Ադրբեջանում բոլոր այլախոհներին համարում են թաքնված «հայկական լոբբիի» գործակալներ

Դավադրությունների տեսության պատճառով մարդիկ դառնում են հնազանդ, իսկ կառավարողները դադարում են վախենալ որևէ բանից։ Ադրբեջանում բոլոր այլախոհներին համարում են թաքնված «հայկական լոբբիի» գործակալներ։ Ադրբեջանում տիրող հակահայկական տրամադրություններին է անդրադարձել Inosmi.ru-ն։

Կայքը գրում է, որ հնարամիտ առաջնորդները լավ են ծանոթ դավադրության տեսությանը։ Այդ տեսությունը օգնում է նրանց կոնսոլիդացնել քաղաքական իշխանությունը, ձևավորել արտաքին թշնամու կերպար, նվազեցնել երկրի խնդիրների համար սեփական պատասխանատվության չափը։ Իսկ հետխորհրդային Ադրբեջանում դավադրության տեսությունը օգնում է գործող նախագահ Իլհամ Ալիևին պահպանել սեփական պաշտոնը։

Ըստ դավադրության տեսության, Ադրբեջանը ունի երկու հիմնական թշնամի՝ հայկական լոբբին և նախանձ Արևմուտքը։ Եվ քանի որ հաճախ են Ադրբեջանում պնդում, որ առաջինի ու երկրորդի միջև ֆինանսական կապ կա, ապա երկու թշնամիները դառնում են մեկը՝ վերածվելով ամեն տեղ ազդող և ամենազոր «հայկական լոբբիի»։

Հայաստանը միշտ չէ, որ Ադրբեջանում ծառայել է որպես քաղաքական գործիք։ 1997-2007 թ-ին, քանի դեռ չէր մահացել Հեյդար Ալիևը, ադրբեջանցիներն ու հայերը փոխայցելություններ էին ունենում երկու երկրներ։ Սակայն Հեյդար Ալիևի մահվանից հետո Հայաստան այցելած մարդկանց սկսեցին անվանել դավաճաններ, ընդ որում՝ պետական մակարդակով։

Այսօր նույնիսկ առանց Հայաստան այցելելու մարդիկ Ադրբեջանում ստանում են դավաճանի պիտակ, եթե նույնիսկ նախկինում կապ են ունեցել որևէ հայի հետ։ Ադրբեջանցի լրագրող Շահին Ռզաևին, ով նախկինում ևս այցելել էր Հայաստան և համագործակցում է Թուրքիայում հայկական «Ակոս» թերթի հետ, շուտով սկսեցին դավաճան անվանել և սպառնալիքներ տեղալ նրա հասցեին։

Իլհամ Ալիևի կառավարման տարիներին «հայի» պիտակը դարձավ տարածված քաղաքական գործիք։ Իսկ դավադրության տեսության մեջ ամրապնդվեց հայկական լոբբիի ամենազորությունը, որն արտահայտվում էր հենց այն ժամանակ, երբ Ադրբեջանում ինչ-որ խնդիր չէին կարողանում լուծել։

Այսպես, օրինակ Ադրբեջանի խորհրդարանի պատգամավոր Գալիբ Սալահզադեն Ադրբեջանում մարդու իրավուքնների պաշտպանության վատացումը ներկայացնող մի շարք զեկույցներից հետո արեց հետևյալ հայտարարությունը.«Աշխարհում կան որոշ կազակերպություններ, որոնք կեղտ են լցնում մեր նման զարգացող երկրների վրա։ Այդպիսիք են  Reporters Without Borders-ը, Human Rights Watch-ը, Freedom House-ը և այլն։ Նրանք հրապարակում են Ադրբեջանի մասին կեղծ զեկույցներ, որոնք պատրաստված են հայկական լոբբիի պատվերով»։ 

Ադրբեջանցիները հասել են նրան, որ ԱՄՆ-ի պետքարտուղար Ջոն Քերրիին են հայ անվանել։ Մեկ այլ պատգամավոր Ռովշան Ռզաևը հայտարարել է.«Հայտնի է, որ Քերրին ուժեղ կապեր ունի հայկական լոբբիի հետ։ Բայց լավ կլիներ, որ Քերրին վերագնահատեր Ադրբեջանի հետ գործընկերային հարաբերությունները։ Պետական շահերը վեր են անձնական առաջնահերություններից»։