Հայ հայտնիներից ով է հետևում աղի բլիթ ուտելու սովորույթին

Ամենայն Հայոց Գարեգին Բ հայրապետի տնօրինությամբ Ս. Սարգիս զորավարի տոնը հռչակվել է Երիտասարդների օրհնության օր: Տոնը շարժական է և այս տարի նշվում է հունվարի 23-ին: Ս. Սարգիս Զորավարի տոնը Հայաստանում ընդունված է նշել ոչ միայն եկեղեցական ծեսով, աղոթքով, այլև ժողովրդական սովորույթներով: 

Ժողովրդական սովորություններից է Ս. Սարգսի տոնին նախորդող գիշերը երիտասարդների՝ աղի բլիթ ուտելը, որի հետ նրանք կապում են իրենց փեսացուի կամ հարսնացուի երազահայտնությունը: Այդ օրը հիշատակելի սովորություններից է փոխինդով մատուցարանը դնել տան տանիքին կամ պատշգամբին և սպասել Ս. Սարգիս զորավարի ձիու պայտի հետքին: Ըստ ավանդույթի` Ս. Սարգիսը պետք է հրեշտակների ուղեկցությամբ անցնի և ում մատուցարանի մեջ դրված ալյուրի կամ փոխինդի մեջ թողնի իր սպիտակ (մաքրություն, անաղարտություն է խորհրդանշում) ձիու պայտի հետքը, այդ տարի կիրականանա երիտասարդի երազանքը:

Պարզելու համար, թե հայտնիներից ով է հետևում աղի բլիթ ուտելու սովորույթին Operativ.am-ի թղթակիցը զրուցել է նրանց հետ:

Սոնա Շահգելդյան- Աղի բլիթին կիսով չափ հավատում եմ: 2 տարի առաջ եմ կերել: Անկեղծ ասած ամուսնուս եմ տեսել երազում, բայց շատ աղոտ: Շատ եմ սիրում հայկական այս տոնը: Դռան շեմին միշտ փոխինդ եմ դրել: Լավ եմ հասկանում այս տոնի նշանակությունը:

Արայիկ Համբարձումյան- Աղի բլիթին չեմ հավատում: Ես հավատում եմ իմ Աստծուն: Մեկ անգամ չհավատալով և հետաքրքրությունից դրդված կերել եմ: Ես գեղեցկության մրցույթի ժյուրի էի, և ծանոթացա մի աղջկա հետ ում անունը Սյուզի էր: Քանի որ ես նաև երազներին չեմ հավատում, կարծում եմ՝ երազս այդպես էլ չի իրականանա:

Գաբի Գալոյան-Թեև անհավատ մարդ եմ, բայց տարօրինակ կերպով աղի բլիթին հավատում եմ: Մեկ անգամ կերել եմ, ու երազիս տեսել, թե ինչպես եմ ինքս ինձ ջուր տալիս: Երևի ինքնահավան մարդ եմ (ժպտում է):

Ավո Ադամյան- Հավատում եմ աղի բլիթին: Կերել եմ բայց չեմ հիշում տեսել եմ, թե ոչ: Փոխարենը, կինս ասում է, որ ինձ է տեսել՝ դաշնամուր նվագելիս:

Լայանա- Ես հավատում եմ մարդու ճակատագրին, որն աղի բլիթի հետ կապ չունի:

Նարեկ Մակարյան-Աղի բլիթին չեմ հավատում, մանավանդ, որ տհաճ է ուտելը, բայց տոնի խորհուրդը շատ եմ սիրում: Երբևէ ցանկություն չեմ ունեցել ուտելու: Կարծում եմ, երբ ժամանակը գա, կիմանամ, թե ով է իմ ընտրյալը:

Մարիաննա-Այո, հավատում եմ աղի բլիթին: Անցյալ տարի կերել եմ, բայց երազս չեմ հիշել, այս տարի ևս կերա: Ինչ-որ մեկն ինձ բաժակով ջուր էր տալիս, բայց դեմքը պարզ չեմ տեսել, ու միանգամից արթնացել եմ:

Արփի-Ինչ-որ չափով հավատում եմ, քանի որ կան մարդիկ, որ իրական պատմություններ ունեն աղաբլիթի հետ կապված: Ուսանող ժամանակ մի անգամ կերել եմ, բայց չեմ դիմացել և ջուր եմ խմել:

Խաչիկ Եղոյան-Ես Աստծուն եմ հավատում, բայց նաև հավատում եմ սրբերի հրաշագործություններին, քանի որ նրանք, միևնույն է, ամեն ինչ իրագործում են Աստծո գիտությամբ: Իհարկե, տոնը գեղեցիկ է, ինչպես նաև հաճելի է եկեղեցական արարողությանը մասնակցելը:

Նանա- Աղի բլիթին հավատում եմ, բայց ինքս երբևէ չեմ կերել: Զբաղվածությանս պատճառով միշտ մոռացել եմ: Ընկերուհիներս պատմել են, որ կերել, տեսել ու ամուսնացել են: Բոլորին շնորհավորում եմ այս գեղեցիկ տոնի կապակցությամբ և մաղթում անսահման սեր: Ովքեր դեռ չեն գտել իրենց կեսերին, թող այսօր գտնեն, իսկ ովքեր արդեն գտել են, թող Աստծո օրհնանքն անպակաս լինի: Սիրեք և սիրվեք, չէ որ սերն Աստված է:

Զառա Արամյան-Աղաբլիթին այնքան էլ չեմ հավատում, չնայած՝ արդեն հաճելի ավանդույթ է դարձել երիտասարդների համար: Երիտասարդ ժամանակ, երբ կերել եմ, ինձ վրա չի ազդել, քանի որ ես ամեն ինչ աղի եմ ուտում:

Տիգրան Ներսիսյան- Աղի բլիթը մեծ խորհուրդ ունի իր մեջ: Պատահել է, որ տոնի օրը կերել եմ: Կարծում եմ՝ երազներն այդպես ուղիղ պետք չի ընկալել, դրանք ընդամենը հուշումներ են:

Operativ.am-ը սիրահարների տոնի առթիվ շնորհավորում է բոլորին: