Որքանո՞վ է հավանական «Genealogy» խմբի հաղթանակը. եվրատեսիլյան կանխատեսումներ՝ հայ երգիչ-երգչուհիների կողմից
«Եվրատեսիլ»-ն այն մրցույթն է, որը կարողանում է համախմբել ողջ Եվրոպան, իսկ այս տարի մրցույթին միացավ նաև Ավստրալիան: Հայաստանը «Եվրատեսիլ 2015» երգի մրցույթում ներկայացնում է «Genealogy»-ի խումբը, որն այսօր՝ մայիսի 23-ին ելույթ կունենա եզրափակիչ փուլում՝ 6-րդ համարի ներքո: «Genealogy»-ի՝ առաջին կիսաեզրափակիչ փուլի ելույթի և եզրափակչի արդյունքների մասին կանխատեսումներ են արել երգիչ-երգչուհիները:
Հայկո- Հայաստանն է գրավելու առաջին հորիզոնականը: Եթե մերոնք չէ, ապա Շվեդիան կամ Իտալիան կլինեն հաղթողները: Մեր արտիստները շատ լավն են ու ճաշակով: Շոուն էլ գերազանց էր:
Սերգեյ Գրիգորյան- Կարծում եմ տասնյակի մեջ կլինենք: Բելգիան, Շվեդիան, Լատվիան և Իսրայելը հաղթանակի լիիրավ հավակնորդներ են, քանի որ ժամանակակից այսօրվա շուկային շատ համընթաց և հետաքրքիր են: Մեր խումբն ավելի շատ գաղափարով է հետաքրքիր, ուստի, շոուի բացակայության դեպքում, դժվար է խոսել շոու հասկացության մասին: Լավ կատարողներ, ովքեր շատ լավ գիտեն իրենց առաջ դրված խնդիրը:
Քրիստինե Պեպելյան-Շատ համարներ չեմ տեսել, քանի որ ԱՄՆ-ում էի: Մեր խմբի ելույթը դիտել եմ և հպարտության հրաշալի զգացում ապրել: Հավանում եմ նաև Ռուսաստանի երգն ու երգչուհուն: Հուսամ, որ այս տարի մենք կունենանք մեր լավագույն արդյունքը, քանի որ մեր կատարողները պրոֆեսիոնալ են, իսկ երգը՝ մեծ ասելիքով:
Ջուս- Բոլոր ելույթներին չեմ հետևել, սակայն գիտեմ, որ մեր ներկայացուցիչները շատ լավ են ներկայացել: Խմբի բոլոր անդամները լավն են, բայց որպես պրոֆեսիոնալ և յուրահատուկ ձայն ունեցող երգչուհի ցանկանում եմ առանձնացնել Ինգա Արշակյանին: Չնայած ես երգը եվրատեսիլյան չեմ համարում, սակայն ցանկանում եմ, որ Հայաստանը զբաղեցնի առաջին հորիզոնականը:
Արմինե Գրիգորյան- Մեր երկիրը հրաշալի ելույթ ունեցավ: Բոլորն էլ շատ լավն էին: Շոուն շատ հավանեցի, երգը աննման է և գեղեցիկ: Ինգայի ելույթը շատ սիրեցի, ինչպես միշտ փայլում է թե՛ ինքը , թե՛ քույրը, որոնց ես անչափ արժևորում եմ մեր արվեստում: Կարծում եմ՝ առաջին 4 տեղերից մեկը կզբաղեցնենք, իսկ որպես ֆավորիտ՝ Պոլինա Գագարինան է:
Արա Թորոսյան- Հայաստանը կլինի 1 հորիզոնականում։ Մեր խմբի շոուն էլ ամենալավն էր։ Ափսոս, որ տեղյակ չեմ, թե ինչի մասին է խոսքը։ Բայց որպես իմ երկրի զավակ՝ ավելորդ եմ համարում ամեն տեսակի խմորումներն ու քննարկումները։ Վերջ։
Նանա-շատ եմ ուզում, որ հաղթանակ տանի Հայաստանը: Հրաշալի երգ է՝ հզոր ձայների կատարմամբ: «Genealogy»-ի շոուն մաքսիմալ էր, ու ամենակարևորը՝ իմաստալից: Եթե չհաղթի Հայաստանը, ապա կցանկանամ, որ հաղթի Ռուսաստանը:
Լիլիթ Կարապետյան- Ամբողջությամբ չեմ հետևել և հիմա չեմ կարող ասել, թե որ հորիզոնականում կլինեն մեր մասնակիցները: Շատ ուրախ եմ, որ Հայաստանը գեղեցիկ ելույթ ունեցավ: Մոտավորապես այդ 5 րոպեն, ոչինչ չես զգում, ապրում ես երգով, կարծես գտնվում ես այնտեղ ու նրանց հավասար ապրում նույն զգացողությունները:Մաղթում եմ հաղթանակ, քանի որ երգը, կատարումն ու բեմադրությունը համահունչ էին և հրաշալի:
Անի Քրիստի-Քանի որ առնվազն բախտագուշակ պետք է լինեմ, որ կռահեմ, թե Հայաստանը, որ հորիզոնականում կլինի, ինձն նման ճոխություն թույլ չեմ տալիս այս մրցույթում: Միայն կարող եմ ասել, որ ամեն տարի, երբ ծածանվում է մեր դրոշը, ես հուզվում եմ և հպարտանում: Շատ գեղեցիկ երգ է և տեսահոլովակ: Զգեստներն էլ համահունչ են մեր 100-ամյակին:
Գաբի Գալոյան-Շատ էի ուզում, որ «Ապրելու ապրիլ» երգով մասնակցենք Եվրատեսիլին: Վստահ եմ, որ հաղթող երգ էր լինելու: Սակայն այս դեպում ևս ես կարծում եմ, որ մենք բարձ հորիզոնական կզբաղեցնենք: 5-յակի մեջ տեսնում եմ մեզ: Մեր խմբի ելույթից ցնցված եմ: Առաջին տարին է, որ մարմնովս սարսուռ է անցել, չափազանց հուզված ունկնդրել եմ:
Վրեժ Կիրակոսյան- Հայաստանին առաջին տեղ կտայի, բայց քանի որ Եվրատեսիլը քաղաքական մրցույթ է, հաղթողն անհայտ է: Ելնելով Եվրոպայի այս տարվա դիրքորոշումից՝ կարծում եմ կլինենք 1-3 հորիզոնականներում, հավանականությունը մեծ է, որ առաջինում լինենք: Շոուն իր գաղափարով հիանալի էր:
Ավո Ադամյան- Անցյալ տարվա հաղթողից հետո ատում եմ Եվրատեսիլը: Դատելով մերոնց երգից և շոուից՝ կարծում եմ 7-րդ կամ 6-րդ հորիզոնականն ենք զբաղեցնելու: Հիասթափությունս այնքան մեծ է այս մրցույթի նկատմամբ, որ որևէ մեկնաբանություն չեմ ուզում անել մասնակից երկրների մասին:
Վարդան Բադալյան-Կարծում եմ, որ բոլորս ցանկանում ենք, որ Հայաստանն 1-ին հորիզոնականում լինի: Եթե չհաղթենք, երևի 5-յակում կլինենք, քանի որ բոլոր նախադրյալները կան հաղթանակի համար: Լավ երգ, լավ կատարում:
Operativ.am-ը ևս հաջողություն է մաղթում «Genealogy»-ին: