոպայի, Ասիայի, Աֆրիկայի, Ավստրալիայի և աշխարհի գավաթի մրցույթներ:
-Արմա՛ն, կարճ ժամանակում բազմաթիվ հաջողություններ ունենալը մարդկանց մոտ կասկած է առաջացնում, որ մրցույթները գնված են: Ի՞նչ մեկնաբանություն կթողնեք այս առիթով: Ի վերջո՝ ո՞րն է Ձեր՝ մրցույթներից մշտապես հաղթանակով վերադառնալու գաղտնիքը:
Գումարի մասին խոսք լինել չի կարող: Պարզապես, մենք աշխատում ենք իսկապես ուժեղ ու տաղանդավոր մասնակիցների հետ: Իսկ նրանց գնահատականը տալիս է միջազգային ժյուրին:
-Հետադարձ հայացք գցելով միջազգային մրցույթում հաղթանակ տարած Ձեր մասնակիցներին, տեսնում ենք, որ նրանց անուններն այնքան էլ հայտնի չեն:
-Այո՛, դա ևս հուշում է այն մասին, որ մենք ընտրում ենք՝ կարևորելով արտիստի որակը և ոչ թե այն աշխատանքը, որ տարվում նրանց անուններն «անմահացնելու» համար:
Ամեն բան չէ, որ գումարով պետք է որոշել: Եթե մարդը տաղանդ ունի, ուրեմն պետք է օգնել նրան հասնելու իր երազանքին:
-Եղե՞լ են մարդիկ, ովքեր փորձել են հեռացնել Ձեզ այս ասպարեզից և ինչպե՞ս եք Դուք դրան վերաբերվում:
-Այո; եղել են և մինչև հիմա էլ փորձում են, բայց դա ինձ չի անհանգստացնում, քանի որ մեզ շարունակում ենք կատարել աշխատանք, որտեղ գումարներ չեն կորզում, և որտեղ գնահատում են մարդու ընդունակությունները: Իսկ հարկ եղած դեպքում՝ ես համապատասխան հակահարված կտամ, թող չկասկածեն:
-Առաջիկայում ի՞նչ ծրագրեր ունեք:
Մեզ մոտ ծրագրերն ամբողջ տարվա կտրվածքով են: Այժմ պատրաստվում ենք հերթական միջազգային մրցույթին, որի մասին առայժմ չեմ բարձրաձայնի: