Թուրքական ընդդիմությունը հայտարարում է, որ ԿՀՎ-ն գաղտնալսում է երկրի խորհրդարանը

ԱՄՆ-ի Կենտրոնական հետախուզական վարչությունը (ԿՀՎ) գաղտնալսում է Թուրքիայի խորհրդարանը՝ նրա մերձակայքում տեղակայված գաղտնի օբյեկտից, պնդում է հիմնական ընդդիմադիր պատգամավոր Էրդալ Ակսյունգերը՝ Ժողովրդա-հանրապետական կուսակցությունից: Պատգամավորը, որն ապօրինի գաղտնալսման փաստերի հետազոտման գծով խորհրդարանական հանձնաժողովի անդամ է, երկուշաբթի «Աքշամ» թերթին տրված հարցազրույցում տեղեկացրել է, որ գաղտնալսումն իրականացվում է լավ պաշտպանված օբյեկտից, որը տեղակայված է Անկարայի կենտրոնում գտնվող խորհրդարանի շենքից երկու կմ հեռավորության վրա, այն ղեկավարում է ԿՀՎ-ի գնդապետ, իսկ շինության շրջակայքում «վխտում են» ամեևրիկյան հետախուզության գործակալներ: «Թե ինչու են գաղտնալսում խորհրդարանը, և հատկապես ում են գաղտնալսում՝ ես տեղյակ չեմ: Հենց որ հայտնի դարձավ նման օբյեկտի գոյության մասին, մենք հարցում ուղարկեցինք հակահետախուզության վարչության անվտանգության գլխավոր տնօրինությանը, ժանդարմական զորքերի հետախուզական վարչությանը և Ազգային հետախուզական կազմակերպությանը, սակայն այդ գերատեսչություններից չստացանք ոչ դրական, ոչ էլ բացասական պատասխան»,- ասել է Ակսյունգերը՝ հավելելով, որ մտադիր է հարցը բարձրացնել խորհրդարանում:

Պաշտոնական անձանց, առանցքային գերատեսչությունների, լրագրողների գաղտնալսումների վերաբերյալ սկանդալները վերջին շրջանում բազմիցս փոթորկել են Թուրքիան: Անցյալ տարվա դեկտեմբերին Թուրքիայի վարչապետ Ռեջեփ Էրդողանն անգամ հեռուստահարցազրույցներից մեկի ժամանակ գանգատվեց, որ իր աշխատասենյակում և տանը «ժուչոկներ» են հայտնաբերվել: Այդ փաստով հետաքննություն սկսվեց, որի արդյունքներն առայժմ հայտնի չեն, հաղորդում է РИА Новости-ն: