Հուղարկավորել են հայտնի «կապիկ կնոջը»

Նկարչուհի Լաուրա Անդերսոնը հասել է նրան, որ հայտնի «կապիկ կնոջը»՝ Յուլիա Պաստրանային հուղարկավորեն Մեքսիկայում: Հուղարկավորությունը տեղի է ունեցել երեքշաբթի օրը: Ավելի քան 153 տարի նա վախեցնում էր մարդկանց իր սարսափելի արտաքինով՝ որպես թանգարանային նմուշ: Ամենահայտնի մեքսիկացիներից մեկի հուղարկավորումը հնարավոր է դարձել շնորհիվ Լաուրա Անդերսոն Բարբատայի, ով շուրջ 10 տարի դատական գործընթացի մեջ էր Նորվեգիայի իշխանությունների հետ՝ պահանջելով Յուլիայի աճյունը: Նրա կարծիքով պարզապես անխղճություն է մահացած մարդու դիակը թանգարանում ներկայացնել որպես ցուցանմուշ:

1834 թ. ծնված Պաստրանան հայտնի էր դարձել շնորհիվ ի ծնե ունեցած մուտացիայի: Նրա մարմինը, բացառությամբ ձեռքերի ափերի և ոտնաթաթերի, ծածկված էր խիտ մազաշերտով: Մուտացիայի ենթարկված ծնոտը սովորական մարդու ծնոտի համեմատ չափազանց մեծ էր: Կենդանության օրոք նրան անվանում էին «արջ կին» կամ էլ «կապիկ կին»: Մենեջեր Թեոդոր Լենտի հետ հանդիպելուց հետո Յուլիայի մասին իմացավ ամբողջ աշխարհը: 1857 թ. Թեոդորն ու Յուլիան ամուսնանում են, 1860 թ. ծնվում է նրանց որդին, ով ժառանգել էր մոր արատները. տղան միայն մեկ օր է ապրել: Որոշ տվյալների համաձայն՝ Յուլիան և երեխան մահացել են ծննդաբերության ժամանակ՝ Մոսկվայում: Յուլիայի և երեխայի մահից հետո բժիշկներն օգնել են Թեոդորին մումիֆիկացնել նրանց մարմինները, մումիֆիկացված մարմինների հետ վերջինս շարունակել է շրջագայությունները աշխարհում, քանի դեռ հանդիսատեսի հետաքրքրությունը չի կորել «աշխարհի ամենատգեղ կնոջ» նկատմամբ: