52 սիրահար զույգ պայքարեց 1.500.000 դրամի համար (լուսանկարներ)

Հունիսի 14-ին Երևանի Imperial Palace Hotel-ում տեղի ունեցավ «Լեդի ֆուրշեթ» ընկերության կողմից կազմակերպած մրցույթի ամփոփումը: «Լեդի ֆուրշեթ» ընկերությունը կազմակերպել է մրցույթ ՝ «Ես քեզ սիրում եմ» թեմայով:

Մասնակից բոլոր այն զույգերը, ովքեր առաջիկայում պատրաստվում են ամուսնանալ, նախապես ուղարկել էին իրենց լուսանկարները «Լեդի ֆուրշեթ» ընկերության էլ. հասցեին և բոլորի լուսանկարները տեղադրվել են www.ladyfurshet.am կայքում: Քվեարկության արդյունքում, հաղթող ճանաչված զույգը ստանալու էր 1.500.000 դրամին համարժեք հարսանեկան ծառայություններ՝ հարսանեկան զգեստ, ֆուրշեթ, ֆոտո և վիդեո նկարահանում, հարսանեկան մեքենա, դիմահարդարում, վարսահարդարում և հարսանեկան ճանապարհորդություն:

Մրցույթին գրանցվել է 69 զույգ, սակայն միջոցառմանը ներկա  էր 52 զույգ:

Բոլոր մասնակիցները ստացան  370.000 դրամին համարժեք նվեր քարտեր Լեդի ֆուրշեթ ընկերության և օրվա բոլոր գործընկերների կողմից:

Վիճակահանությամբ խաղարկվեցին  նաև այլ մրցանակներ, որպեսզի մասնակից բոլոր զույգերը հեռանան գոհունակությամբ:

«Լեդի Ֆուրշեթ» ընկերության հիմնադիր տնօրեն Արմեն Խլղաթյանը բոլորի ներկայությամբ ներկայացրեց google analytics-ի տվյալները, ըստ որի այդ ընթացքում կայք մուտք էին գործել 29.000-ին մոտ այցելուներ, բայց քվեարկել էին 83.000-ից ավել: Հետևաբար քվեարկությունները զրոյացվեցին և տեղում անցկացվեց բաց և թափանցիկ քվեարկություն: Հաղթող զույգը՝ Մինաս և Իլոնա զույգը, որպես մրցանակ ստացավ 1.500.000 դրամին համարժեք հարսանեկան ծառայությունների փաթեթ: Միջոցառմանը ներկա էր նաև Թինա Քեյը, ով տեղում որոշեց անակնկալ անել հաղթող զույգին, և խոստացավ զույգի հարսանեկան պարն անվճար սովորեցնել: 

Երկրորդ մրցանակին արժանացավ Վահե և Աննա զույգը, ովքեր որպես նվեր ստացան՝ հարսանեկան մեքենա, զարդարված համար Imperial Palace Hotel-ում և 370,000 դրամի նվեր քարտեր: 

Operativ.am-ի թղթակցի հետ զրույցում  Իլոնան ասաց. «Սկզբում չէի ցանկանում մասնակցել, և միայն վերջին օրը նշանածիս հետ որոշեցինք ուղարկել լուսանկարը: Դե մտածում էինք՝ հայ ենք, ոնց էլ չլինի անարդարություն կլինի, բայց հիմա կարող եմ ասել, որ իսկապես ամեն բան արդար էր, և շատ ուրախ ենք հաղթանակի համար»: