Էրդողանը Թուրքիան դարձրել է «սրիկա» պետություն. Independent

Թուրքիայի նախագահ Ռեջեփ Թայիփ Էրդողղանը Թուրքիան դարձրել է «սրիկա» պետություն (rogue state): Այս մասին գրում է «The Independent»-ը:

Ինչպես գրում է պարբերականը, Թուրքիայի նախագահը արդեն փորձել է իր կանոնները հաստատել ընտանիքի չափերի, երիտասարդության սեքսուալ կյանքի, ծխելու, ալկոհոլի օգտագործման, մշակույթի և ճարտարապետության հարցերում, սակայն նա վերջերս գերազանցեց ինքն իրեն:

Թուրքիայի սահմանադրական դատարանը հաստատել էր, որ թերթում հրապարակված նյութի համար երկու լրագրողներին կալանքի տակ պահելը նրանց ազատ խոսքի և ինքնարտահայտման իրավունքների խախատում է: «Cumhuriyet» օրաթերթի լրագրողները անցյալ տարվա մայիս ամսին հրապարակել էին թուրքական «MIT» հետախուզական կազմակերպությանը պատկանող բեռնատարների տեսանյութը, որտեղ երևում էր, որ բեռնատարները զենք են տանում սիրիական ապստամբներին: Էրդողանը այդ ժամանակ հայտարարել էր, որ լրագրողները թանկ կվճարեն դրա համար և նրանց դատի էր տվել:

Լրագրողներին բաց էին թողել, բայց նրանք, այնուամենայնիվ, դատարանի առաջ էին կանգնել լրտեսության և պետակա հեղաշրջման մեղադրանքով: Թուրքիայի նախագահն, իր հերթին, նշել էր, որ չի ենթարկվում սահմանադրական դատարանի որոշմանը և չի հարգում այն:

Միաժամանակ, մարդկանց ցանկը, ովքեր մեղադրվում են նախագահին վիրավորելու մեջ, աճում է: Նրանց թվում են նաև ֆուտբոլի աշխարհի նախկին չեմպիոն Հաքան Շուքյուրը, թերթի խմբագիրներ, ընդդիմության երկու առաջնորդներ, մեկնաբաններ, համալսարանի ուսանողներ և նույնիսկ 13-ամյա մի երիտասարդ: Մինչ օրս 1845 մարդ պատասխանատության է ենթարկվել նախագահին վիրավորելու համար:

Մեծ Բրիտանիայում Թուրքիայի նախկին դեսպան Ունալ Չևիկոզը կարծիք է հայտնել, որ միջազգային կոալիցիայի և ԱՄՆ-ի համար Թուրքիան շուտով կընդունվի որպես հոգս և նրա կարծիքը լուրջ չեն ընդունի:

Այս տեսակետը հաստատում է նաև այն փաստը, որ Թուրքիան Սաուդյան Արաբիայի և Քաթարի հետ միասին նյութատեխնիկական և ֆինանսական աջակցություն է տրամադրում «Իսլամական պետություն» և «Ջեբհատ ան-Նուսրա» ահաբեկչական խմբավորումներին: Ինչպես գրում է թերթը, Թուրքիայի վարչապետ Դավութօղլուն խոստովանել է, որ սիրիական ընդդիմությունը կարողանում է Ասադի դեմ իր դիրքերը պահել միայն Թուրքիայի և մյուս երկրների աջակցության շնորհիվ: