Այս տարի Ձմեռ պապիկից կին եմ խնդրել. Խաչիկ Եղոյան

Նախորդ տարին շատերի համար անձնական, շատերի համար էլ գործնական նպատակներին հասնելու տարի եղավ: Ռեժիսոր, պրոդյուսեր Խաչիկ Եղոյանը 2015թվականին ձեռնամուխ եղավ Ցեղասպանության 100-րդ տարելիցին նվիրված «100 դուռ» նախագծի իրագործմանը, որի ամփոփումով էլ 2015 թվականը նշանավորվեց նրա համար:

Operativ.am-ի թղթակիցը 2015թվականի ձեռքբերումների, 2016թ-ի ակնկալիքների, Ձմեռ պապի նվերի մասին զրուցել է Խաչիկ Եղոյանի հետ:

-Խաչի՛կ, չնայած այս տարի Ձեր ծրագրերի իրականացումը կարելի է համարել Ձեր գլխավոր ձեռքբերումը, այնուամենայնիվ, կցանկանայինք իմանալ, թե որն եք Դուք 2015թ.-ի Ձեր ձեռքբերումը համարում:

Ծրագրերիս իրականացումից բացի 2015 թվականին ձեռք բերեցի նոր ընկերներ: Ձեռքբերում եմ համարում նաև հենց 2015 թվականը, որը կարողացա ապրել, իսկ դրա համար՝ փա՛ռք Աստծուն:

-Ի՞նչ ակնկալիքներ ունեք 2016թ-ից: Հնարավո՞ր է 2016-ը նշանավորեք մեկ այլ կարևոր  նախագծով:

Նախագծեր միշտ կարող են լինել, սակայն, ամեն տարվա ավարտին, ես նայում եմ երկնքին ու Աստծուն խնդրում, որ մյուս տարի՝ այս օրերին, բոլորս՝ հեռու, թե մոտ, բայց լինենք:

Խաչիկ, կա՞ այնպիսի նվեր, որը միշտ ցանկացել եք ստանալ Ձմեռ պապիկից:

Այո, ամեն տարի նվեր խնդրել եմ: Դե առանց նվերի ո՞նց կլինի: Բայց այս տարի սրտանց Ձմեռ պապիկից կին եմ ուզել: Չգիտեմ իր ձյունանուշներից մեկը կլինի, թե ոչ, բայց այս տարի թող լինի: 

-Ի՞նչ կմաղթեք հայությանը:

Ցանկանում եմ, որ այս տարի ամեն մարդ իր ներսում ապրող հային գնահատի: Երբ դա լինի, ապա կլինի նաև փոխադարձ հանդուրժողականություն, սեր: Մարդ պետք է հավատա ու հասկանա, որ փրկության դուռն Աստված է: Ամեն հաջողությունների համար շնորհակալ լինի Աստծուն: Այդ ժամանակ, մենք կդառնանք հզոր ազգ և կկառուցենք հզոր պետություն:

Operativ.am-ը շնորհավորում է ռեժիսորի Ամանորը և մաղթում հաջողություններ: