Օպերատիվ իրավիճակը՝ Տավուշի սահմանամերձ գյուղերում

Ինչպես  հաղորդել էինք սեպտեմբերի 24-ին ադրբեջանական կողմը խախտել է հրադադարի պահպանման ռեժիմը հայ-ադրբեջանական պետական սահմանի հյուսիսարևելյան հատվածում` կիրառելով տարբեր տրամաչափի հրաձգային զինատեսակներ և ականանետեր: Գնդակոծվել են սահմանամերձ բնակավայրերը, ինչի հետևանքով ՀՀ Տավուշի մարզում կան զոհեր խաղաղ բնակչության շրջանում:

Operativ.am-ի թղթակիցը կապ հաստատեց Տավուշի սահմանամերձ գյուղերի, Այգեպարի, Մովսեսի, Պառավաքարի, Բերդավանի գյուղապետերի հետ, ովքեր հայտնեցին, որ այս պահին իրավիճակը նորմալ է: Կրակոցներ չկան:

Հիշեցնենք, որ Բաղանիսի գյուղապետը ֆեյսբուքյան իր էջում գրել էր, որ համեմատաբար խաղաղ գիշեր են ունեցել:

Պառավաքարի գյուղապետի փոխանցմամբ՝  իրենց գյուղում  կրակոցների հետևանքով մահացել է 83-ամյա Պայծառ Աղաջանյանը:

Բերդավանի գյուղապետի խոսքով՝ երեկ կրակոցների հետևանքով 2 կին է զոհվել: Կանանցից մեկը 94-ամյա Շուշան Ասատրյանն է, իսկ մյուսը՝ 41-ամյա Սոնա Ռևազյանը: 

«Ունենք նաև 2 վիրավոր, սակայն նրանց կյանքին վտանգ չի սպառնում»,-ասաց  Բերդավանի գյուղապետը: