«Ինչպե՞ս եք պատկերացնում քաղաքական պայքարն առանց PR տեխնոլոգիաների». Ստյոպա Սաֆարյանը՝ Րաֆֆի Հովհաննիսյանի ծոմի մասին

Operativ.am-ի թղթակիցը զրուցեց «Ժառանգություն» խմբակցության նախկին պատգամավոր Ստյոպա Սաֆարյանի հետ.

-Պրն. Սաֆարյան, ինչպե՞ս ստացվեց, որ Րաֆֆի Հովհաննիսյանի հացադուլի դադարեցումը համընկավ Սուրբ Սարգսի տոնի հետ, ավելի կոնկրետ` Մեծ Պահքի նախօրեի հետ:

-Պրն. Հովհաննիսյանը բազմիցս նշել է, որ սա, քաղաքական նկատառումներից բացի, ինքնամաքրման գործընթաց է:

-Պրն. Հովհաննիսյանը նախապես ասե՞լ է, որ սա եղել է ծոմ:

-Ինքը նշել է, որ նստում է հացադուլի և ասել, որ հացադուլն իր համար նաև ինքնամաքրման ասպեկտ ունի:

-Մտավախություն չկա՞, որ հացադուլի դադարեցումը կարող է Հովհաննիսյանին սատարողներին հիասթափեցնել:

-Երեկ ժողովուրդը ծափողջույններով է ընդունել նրա այդ քայլը, մարզերից, գյուղերից մինչև քաղաք մարդիկ, ովքեր դիմել են իրեն, հստակ ասում են, որ իրենց առողջ ու կազդուրված առաջնորդ է պետք, ով կգլխավորի շարժումը: Հացադուլի նպատակը խղճահարություն առաջացնելը չէ, որ Սերժ Սարգսյանի մոտ խղճահարության զգացում առաջանա և նա «հանձնի» Բաղրամյան 26-ի բանալիները: Մարդիկ կան, որոնք չեն լսել Րաֆֆի Հովհաննիսյանի խոսքերը հացադուլի խորհրդի մասին և իրենց վերլուծություններն են արել: Այս ծրագիրը միտված չէ Րաֆֆի Հովհաննիսյանի ինքնազոհողությանը, այն միտված է ապրլի իննի երդմանակալությանը:

-Իսկ ինքնամաքրման պրոցեսը չի՞ կարող ասոցացվել Սերժ Սարգսյանի նամակի ազդեցության հետ:

-Եթե Սերժ Սարգսյանը որևէ լավ բան է արել, դա այն է, որ միացավ ժողովրդական պահանջին, որին ես եմ ականատես եղել՝ հերթապահելով Ազատության հրապարակում, սա ժողովրդի խնդրանքն էր Րաֆֆի Հովհաննիսյանին՝ դուրս գալ հացադուլից, ինքն առանց ժողովրդի ոչինչ չի արել, և ժողովուրդն էլ առանց իրեն ոչինչ չի արել: Մինչ Սերժ Սարգսյանի հորդորը՝ հազարավոր մարդիկ նրան են փոխանցել հացադուլը դադարեցնելու խնդրանքը:

Ինչու՞ նա պետք է Սերժ Սարգսյանի ասածն անի, իսկ ժողովրդինը՝ ոչ:

-Պրն. Սաֆարյան, կհերքե՞ք, որ այս ամենում հաղոջված PR տեխնոլոգիաներ են կիրառված:

-Քաղաքականությունը, եթե ինքը գործողությունների որոշակի շղթա է, և այդ գործողություններից յուրաքանչյուրը  տեխնոլոգիա է ենթադրում, ապա կարող եմ համաձայնել, բա ինչպե՞ս եք պատկերացնում քաղաքական պայքարն առանց տեխնոլոգիաների, մարտավարության ու ռազմավարական պլանի: 

Զրուցեց Սեդա Ղուկասյանը