Շուշան Երիցյանն իր ձեռքբերումների, ամանորյա ամենասիրելի նվերի և սպասելիքների մասին
2015 թվականը բեղմնավոր տարի էր նաև մոդել, դերասանուհի Շուշան Երիցյանի համար: Իր ձեռքբերումների, առաջիկա ծրագրերի և մանկության հուշերի մասին դերասանուհին կիսվեց Operativ.am-ի հետ:
Որո՞նք են 2015 թվականի Ձեր ձեռքբերումները:
- Ձեռքբերումներ շատ են եղել: 2015 թվականը, ինչպես նաև նախորդ տարիները, մեկը մյուսին գերազանցեցին: Ձեռքբերումներից կառանձնացնեմ մի քանիսը: Նախ, ես սկսեցի նկարահանվել իմ երկրորդ հեռուստասերիալում՝ «Բախտաբեր»-ում: Նաև հանդես եկա որպես հաղորդավարուհի: Այժմ, ամեն օր, ուղիղ եթերով հաղորդում եմ վարում: Ընդունվեցի Գաբրիել Սունդուկյանի անվան ազգային ակադեմիական թատրոնին կից Դրամատիկական ստուդիա, և արդեն ներգրավված եմ ներկայացման մեջ: Ամենայն հավանականությամբ, 2016 թվականին փոքրիկ դերով հանդես կգամ «Պեպո»-ում: Կառանձնացնեմ նաև ֆինանսական ձեռքբերումներս: Նշեմ, որ 2016 թվականի մարտին կբացվի իմ անձնական բրենդային խանութը:
Շուշան, Ամանորի հետ կապված ի՞նչ վառ հուշեր ունեք և ո՞րն է եղել ամենատպավորիչ նվերը, որ ստացել եք Ամանորին:
Հիշում եմ, որ երբ դեռ փոքր էի, բոլոր թոռներով հավաքվում էինք տատիկիս ու պապիկիս մեծ տանը՝ Ղարաբաղում, ու Նոր Տարին այնտեղ էինք անցկացնում: Այդպես շատ հետաքրքիր էր անցնում Ամանորը: Ինձ մոտ տպավորվել են մանկության տարիներիս բոլոր Ամանորները, երբ ողջ բարեկամությունը հավաքվում էր մի տանը ու միասին նշում տոները: Իսկ որպես ամենատպավորիչ նվեր, ասեմ, որ առհասարակ, ինձ համար ամենաթանկը միշտ իմ ծնողների նվերներն են եղել: Թեկուզ ամենափոքրիկ անակնկալն ինձ միշտ ամենաշատն է ուրախացնում:
Իսկ հիմա՝ արդեն այս տարիքում, ինչպե՞ս եք սիրում նշել Նոր Տարին:
Առաջին հերթին Ամանորը նշում եմ ընտանիքիս հետ: Եթե այս տարի ես հանդիսավարուհու կերպարով հանդես չգամ, կնշեմ ընտանիքիս հետ, իսկ հետո կմիանամ ընկերներիս ու միասին կնշենք:
Շուշան, ինչպես տեսանք, 2015-ը Ձեզ համար բավականին բեղմնավոր տարի էր, իսկ ի՞նչ սպասելիքներ ունեք 2016 թվականից:
- Սպասելիքներս շատ-շատ են: Նախ, ուզում եմ կայանալ որպես թատրոնի դերասանուհի: Այս տարի կունենամ նաև իմ երկրորդ հաղորդումը, որը նորաձևության մասին կլինի: Ցանկանում եմ ապագայում կայանալ նաև որպես բիզնես լեդի:
- Ի՞նչ կմաղթեք հայությանը:
- Հայ ժողովրդին մաղթում եմ առաջին հերթին խաղաղություն: Թող որ մեր զինվորներն անվտանգ, անփորձանք ծառայեն ու հետ վերադառնան: Մաղթում եմ, որ մարդիկ բարի լինեն, սիրեն միմյանց, դրական զգացումներով լցվեն միմյանց հանդեպ: Վստահ եմ, որ այդպես մարդիկ ավելի երջանիկ կդառնան, և իրենց կյանքն ավելի ուրախ ու հանգիստ կլինի: Թող բարություն, սեր ու խաղաղություն լինի այս տարի:
Operativ.am-ը շնորհավորում է Շուշան Երիցյանի Ամանորը և մաղթում հաջողություններ գալիք տարում: