Չեմ ուզում ժամանակից առաջ անցնել. Մարգարիտա Հունանյանն իր դերասանական կարիերայի և ապագա պլանների մասին (լուսանկարներ)

Operativ.am-ի թղթակիցը զրուցել է դերասանուհի Մարգարիտա Հունանյանի հետ և փորձել պարզել, թե ինչ նախասիրություն ունի, և թե ինչու է ընտրել հենց դերասանի մասնագիտությունը: Հարցազրույցը ստորև.

-Որտե՞ղ եք սովորել:

Սովորել եմ Երևանի թատրոնի և կինոյի պետական ինստիտուտի դերասանական բաժնում՝ Արմեն Խանդիկյանի արվեստանոցոմ:

-Ինչո՞վ եք զբաղվում այժմ:

Ներկա պահին զբաղված եմ Գ.Սունդուկյանի անվան ազգային ակադեմիական թատրոնի ներկայացումներից մի քանիսում: Իմ կարծիքով՝ մեր մասնագիտության մեջ թատրոնն ունի առանձնահատուկ և շատ կարևոր դերը, քանի որ թատրոնի բեմում խաղալիս անմիջական կապ ես հաստատում հանդիսատեսի հետ, տեսնում ես նրանց արձագանքները և գնահատականը, բայց կարևոր եմ համարում նաև փորձի ձեռք բերումը ֆիլմերի ասպարեզում: Ուստի, հաճույքով ընդունում եմ ֆիլմերում նկարահանվելու առաջարկները: Նկարահանվել եմ մոտ յոթ գեղարվեստական ֆիլմում՝ տարբեր պլանի դերերում: Շուտով (հունիսի 3-ին) կկայանա «Չներվածները» գեղարվեստական ֆիլմի պրիմիերան, որտեղ ես մարմնավորել եմ գլխավոր հերոսներից մեկի ընկերուհու՝ Ալինայի կերպարը: Հրավիրում եմ բոլորին դիտելու այս ֆիլմը և շատ ուրախ կլինեմ, եթե կիսվեք ձեր տպավորություններով: Ի դեպ, մեր բնագավառի մի խումբ մարդկանց համատեղ ուժերով վերջերս ստեղծված «Grand Life» կազմակերպությունում աշխատում եմ որպես մենեջեր: «Grand Life»-ը միջոցառումներ է կազմակերպում, որոնցից մեկը տեղի կունենա մայիսի 30-ին՝ Կարեն Դեմիրճյանի անվան մարզահամերգային համալիրում՝ ժամը 19:00-ին: Դա լինելու է «MEGA PARTY» շոու ծրագիր: Երաժշտական մասը և բարձր տրամադրությունն ապահովելու են «DJ VAKCINA»-ն և «DJ Serjo»-ն: Հրավիրում եմ բոլորիդ զվարճանալու և լավ ժամանակ անցկացնելու: Տոմսերի արժեքն է 2000 դրամ:1 տոմսով կարող են գալ 1 տղա կամ 2 աղջիկ: Տոմսերի համար զանգահարել 091 66 21 09 , 099 28 23 73 համարներով:

-Ինչպե՞ս սկսվեց Ձեր մուտքն այս ասպարեզ:

Դպրոցական տարիներին այցելել եմ «3 Ույու 4» մանկական թատերական խմբակ՝ ուղղակի հետաքրքրությունից դրդված, քանի որ սկզբնական շրջանում դա ինձ համար ուղղակի հոբբի էր, հետո ես այնքան սիրեցի այս բնագավառը, որ արդեն կասկած չկար իմ ապագա մասնագիտության ընտրության հարցում:

-Առաջին Ձեր դերակատարման ժամանակ ի՞նչ դժվարություններ և վախեր եք ունեցել:

Առաջին դերս եղել է Տատյանայի կերպարը (Վոլրդարսկու) «Սրիկա» ներկայացման մեջ: Դժվարություններ, իհարկե եղել են, առկա էր նաև հուզմունք, վախ: Ուզում էի լինել բավականին համոզիչ, որ եթե ներկա լիներ Ստանիսլավսկին, ասեր՝ «Հավատում եմ» (ժպտում է):

-Ի՞նչ դեր կցանկանայիք մարմնավորել:

Իմ կարծիքով՝ մեր մասնագիտության մեջ շատ վտանգավոր է շտամպավորումը, երբ քեզ ընկալում են կոնկրետ տիպաժի մեջ, դա ճահճացման սկիզբ է և խանգարում է հետագա աճին, ու ցավոք, հաճախ առաջին կերպարդ դառնում է յուրօրինակ այցեքարտ, և քեզ սկսում են ընկալել միայն այդ պրիզմայով: Դրա համար շատ կցանկանայի տարբեր կերպարներում հանդես գալ, իրարից կտրուկ տարբերվող: Նախ դա կլինի ինձ համար ահռելի մասնագիտական փորձ, քանի որ ամեն կերպար կերտելուց ես բավականին ժամանակ եմ հատկացնում՝ ուսումնասիրելով տվյալ կերպարի առանձնահատկությունները, որպեսզի հնարավորինս ծանոթ լինեմ այն ամենին, ինչը հետո պետք է ներկայացնեմ, որպեսզի նման լինեմ և համոզիչ: Եվ երկրորդ՝ դա թույլ է տալիս արտահայտել մեր ունակությունների ամբողջ սպեկտորը և հետագայում ստանալ բազմաթիվ հետաքրքիր առաջարկներ:

-Ովքե՞ր են եղել պրոֆեսիոնալներից ում հետ խաղացել եք, և ո՞ր դերասաններն են Ձեզ համար օրինակ հանդիսանում:

Պատիվ եմ ունեցել թե՛ թատրոնում, թե՛ կինոյում խաղալ բազմաթիվ սիրված և ճանաչված արտիստների հետ, որոնցից են՝ Գուժ Մանուկյանը, Հրաչյա Հարությունյանը, Արթուր Ութմազյանը, Էվելինա Շահիրյանը, Լուիզա Ղամբարյանը, Արթուր Մկրտչյանը և այլք: Նշեմ, որ ինձ համար շատ պատվաբեր էր նման մեծությունների հետ աշխատելը, ինչպես նաև շատ պատասխանատու և բավականին նոր գիտելիքներ ու փորձ ստանալու հնարավորություն:

-Հանդիսատեսը ո՞ր ֆիլմից կամ դերակատարումից կարող է Ձեզ հիշել:

Այստեղ պետք է նշեմ, որ հանդիսատեսի լայն մասսաներում ճանաչվածություն ձեռք բերելու համար մեծ դեր ունեն նաև հեռուստասերիալները, և ինձ հիմա հանդիսատեսը կարող է տեսնել «Շանթ» հեռուստաընկերությունով ցուցադրվող «Սիրո Գերին» հեռուստասերիալում՝ Լիզայի կերպարով:

-Ի՞նչ քայլեր և ծրագրեր ունեք ապագայում:

Գիտե՞ք, կա մի զվարճալի ասացվածք. «Եթե ուզում ես ծիծաղեցնել Աստծուն, պատմին նրան քո ապագա պլանների մասին»: Հետևապես, չեմ ուզում ժամանակից առաջ անցնել, այլ կարող եմ միայն նշել, որ շատ մեծ ցանկություն ունեմ հետաքրքիր նախագծերում աշխատելու և ուրախ կլինեմ նման առաջարկ ստանալ: