Քիմ Քարդաշյանը հաջողակ կին գործարար դառնալու դասերը ստացել է հորից (լուսանկարներ)
Աշխարհահռչակ ֆոտոմոդել Քիմ Քարդաշյանը հաջողակ կին գործարարների շարքում է: Ինչ էլ որ խոսեն Քիմ Քարդաշյանի մասին, անհնար է հերքել այն փաստը, որ նա հաջողակ կին գործարար է: Համաձայն Forbes-ի՝ Քարդաշյանը 2014թ. վաստակել է 28 մլն դոլար: Նշենք նաև, որ մեկ ամիս առաջ, Քիմն ընդգրկվել է 100 ամենաազդեցիկ կանանց ցուցակում: Այս մասին գրում է Uk.businessinsider.com-ը:
Չնայած այն հանգամանքին, որ Քարդաշյանը բավականին հարուստ ընտանիքում է մեծացել, սակայն նա դեռ դեռահասության տարիքից աշխատել է և վաստակել սեփական գումարը: 16 տարեկանից 4 տարի աշխատել է հագուստի խանութում:
«Variety» ամսագրին տված հարցազրույցում հեռուստաաստղը պատմել է, որ հայրն իրեն սովորեցրել է մշտապես խնայող լինել ու ամեն ինչի համար պայմանագիր կնքել:
«Երբ երիտասարդ էի, ես աշխատել եմ հորս գրասենյակում: Այդ տարիներին ես հայտնաբերեցի eBay առցանց շուկան և սկսեցի զբաղվել նաև դրանով: Հետո, ես սկսեցի իմ հարուստ ընկերների ու ծանոթների զգեստապահարաններից վերցնել դիզայներական հագուստները, որոնք նրանք այլևս չէին հագնելու և վերավաճառել դրանք»,-ասել է նա:
Քարդաշյանը միշտ իրեն գործարար է համարել: «Երբ հնարավորություն ունեցա մեր հեռուստատեսային շոուն ունենալու, սկզբում դրանով զբաղվում էի, որպեսզի ուշադրությունը գրավեմ մեր խանութների վրա: Այնուհետև, շոուն արդեն հայտնի դարձավ, սակայն ես չէի սպասում, որ այն կվերածվի նրան, ինչ այժմ կա»,-ավելացրել է Քիմը: