Իմ նախնիներն այնքան խիզախ են եղել, որ ես պետք է հարգեմ նրանց՝ այդ հիշատակը փոխանցելով իմ աղջկան. Քիմ Քարդաշյանի` Time-ին տված հարցազրույցը

Ձեր ուշադրությանն ենք ներկայացնում Քիմ Քարդաշյանի` Time-ին տված հարցազրույցից հատված:

«Երբ մենք փոքր էինք, իմ հայրը հաճախ էր խոսում մեր ժառանգության մասին։ Դա մեր կյանքի մեծ մասն էր։ Մենք հայկական սնունդ էինք ուտում, պատմություններ էինք լսում, հայրս բացահայտ խոսում էր մեր պատմությունից։ Մեզ ասել էին, որ շատ հայեր տեղափոխվելով, հանել էին իրենց ազգանվան «յան» վերջավորությունը՝ վախենալով, որ նրանց կսպանեն։ Հայրս ասում էր.«Ինչ էլ անեք, աղջիկնե՛ր, երբեք չփոխեք ձեր Քարդաշյան ազգանունը»: Նա ցանկանում էր, որ մենք երբեք չմոռանանք, թե որտեղից ենք սերում։

Իմ  ապուպապերը Հայաստանից Լոս Անջելես են ժամանել 1914թ: Այդ ժամանակ Ցեղասպանությունը դեռ չէր սկսվել: Մենք Հայաստանում մնացած ընտանիք չունենք։ Եթե նրանք չփախչեին, այսօր մենք այստեղ չէինք լինի։ Միլիոնավոր մարդիկ ուղղակի կորցրել են իրենց ընտանիքները, իսկ պատմությունները, թե ինչպես են նրանց սպանել, երբեք չպետք է մոռացվեն։ 1.5 մլն մարդիկ դաժանաբար սպանվել են, և որևէ երկիր  ուղղակի կարող է ձևացնել, թե նման բան չի՞ եղել։ Ես կարծում եմ, որ դա ճիշտ չէ։

Իմ ընտանիքը շատ երկար ժամանակ ցանկացել  է վերադառնալ Հայաստան, սակայն այդպես էլ չի հաջողվել: Այս ամիս, Քլոեի, դստերս և Քանիեի հետ  ուղևորվեցինք Հայաստան։ Մենք արել ենք դա խնդրի վրա ուշադրություն հրավիրելու համար։ Հիմա ժամանակն է խոսել, քանի որ ամեն մի փոքր ներդրում կարող է օգնել։ Ես շարունակելու եմ հարցեր տալ և պայքարել Ցեղասպանության ճանաչման համար։ Կցանկանայի, որ ԱՄՆ նախագահ Օբաման օգտագործեր ցեղասպանություն  բառը։ Շատ հիասթափեցնող է, որ նա՝ որպես նախագահ, այդ բառը չօգտագործեց։ Մենք կարծում էինք, որ դա այս տարի կպատահի։ Զգում եմ, որ մենք մոտ ենք և  շարժվում ենք ճիշտ ուղղությամբ։

Եկել է ժամանակը, որ Թուրքիան ճանաչի Ցեղասպանությունը։ Դա այն մարդկանց մեղքը չէ, որոնք հիմա ապրում են այդ երկրում, այլ դա 100 տարի առաջ էր։ Չանել դա, նշանակում է անհարգալից վերաբերմունք ցուցաբերել։ Ես կիսով չափ եմ հայ, բայց ես մեծացել եմ հայի ինքնության ուժգին զգացողությամբ և ցանկանում եմ, որ իմ աղջիկը նույնպես ունենա դա։ Իմ նախնիները այնքան խիզախ են եղել, ես պետք է հարգեմ նրանց՝ այդ հիշատակը փոխանցելով իմ աղջկան»,- ասել է Քիմ Քարդաշյանը: