Վարդան Պողոսյանն իր հաղթական ստեղծագործության մասին (լուսանկարներ և տեսանյութ)
LifeStyleԵրիտասարդ ջութակահար Վարդան Պողոսյանն օրեր առաջ իր առաջին հաղթական ստեղծագործությունը հանձնեց հանդիսատեսի դատին: Շնորհանդեսին հավաքված հյուրերի աչքերում հիացմունքից բացի հարցականներ էին առաջացել: Մի մասը վստահ էր, որ տեսահոլովակում կրակի ու ջրի անսպառ պայքարը գրաֆիկական լուծումների արդյունք է, մյուս մասը՝ վստահ էր, որ կադրերն իրական են: Վարդանի ստեղծագործական կյանքի և տեսահոլովակի նկարահանման ընթացքի մասին մանրամասներ իմանալու նպատակով Operativ.am-ի թղթակիցը զրուցել է երիտասարդ երաժշտի հետ:
-Վարդա՛ն, սա Ձեր ո՞րերորդ ստեղծագործությունն է:
-Հայտնի ստեղծագործություններ շատ եմ կատարել, բայց սա իմ առաջին հեղինակային գործն է:
-Ինչպե՞ս որոշեցիք այն «VIVA» անվանել:
-Գործիքավորողի` Արարատ Զաքարյանի հետ, քննարկում էինք, թե ինչպես անվանել և որոշեցինք Violine (անգլ. նշանակում է ջութակ ) բառի VI-ն վերցնել և միացնել իմ անվան առաջին երկու տառին VA-ին և ստացվեց VIVA: Այն իր հերթին նշանակում է հաղթանակ: Այնպես որ, բովանդակությունն ու անվանումն ակամայից համընկան:
-Ի վերջո, ո՞վ հաղթեց ջո՞ւրը, թե՞ կրակը:
-Երաժշտությունը:
-Ինչպե՞ս ծնվեց «VIVA»-ն:
-Ասելիք կար և այն արտահայտվեց երաժշտության տեսքով, տվյալ դեպքում՝ «VIVA»-ի:
-Ինչու՞ որոշեցիք տեսահոլովակ նկարել:
-Երաժշտությունն ինքը հուշում էր, որ ինչ-որ բան պակասում է:
-Տեսահոլովակում ջրի ու կրակի պայքարն ու՞մ մտահաղացումն էր:
-Մենք ունեինք ընդհանուր գաղափարներ, որոնք համընկնում էին: Տարբեր օրինակներ ենք քննարկել, սակայն բոլոր դեպքերում հակված էինք անդրադառնալ իրար հակադրող երևույթների:Դրանք քննարկելու արդյունքում, որոշեցինք կրակն ու ջուրը մարմնավորել: Ստացված արդյունքի համար շնորհակալ եմ ողջ թիմին. ռեժիսոր Արսեն Երեմյանին, պարողներ՝ Էլենին, Միքայելին և մյուսներին:
-Ի՞նչ դժվարություններ ու հումորային իրավիճակներ եք ունեցել նկարահանման ընթացքում:
-Մարդկանց մոտ կարծիք կա, որ տեսահոլովակը գրաֆիկական մոնտաժի արդյունք է, բայց պետք է նշեմ, որ տեսահոլովակում բոլոր կադրերն իրական են: 4 տոննա ջուր է օգտագործվել անձրևի կադրերն ստանալու համար: Այստեղ, ոչ միաjն պարողի համար էր ընթացքը բարդ, այլև իմ, քանի որ պետք է նվագեի անձրևի տակ, իսկ գործիքը ջրին չէր դիմանում: Կրակի կադրերը նկարելը ևս բարդ էր: Տղայի ձեռքերն այրել ենք իրականում: Կարելի է ասել, որ ոչ թե հումորային ընթացք ենք ունեցել, այլ դժվարություններով լի ու այսպես ասած՝ «ցավոտ»:
-Քանի՞ տարեկանից եք զբաղվում երաժշտությամբ:
-7 տարեկանից զբաղվում եմ երաժշտությամբ: Սկզբում սովորել եմ Տիգրանյանի անվան երաժշտական դպրոցում, որից հետո Ռոմանոս Մելիքյանի անվան երաժշտական ուսումնարանում: Մագիստրոսի կոչում ձեռք եմ բերել Կոնսերվատորիայում:
-Ընտանիքում կա՞ն երաժիշտներ, թե՞ միայն Դուք եք այդ տաղանդով առանձնանում:
-Հայրս դաշնակահար է, կարելի է ասել երաժշտական ընտանիք ենք:
-Ի՞նչը կարող է պատճառ դառնալ, որ թողնեք երաժշտությունը:
-Նույնիսկ բանակի տարիներին չեմ թողել նվագելն ու ստեղծագործելը: Ծառայել եմ Երևանի նախագահական նվագախմբում որպես ջութակահար: Այդ տարիներին, եթե որևէ բան չկարողացավ խոչընդոտ հանդիսանալ, ապա կարծում եմ, որ ուրիշ ոչինչ չի լինի, հանուն որի ես թողնեմ նվագելը:
-Համաշխարհային դեմքերից ո՞ւմ հետ կցանկանայիք հանդես գալ դուետով:
-Դևիդ Գարեթի:
-Ի՞նչ կարող է սպասել Ձեր հանդիսատեսն առաջիկայում:
Նոր ստեղծագործություններ, դուտներ կլինեն:
Operativ.am-ը շնորհավորում է Վարդանին և մաղթում բուռն ստեղծագործական կյանք: