2016 թվականը երգիչ Սար Սարգսյանի համար սկսվեց հաղթանակով (լուսանկարներ)

Հունվարի 3-5-ն Իսպանիայի Լլորետ դե Մար ծովափնյա քաղաքում տեղի է ունեցել «Gran Fiesta» միջազգային արվեստի մրցույթը, որտեղ Հայաստանի և Արցախի դրոշի ներքո ներկայացել է Սար Սարգսյանը, ով ապրում է և՛ Հայաստանում, և՛ Արցախում:

Այս մասին Operativ.am-ի թղթակցին հայտնել է Կատարողական արվեստի համաշխարհային ասոցիացիայի ղեկավար Արման Ղուկասյանը:

Մրցույթին մասնակցել է մոտ 100 ներկայացուցիչ՝ Հայաստանից, Ղազախստանից, Բելառուսից, Ուկրաինայից, Ռուսաստանից, Ադրբեջանից, Իսպանիայից և այլ երկրներից:

Միջազգային մրցույթին, տարբեր տարիքային խմբերում, մասնակել են երգիչներ և գործիքային կատարողներ: Այն կայացել է 2 նոմինացիայում. «Folk vocal» և «Pop Vocal»:

«Folk vocal» նոմինացիայում Սարիբեկ Սարգսյանն արժանացել է 1-ին մրցանակի, իսկ «Pop Vocal»-ում հավաքելով ամենաբարձր բալերը՝ արժանացել է «Գրան Պրի»-ի:

«2015 թվականը ստեղծագործական առումով բուռն էր ինձ համար. 2 Գրան Պրի, 4 ոսկե մեդալ: Իսկ 2016-ը սկսվեց հաղթանակով»,-ասաց երգիչը:

Սարիբեկ Սարգսյանը չնայած դրսում ունեցած իր մշտական հաջողություններին, չի պատրաստվում բնակություն հաստատել արտերկրում:

«Իմ տունն իմ Արցախ-Հայաստանն է: Ես իմ գործունեությունը կշարունակեմ աշխարհի տարբեր երկրներում՝ ներկայացնելով իմ հայրենիքը, որպեսզի դրսում ևս իմանան, որ արցախցին, հայը նաև իր երգով է հաղթական»,-նշեց Սարիբեկը:

Հիշեցնեն, որ Սարիբեկ Սարգսյանը օգոստոսի 24-29-ը Խորվաթիայի Ռովինջ ծովափնյա քաղաքում տեղի ունեցած «CHORUS INSIDE CROATIA 2015» երաժշտական մրցույթից վերադարձել էր «Գրան Պրի»-ով:

Operativ.am-ը  շնորհավորում է երգչին և մաղթում  նոր հաղթանակներ: