Ինչպիսին է «Ուրիշի հոգին» հեռուստասերիալի Իրինան իրական կյանքում (լուսանկարներ)

Այսօրվա իրականության մեջ, դերասաններին հանրությունն ավելի շատ ճանաչում է ֆիլմերից, քանի որ ինչ-ինչ պատճառներով մարդիկ սկսել են ավելի քիչ այցելել թատրոններ: Չնայած երիտասարդ տարիքին, դերասանուհի Մարգարիտա Հունանյանը հասցրել է բազմաթիվ կերպարներ մարմնավորել և՛ բեմերում, և՛ ֆիլմերում, սակայն հանրությունը նրան ավելի շատ ճանաչում է ֆիլմերից:Դերասանական  կարիերայի և անձնական կյանքի մասին որոշ գաղտնիքներ բացահայտելու նպատակով Operativ.am-ի թղթակիցը զրուցել է գույներից՝ կարմիրը, ծաղիկներից՝ վարդը և տարվա եղանակներից գարունը նախընտրող դերասանուհու հետ:

-Մարգարիտա, ի՞նչ մասնագիտություն ունեք, և ինչպե՞ս եք սկսել առաջին քայլերն այս ոլորտում:

-Մասնագիտությամբ դերասանուհի եմ: Սովորել եմ Թատրոնի և Կինոյի պետական ինստիտուտում՝ Ա. Խանդիկյանի արվեստանոցում: 14 տարեկանում հաճախել եմ «3 ույու 4» մանկական դերասանական ստուդիա, որտեղից էլ սկսվեցին իմ առաջին քայլերը:

-Մինչև հիմա խաղացած դերերից ո՞րն է Ձեզ համար ավելի հոգեհարազատ և ինչո՞ւ:

-Խաղացել եմ վեց գեղարվեստական ֆիլմում և երեք հեռուստասերիալում: Սովորելու ընթացքում խաղացել եմ Հրաչյա Ղափլանյանի անվան Դրամատիկական թատրոնում, ինչն էլ մեծ փորձ հանդիսացավ ինձ համար: Խաղացածս բոլոր կերպարների հանդեպ ունեմ յուրովի մոտեցում, սակայն կցանկանայի առանձնացնել Մարտին Մակդոնախի «Բարձ մարդը» ներկայացման Թուփալսկու կերպարը: Թեև վերջինս դաժան ոստիկան է, սակայն, այնուամենայնիվ, երեխաները նրա թույլ կողմն են, որոնց ապահովության համար նա պատրաստ է առանց երկմտելու սպանություն գործել:

-Ի՞նչ փուլում է Ձեր ներկայիս կյանքը: 

-Ներկա պահին նկարահանվում եմ «Շանթ» հեռուստաընկերության «Ուրիշի հոգին» հեռուստասերիալում, որտեղ մարմնավորում եմ Իրինային: «Stage-7» մանկական դերասանական ստուդիայում որպես ռեժիսորի օգնական եմ, ինչպես նաև վերաբեմադրում եմ «Մոխրոտ» մանկական հեքիաթ-ներկայացումը: Նոր հրավեր եմ ստացել խաղալու կոմերցիոն երկու ներկայացումներում՝ «Կարմիր գլխարկը» և «Մարդուկ-Ջարդուկը»:
Շուտով հանդիսատեսի դատին կհանձնենք նոր՝ «Stand-Up» հումորային ներկայացումը:
Հեռանկարում կա մոնոներկայացում, որի փակագծերն առայժմ չեմ ուզում բացել:

-Ֆիլմերո՞ւմ, թե՞ բեմում եք հաճույքով խաղում, և ինչո՞ւ:

-Չնայած տարբերությանը՝ ֆիլմերն էլ, բեմն էլ ինձ համար շատ հոգեհարազատ են: Բեմն ինձ համար առաջին տեղում է, որովհետև բեմում  հանդիսատեսին հաստատ չես կարող խաբել և դա ինձ դուր է գալիս: 

- Ըստ Ձեզ, ի՞նչ է պակասում  ներկայիս թատերական և կինոյի կյանքում:

 -Ամեն ինչ իր տեղում կլինի, եթե ամեն ոք զբաղվի իր մասնագիտությամբ:

-Ի՞նչը կարող է Ձեզ ստիպել թողնել դերասանական կյանքը, և արդյո՞ք եղել են դժվարություններ կայացման  Ձեր ճանապարհին:

-Մի շատ լավ արտահայտություն կա. «Երբեք մի՛ ասա երբեք», սակայն իմանալով բնավորությունս, պետք է, որ այնպիսի պատճառ չլինի, որ ինձ ստիպի հրաժարվել իմ ընտրած ուղուց: Դժվարություններ շատ են եղել: Արվեստի կյանքը շատ նման է աստիճանի, առաջին քայլն անում ես բարեհաջող, ու թվում է, թե ամեն ինչ շատ հեշտ է ու գեղեցիկ, բայց հայտնվում են շատ սուր դանակներ, ու եթե կարողանում ես կամքի ուժ գտնել և թևաթափ չլինել, ուրեմն՝ հաղթել ես: Կայացման համար դեռ շատ ճանապարհ ունեմ անցնելու:

-Ո՞րն է Ձեր հաջողության բանաձևը:

- Չեմ բավարարվում փոքրիկ հաջողություներով և միշտ ձգտում եմ, որ կերպարի մարմնավորումն ավելի հաջողված լինի: Բացի այդ, ես լուրջ եմ վերաբերվում իմ մասնագիտությանը, այլապես, ոչինչ չի ստացվի:

-Ի՞նչ կերպար երբեք չեք մարմնավորի:

-Չկա այնպիսի կերպար, որ չցանկանամ մարմնավորել: Ըստ իս՝ դերասանուհին պետք է պատրաստ լինի մարմնավորել ցանկացած կերպար, անգամ, եթե այն ընդհանրություն չունի իր անձի հետ:

-Զվարճալի կամ հետաքրքիր որևէ դեպք կպատմե՞ք դերասանական Ձեր կյանքից:

-Սխալ կլինի առանձնացնել որևէ դեպք. առհասարակ թե′ ֆիլմերում, թե′ թատրոնում ամեն պահն էլ լի է հումորով:

-Ինպե՞ս եք վերաբերում քննադատություններին:

-Առողջ քննադատության կողմնակից եմ: Ե′վ դրական, և′ բացասական կարծիքներն օգնում են՝ էլ ավելի կատարելագործվել մասնագիտությանս մեջ:

-Ունե՞ք երազանք: 

-Երազանք, որպես այդպիսին, չունեմ: Ունեմ հստակ նպատակներ, որոնցով առաջնորդվում եմ:

-Մարգարիտա Հունանյանի սիրտն ազա՞տ է:
-Այո, իմ սիրտն ազատ է:

-Ինչպիսի՞ն պետք է լինի տղամարդը, ով կգերի Ձեզ:
-Նա պետք է լինի կայացած, անկախ, ունենա իր սեփական ԵՍ-ը, ընդունի ինձ այնպիսին, ինչպիսին որ կամ:

Դերասանուհին մինչև այժմ մարմանավորել է. Հ.Պարոնյանի «Կատակերգություն» (Աղջիկ), Մոլիերի «Դոն Ժուան» (Թագուհի), Պ.Զեյթունցյանի «Հիսուս Նազովրեցին և նրա երկրորդ աշակերտը» (Կին), Մ.Մակդոնախի «Բարձ մարդը» (Տուպալսկի) և այլ ներկայացումներում: Նկարահանվել է «Կիսալուսնի ծովածոցը» (2014թ.), «Ոսկե աչք» (2014թ.), «Փոքրիկ զորավարը» (2015թ.), «Շրջադարձ» (2015թ.), «Չներվածները» (2015թ.), «Թափանցիկ տանիքներ» (2015թ.) ֆիլմերում, «Խաղից դուրս» (2013թ.), «Սիրո գերին» (2015թ.), «Ուրիշի հոգին» (2015թ.) հեռուստասերիալներում: