Ավո Ադամյանը` տաս տարվա երգին կյանք տալու և իր՝ ռեստորանային երգիչ լինելու մասին (տեսանյութ)
Երգիչ Ավո Ադամյանը, չնայած այն հանգամանքին, որ երաժշտական պրոֆեսիոնալ ուղի է անցել, այսօր մարդկանց մի մասին հայտնի է որպես ռեստորանային երգիչ: Նրա վերջին՝ «Դաժան է սերը» երգը, շատերը կհիշեն այլ երգիչների կատարմամբ, սակայն Ավո Ադամյանը երգին նոր շունչ ու կյանք տալով՝ կարծես այն դարձրել է ֆիլմի սաունդթրեք:
Երգի հետ կապված առեղծվածների, ռեստորանում իր երգելու և հաջողության իր բանաձևի մասին Operativ.am-ի թղթակիցը զրուցել է երգչի հետ:
-Ինչպե՞ս է ստեղծվել «Դաժան է սերը» երգը, ովքե՞ր են հեղինակները:
-Չգիտեմ, թե հեղինակն այն ինչպես է ստեղծել, սակայն 1996 թվականին, երբ ես պատրաստվում էի ընդունելության քննություններին, հայրս ինձ համար սինթեզատոր գնեց, և ես սկսեցի մշակել այս երգի և՛ երաժշտությունը, և՛ խոսքերը: 2008 թվականին երգը կրկին ներսումս կրակ վառեց, սակայն նորից ոչինչ չձեռնարկեցի: 2015թ.-ին երգեցի այս երգը: Կարծիքներ շատ եղան. մի մասը կողմ չէր, որ այդ երգին կյանք տամ, բայց ընկերներիցս մեկը՝ երաժիշտ Հովհաննես Գալոյանը, ոգևորեց ինձ և որոշեցինք, որ հաստատ այս երգը երգելու եմ: Իհարկե, երգը վերջնական տեսքի է բերել իմ լավ ընկեր, տաղանդավոր երաժիշտ, Արսեն Բարսամյանը: Երգն առեղծվածային է այնքանով, որ հեղինակների մասին ոչ ոք չի կարողանում հստակ որևէ բան ասել: Թեև այս երգի վրա ես շատ եմ աշխատել, բայց չեմ կարող ինձ հեղինակ համարել: Շնորհակալ կլինեմ, եթե երգի հեղինակն իսկապես հայտնի դառնա բոլորիս, իսկ մինչ այդ, երգը կլինի իմ և իմ այն ընկերներինը, ովքեր մասնակից դարձան երգի կայացման գործում: Շնորհակալ եմ բոլոր նրանց, ովքեր աշխատեցին ինձ հետ, ոգևորեցին ու մենք այսօր ստացանք այսպիսի աշխատանք:
-Ինչպե՞ս որոշեցիք աշխատել Հրաչ Քեշիշյանի հետ:
-Նախորդ տեսահոլովակներիս նկարահանման ժամանակ աշխատել եմ ռեժիսոր Վահե Հարությունյանի հետ, ով այս անգամ Հայաստանում չէր և խորհուրդ տվեց դիմել Հրաչ Քեշիշյանին: Սիրով համաձայնեցի, քանի որ ինքս էլ նկատի էի ունեցել նրան:
-Ի՞նչ խորհուրդ ունի այս երգը և ինչո՞վ է այն առանձնանում Ձեզ համար:
-Երգը շատ մեծ սիրո մասին է, որն անգամ կարող է ատելության հասցնել: Առանձնահատուկ է այնքանով, որ արդեն 10 տարի է ինձ հետ է, ինձ ընկեր է դարձել, իսկ հիմա կարող եմ մեր ընկերության մասին նաև պատմել բոլորին: Նշեմ, որ տեսահոլովակում առկա տեսարանները կապ չունեն իմ անձնական կյանքի հետ:
-Ավո, թեև հանդիսատեսին արդեն ներկայացել եք մի քանի երգով ու տեսահոլովակով, սակայն մարդիկ Ձեզ ավելի շատ հիշում են որպես ռեստորանային երգիչ: Ի՞նչ կասեք ռեստորանում Ձեր երգելու վերաբերյալ և արդո՞ք պատրաստվում եք թողնել այն և ներկայանալ պրոֆեսիոնալ բեմերում:
-Ռեստորանում երգելն ինձ համար հերթական դպրոցն է, որտեղ ես շատ բան սովորում եմ, կոփվում: Ամենակարևորն այն է, որ ռեստորանում ամեն անգամ կենդանի ես կատարում: Ես «պլյուս» դժվարանում եմ երգել, թեև պետք է ասեմ, որ եղել են դեպքեր, երբ ստիպված եմ եղել այդպես երգել: Բոլորին հայտնի է, որ ռեստորանում երգիչներն ավելի շատ են վաստակում, և ես էլ բացառություն չեմ: Ես վաստակում եմ ռեստորանում և այն ներդնում այն աշխատանքի մեջ, որն իմ հոգուց է գալիս, և որին ես ցանկանում եմ շարունակական կյանք տալ:
-Ի՞նչ քննադատություններ եք լսել Ձեր հասցեին:
-Հստակ չեմ հիշում, սակայն եղել են, և ես նորմալ եմ վերաբերվում քննադատություններին: Եթե անգամ մեկը դժգոհ է մնացել իմ աշխատանքից, նշանակում է՝ ինչ-որ տեղ թերացել եմ, իսկ թերություները պետք է շտկել:
-Ո՞րն է հաջողության հասնելու Ձեր բանաձևը:
-Անկեղծությունն ու աստվածապաշտությունը:
-«Եվրատեսիլ»-ին մասնակցելու մասին մտածե՞լ եք:
-Ոչ, մինչև հիմա մտքովս չի անցել: Կարելի է մասնակցել, եթե կատարեմ Կոմիտասի «Հորովել»-ը:
-Ի՞նչ կարող է պատճառ դառնալ, որ թողնեք երգելը:
Չեմ ուզում մտածել այդ մասին: Անելիքներ դեռ շատ ունեմ:
Operativ.am-ը շնորհավորում է երգչին և մաղթում բուռն ստեղծագործական կյանք: