Ուկրաինայում արգելել են ցուցադրել ամանորյա հայտնի «Ճակատագրի հեգնանք» ֆիլմը
Էլդար Ռյազանովի լեգենդար ֆիլմը իրական ճակատագրի հեգնանքի է արժանացել։ Երբ խոսվում է քաղաքականության մասին, շատերը հասկանում են, որ պաշտոնյաները կարող են ընդունել անսպասելի որոշումներ։ Բայց ով կարող էր մտածել, որ Ռուսաստանի և Ուկրաինայի քաղաքական պատերազմում գործը կհասնի դասական ֆիլմերին։ Ուկրաինայի իշխանությունները կարող են թույլ չտալ «Ճակատագրի հեգնանք կամ բաղնիքդ անուշ» ֆիլմի ցուցադրությունը երկրի հեռուստաալիքներով։
Ուկրաինայի՝ կինոյի հարցերով պետական գործակալությունը իր պատրաստակամությունն է հայտնել քննարկել խորհրդային այս ֆիլմի ցուցադրության արգելքը։
Ուկրաինայի մշակույթի նախարար Վյաչեսլավ Կիրիլենկոն խնդրել է քաղաքացիներին դրամատիկ չդարձնել իրադրությունը՝ հավաստիացնելով, որ խորհրդային անցյալի մասին նոստալգիան շուտով կանցնի։
Ֆիլմի ցուցադրությունն արգելվել է, քանի որ դրա դերասանուհիներից մեկը՝ Վալենտինա Տալիզինան, մտել է Ուկրաինայի անվտանգությանը սպառնացող անձանց ցուցակի մեջ, քանի որ նա ստորագրել է Ղրիմի հարցում Պուտինին աջակցելու նամակը։ Այդ ցանկում են հայտնվել նաև Օլեգ Տաբակովը, Դմիտրի Խառատյանը և Նատալյա Վարլեյը։