«Եվրատեսիլ-2015»-ին մենք կներկայանանք ոչ թե 6 հոգով, այլ 10 միլիոնով. Genealogy (տեսանյութ և լուսանկարներ)

Այս տարի Ավստրիայի մայրաքաղաքում կայանալիք «Եվրատեսիլ-2015» երգի միջազգային մրցույթում  Հայաստանը կներկայանա յուրահատուկ ձևաչափով և նոր ձևավորված խմբով: «Genealogy» խմբում  ներառված է ազգությամբ հայ 6 արտիստ, ովքեր ներկայացնում են երկրագնդի 5 աշխարհամասերը. Եսայի Ալթունյան-Եվրոպա, Թամար Կապրելյան-Ամերիկա, Վահե Թիլբյան-Աֆրիկա,  Մերի-Ջին Օ՛Դոհերթի Վասմաթզյան-Ավստրալիա, Ստեփանի Թոփալյան-Ասիա, Ինգա Արշակյան-Հայաստան:

Հայաստանը մրցույթին կներկայանա «Face The Shadow»երգով: Այս տարվա նշանաբանն է «Կառուցել կամուրջներ»:

Երգը համամարդկային արժեքների մասին է. սիրո,համերաշխության, հավատարմության, և իհարկե սերունդների ծագումնաանության՝ գենետիկայի: «Genealogy»-ն այս երգով աշխարհին հիշեցնում է, որ երջանկությունը ծնվում է, երբ մարդ հաշտ է ինքն իր հետ, զգացողությունների և ապրումների: Թեև սերունդները  փոխվում են, այնումենայնիվ, ծագումնաբանությունը մնում է  նույնը: Չէ որ սիրո և համերաշխության արժեքները մնայուն են:

«Ոգեշնչվել ենք անմոռուկի գաղափարով ու Եվրատեսիլի՝ կամուրջներ կառուցելու գաղափարով։ Այդ կամուրջները կազմում են մեր ամբողջ Հայաստանը։ Ինչ վերաբերում է երգի հաղորդագրությանը, ապա այն բազմիմաստ է, և յուրաքանչյուրը կարող է գտնել իրեն հարազատ իմաստը։ Երգը հասցրել է սիրվել եվրոպացի հանդիսատեսի ու սփյուռքահայերի կողմից»,-ասաց եվրատեսիլի հայաստանյան պատվիրակության ղեկավար Գոհար Գասպարյանը:

Ստեֆանին, Վահեն և  Մերի Ջին առաջին անգամ են հայրենիքում, և տպավորված են հատկապես մարդկանց բարությունից ու վերաբերմունից: Ասուլիսի ժամանակ խմբի անդամները ներկայացրին նաև,  թե որտեղից են սերում և ինչ պատմություն ունեն իրենց նախնիները: 

Հարցին, թե ինչպես են փնտրել ու գտել խմբի հինգ մասնակիցներին տարբեր աշխարհամասերից, Գոհար Գասպարյանը պատասխանեց. «Հեշտ չի եղել, բայց օգտագործվել ենք փնտրելու մի քանի միջոց: Առաջինը՝ ընկերն են ու ծանոթներն են, երկրորդը՝ համացանցն է։ Օրինակ` Եսայիին արդեն ճանաչում էինք, քանի որ մասնակցել էր Հանրային հեռուստաընկերության ծրագրերից մեկին։ Թամարը Հայաստանում բազմաթիվ երկրպագուներ ունի: Ավստրալիայի մասնակցի հարցում օգնել է երգչուհի Արաքս Մանսուրյանը։ Աֆրիկան ներկայացնող Վահեին գտել եմ համացանցով, մինչ այդ, նրա մասին չէի լսել։ Հայաստանյան մասնակցի ընտրությունը հեշտ եղավ, քանի որ Ինգա Արշակյանին բոլորը ճանաչում են որպես ազգային երգերը ներկայացնող երգչուհու, և նա սիրված է»,-ասաց նա։

Թեև որպես կանոն չեն բացահայտում շոուի հետ կապված մանրամասները, սակայն Գոհարն իր խոսքում նշեց, որ   բեմադրության մեջ օգտագործվել են  ազգային Էլեմենտներ, լուսային Էֆֆեկտներ, որը  կտպավորի հանդիսատեսին:

Խումբը խոստացավ, որ մրցույթից հետո չեն հեռանա միմյանցից, քանի որ արդեն հիանալի ընտանիք են դարձել և մրցույթին էլ պատրաստվում են ներկայանալ ոչ թե 6 հոգով, այլ 10 մլն-ով:

Հայաստանը  ներկայացնող Ինգա Արշակյանն էլ նշեց, որ քանի որ ինքն արդեն որոշակի չափով փորձառություն ունի, կանի ամեն ինչ, որպեսզի խումբը հաղթահարի խոչընդոտները:

 Հ.Գ. Հայրենիքի նկատմամբ սերն ու  հարգանքը  խմբի 6 անդամներն արտահայտում էին ոչ միայն իրենց ժեստերով ( հայրենիքի մասին խոսելիս պարբերաբար ձեռքը  դնում էին սրտին) , այլ հուզվում էին՝ աչքերի յուրահատուկ փայլով ու թախիծով: