Ա՜խ,ինչ կին է՜
Ինչքան Էլ կանայք փորձեն պնդել, որ իրենց խնամում ու զուգվում զարդարվում են իրենց համար, միևնույն Է, հոգու խորքում յուրաքանչյուրս ուզում ենք ուրիշներին դուր գալ։ Ընդ որում, ոմանց համար կարևոր Է առհասարակ իր վրա ուշադրություն հրավիրելը, իսկ շատերն Էլ ցանկանում են որսալ շատ որոշակի տղամարդու հիացած հայացքը։
Եվ ինչպես հաճախ Է պատահում, սեփական կարծիքն այն մասին, թե ինչպես լավ տեսք ունենալ, չի համընկնում այն տեսակետի հետ, թե կանանց արտաքինում և հագուկապում իրականում ինչն Է նվաճում տղամարդկանց հետաքրքրությունն ու հիացմունքը, և ինչը միանգամայն հակառակ արդյունք տալիս։ Բազմաթիվ հարցումներ, թեստեր, դիտարկումներ հնարավորություն են տվել հոգեբաններին, վիճակագիրնեին, իմիջ մեյքերներին բավական ծանրակշիռ եզրակացություններ անելու, որոնց արժե որ կանայքս ականջալուր լինենք, որպեսզի տղամարդկանց աչքում գրավիչ լինենք։ Գուցե այդ դեպքում մենք և՛ նվազ չափով ուժեր վատնենք, և՛ փող միաժամանակ շատ ավելի հետաքրքիր տեսք ունենալով։
Օրինակ՜ մոդայիկ հագուստի և թանկարժեք ապրանքանիշների մրցավազքը բացառապես սեփական ինքնասիրությունը բավարարելու համար Է կամ ուրիշների առջև պարծենալու՝ պատմելով, թե ինչ թանկ արժի ձեր զգեստապահարանի այս կամ այն հագուստը։ Մինչդեռ տղամարդիկ նայում են ոչ թե արտադրող ֆիրմայի պիտակին, այլ տվյալ հագուստը հագած կնոջ տեսքին։
Ահա ստացվում Է, որ մոդայիկ ու թանկարժեք, բայց ձեր կազմվածքին չնստող կամ գույների համադրությամբ չսազող հագուստը ձեզ նվազ հետաքրքիր Է դարձնում այն աղջկա համեմատությամբ, որը հագել Է կարել տված կամ տոնավաճառից գնած զգեստ, բայց ընտրված սեփական դեմքի, կազմվածքի ու ոճի բոլոր առանձնահատկությունները հաշվի առնելով։
Ինչ վերաբերում Է հագուստի ընտրության ընդհանուր ուղղությանը, ապա արժե նկատի ունենալ, որ տղամարդկանց դուր են գալիս փափուկ ու շրշուն գործվածքները, որոնք բորբոքում են տղամարդկանց երևակայությունը և կարծես թաքցնում կամ ակնարկում կանանց հմայքների մասին։ Իսկ գերկարճ, կիպ գրկող և բաց զգեստներն առանձնապես հետաքրքրություն չեն առաջացնում, ինչ Էլ որ ասեն կանայք, այս դեպքում ամեն ինչ ակնհայտ ու աչքիդ առաջ Է։
Նորաձևությանը հետևող կանայք, որոնք տարվա բոլոր եղանակներին ոտքից չեն հանում բարձր ու բարակ կրունկներով կոշիկները, կարող են վերջապես հոգնել դրանցից, որոնց պատճառով օրվա վերջին ուղղակի ոտքերդ չես զգում, և փոխարինել ավելի հարմար կոշիկներով։ Այո, տղամարդկանց դուր են գալիս բարակ կրունկներով կոշիկները, բայց այս դեպքում բնավ չի գործում ինչքան բարձր, այնքան լավ կանոնը։ Ընդհակառակը՝ չափից ավելի բարձր կրունկը կարող Է կամ բարձրացնել կնոջն անհասանելի բարձունքի՝ հասակի անհամապատասխանության առումով, կամ ստիպի անհանգստանալ, թե չլինի հանկարծ վայր ընկնի այդ բարձունքից՝ բազմաթիվ վնասվածքներ պատճառելով իրեն։
Ի դեպ, հետաքրքիր դիտարկում, պարզվում է, որ շատ տղամարդկանց դուր են գալիս բոկոտիկները , երբ բաց են կրունկի և թաթի մի հատվածը։ Մինչդեռ կանանց այնքան սիրած ու նրբակիրթ նավականման կոշիկները , չգիտես ինչու, նրանց անտարբեր են թողնում։
Կասկած չկա, որ տղամարդկանց դուր են գալիս երկար մազերը, մանավանդ եթե դրանք ոչ թե վերածվել են լաքապատ աշտարակի, որին սարսափելի է նայել, այլ գեղարվեստական անկանոնությամբ թափվում են ուսերին ու մեջքին։ Ուստի մի ձգտեք զարմացնել տղամարդկանց անհավանական բարդ սանրվածքով՝ ծածկված լաքի այնպիսի շերտով, որ դիպչելիս կարող ես քերծել ձեռքդ։
Թող ձեր մազերը միշտ խնամված ու բնական լինեն։ Հատկապես՝ բնական, եթե անգամ ներկում եք։ Մազերի ներկի հարցում դժվար է դեղատոմս առաջարկել, ոմանց դուր են գալիս շիկահերները, ուրիշները գերադասում են սևահերներին, շատերն էլ խենթանում են կարմրահերների համար։ Բայց մի բան շատ հստակ է. ոչ մի տղամարդու դուր չեն գալիս կապույտ, վարդագույն, կանաչ կամ մանուշակագույն մազերով կանայք։
Հարկ է չափավոր ու ողջամիտ լինել ոչ միայն մազերի, այլև դեմքի ներկերի գույնի ընտրության հարցում, այսինքն՝ շպարվելու։ Ուզո՛ւմ եք, որ ձեր դիմահարդարումը տպավորություն թողնի։ Արեք այնպես, որ ձեր տղամարդը գլխի չընկնի, որ շպարված եք։ Հիշեք կերած շրթներկի վիճակագրության մասին և կհասկանաք, թե ինչու են տղամարդիկ գերադասում միանգամայն այլ համ, քան ունի անգամ ամենաթանկ կոսմետիկան։ Առհասարակ թարթչաներկի, սնգույրի, դիմափոշու մեծ քանակությունը, ինչպես ցույց են տվել հարցումները, տղամարդկանց մեջ մտավախություն են առաջացնում, թե կարող են լղոզել ներկերը կամ դրանք կարող են քսվել սեփական հագուստին, իսկ շրթներկի հաստ շերտը դրա համը փորձելու ցանկություն չի թողնում։
Ինչ վերաբերում է զարդերին, ապա այս դեպքում նույնպես գերադասելի է չափավորությունը։ Այսպես, տղամարդկանց դուր են գալիս բարակ շղթաները՝ կախազարդով, որ հասնում է կրծքի բաժանարար ճեղքին, և դաստակներին բարակ շղթայական ապարանջանները։ Զարդերը պետք է նուրբ լինեն, մեծ չափերը հոգնեցնում են տղամարդկանց աչքերը։ Եվ համաձայն հարցման արդյունքների՝ գրեթե բոլոր տղամարդիկ բացասական են վերաբերվում փիրսինգին կանանց մարմնի ցանկացած հատվածի վրա։
Ահա և գծագրվեց կնոջ արտաքինի ընդհանուր պատկերը, որը կարող է իրեն գամել տղամարդու հետաքրքրված հայացքը։
Սակայն այդ հետաքրքրության շարունակականության հարցում մեծ դեր են խաղում ձեր վարվեցողությունը, ձեր շարժուձևը։ Ինքնաբավ, կտրուկ, եռանդ և ուժ ճառագող, գործնական ու քննադատաբար տրամադրված կանայք, որպես կանոն, տղամարդկանց մեջ ծանոթությունը երկարացնելու և տևական հարաբերություններ սկսելու ցանկություն չեն առաջացնում։ Նման կանայք ավելի շուտ վախեցնում են նրանց և անինքնավստահություն ներշնչում։
Իսկ ահա այն կինը, որ կարողանում է լսել, բաց ու բարեհոգի է, միշտ պատրաստ է ժպտալ, ոչ թե համառորեն ցուցադրել իրեն բոլոր կողմերից, ուրախ ու անհոգ է, ամենայն հավանականությամբ դուր կգա։ Տղամարդիկ ուղղակի տենչում են, որ իրենց լսեն, փորձեն հասկանալ, անկեղծ հետաքրքրություն ցուցաբերեն իրենց գործերի ու հոգսերի նկատմամբ։
Բացի այդ, եթե արդեն նվաճել եք ձեզ դուր եկած տղամարդու ուշադրությունը, մի շտապեք առաջին իսկ երեկոյան նրա գլխին թափել ձեր խնդիրներն ու փորձել պարզել նրա ողջ կենսագրությունը, իմացեք, որ ամենայն հավանականությամբ երկրորդ ժամադրությունը չի լինի։ Ավելի շատ լսեք և զննեք. դա նրա մասին հնարավորինս շատ բան իմանալու անվրեպ տարբերակ է։