Մոսկվայում կայացել է Հայկական նորաձևության օրը (լուսանկարներ)

Ինչպես հայտնել էինք, նոյեմբերի 27-ին Մոսկվայում առաջին անգամ պետք է տեղի ունենար Հայկական նորաձևության օր: «Armfashionday» սպասված հայկական նորաձևության օրն արդեն կայացել է: Operativ.am-ն իր խոստմանը համաձայն՝ ներկայացնում է մանրամասներ օրվա հետ կապված:

Տոնի կազմակերպիչը ՌԴ-ում բնակվող մեր հայրենակցուհի, հաղորդավարուհի Նաիրա Նիազյանն ու ընկերներն էին՝ Անյա Փալազյանը, Լիանա Խուդավերդյանը, Աղասի Մարտիրոսյանը, Ցողինե Խալաթյանը և այլք: Միջոցառման շրջանակներում հանդիսատեսի ուշադրությանը ներկայացվել են հայազգի մոդելավորողների հագուստների հավաքածուներ՝ ամենօրյայից մինչև կուտյուրային: Մասնակից դիզայներներն իրենց աշխատանքներով հիացրել են ներկաներին՝ գեղարվեստի իրենց ընկալման առանձնահատկություններով, ոճային ու գունային բազմազանությամբ՝ հագեցած ազգային արնամենտներով՝ զարդանախշերից մինչև բոհեմային շքեղ աքսեսուարներ: Արտյոմ Սյունեցու հայկական հավաքածուն ներկայացնող նազելի հայուհիներին փոխարինել են երկարոտնյա կապուտաչյա սլավոնոհիններն ու Արաքսիա Վիտայի կոկետ սևամորթ գեղեցկուհիները:

Երեկոն վարել է Գայանե Բրեովան, ով անմնացորդ աջակիցն է հայերի, հայկականի ու գեղեցիկ մտահաղացումների, ինչպիսին Նաիրա Նիազյանի թիմի կազմակերպած միջոցառումն էր:

Շոուն հատկանշական էր նաև խոստացված աստղաբույլի կատարումներով, ինչն ավելի բովանդակալից ու հագեցած է դարձրել երեկոն: Ամեն հավաքածու ուղեկցվել է հայտնի արտիստի կատարմամբ. Հայկ Էս, Էդգար, Դիանա Դիկովսկի, Նշան Հայրապետյան, Արտյոմ Հարությունյան, Մարիա Սիվցովա, Սևակ Խանագյան, Ժաննա Խուդավերդյան, Օկսանա Կոզակովա: Երեկոյի հատուկ հյուր է եղել Արտեմ Վալտերը: 

Հայկական նորաձևության տոնին մասնակցելու նպատակով Երևանից Մոսկվա ժամանած դիզայներ Արտյոմ Սյունեցու Վանի թագավորությանը նվիրված հայկական տարազների հավաքածուն ներկայացրել են գեղեցկուհի հայուհիները: 

Դիզայներ Նարինե Հարությունյանը՝ նորաձևության լան շրջանակներին հայտնի իր կանացիության և նրբագեղության տեսականիներով:

Արմինա Գոմցյանի ներկայացրած հավաքածուն մեգապոլիսի խելահեղ ռիթմով ապրող աղջիկների ցանկությունների ճիչն էր՝ դասականի և ռոմանտիկի համադրմամբ:

Դիզայներ Արաքսյա Վիտան իր հավաքածուն ստեղծել էր հարմարավետության սկզբունքով, ինչն ըստ դիզայների՝ հնարավորություն է տալիս գեղեցկուհիներին իր ստեղծած հագուստները հագնել օրվա աշխատանքի ընթացքում և երեկոյան՝ հարստացնելով զարդերով:

Աննա Մուրադյանը մանկուց է ստեղծում գլխարկներ և ցուցադրության շրջանակներում էլ հանդես  է եկել գլխարկների «ԱնդրիԵլա» հավաքածուով:

Ռեգինա Ակոպովան իր հավաքածուն անվանակոչել էր «Ջազի երանգներ», և նվիրել հանգուցյալ հայրիկի՝ ջազ երաժշտի վառ հիշատակին:

Operativ.am-ի թղթակցի հետ զրույցում երեկոյի կազմակերպիչ Նաիրա Նիազյանն ասաց. «Պետք է նշեմ, որ գնահատում եմ հնչող բոլոր կարծիքներն ու վերանայում կատարած աշխատանքը և ցանկանում նշել, որ Հայկական նորաձության օր անվանումը չի պարտադրում կամ սահմանափակում ներկայացնող դիզայներների հավաքածուների տեսակները (ներկայանալու միայն հայկական արնամենտներով կարված տեսականիով): Մենք բոլորս ապրում և ստեղծագործում ենք հայրենիքից դուրս, և այս երկրի «ֆեշն» ոլորտին մոտ քայլելու համար պետք է ստեղծագործել համապատասխան ձևաչափերով, եթե նաև նկատի ունենանք, որ ներկայացող բոլոր դիզայներները ցանկություն ունեն դուրս գալու մեծ շուկա:

«Armfashionday»ը կլինի շարունակական. հաջորդը տեղի կունենա 2016 թվականի գարնանը: