Սոնա Շահգելդյանը՝ Քիմ Քարդաշյանի և Քանյե Ուեսթի մասին
Ինչպես հայտնել էինք, Քիմ Քարդաշյանն ու Քանյե Ուեսթը իրենց դստեր հետ Իսրայելում են արդեն, սակայն Հայաստանում դեռևս շարունակվում են արձագանքները հայտնիների կողմից: Operativ.am-ի թղթակցի հետ զրույցում աստղային ընտանիքի մասին երգչուհի Սոնա Շահգելդյանը կիսվել է իր տպավորություններով:
-Ի՞նչ կարծիք ունեք Քարդաշյանների` Հայաստան այցելության մասին:
-Ես սիրում եմ այդպիսի զույգերի: Հատկապես, որ այդքան կարևոր ու բարի են լինում: Նրանց համեստությունը շատ գրավեց ինձ: Հիմա ավելի շատ եմ հետևելու, քանի որ շատ մեծ բան արեցին հայերիս համար: Նրանց շնորհիվ աշխարհն իմացավ Ցեղասպանության մասին: Ինչ վերաբերում է նրանց անձնականին, ապա դա ոչ մեկի գործը չէ: Ես չեմ ընդունում այդ քննադատությունները:
-Երկրպագու՞մ եք նրանց:
-Միշտ սիրել, հետևել եմ, բայց, որ ասեմ երկրպագում եմ կամ իմ կուռքն են, սուտ կլինի: Անկեղծ խոստովանում եմ, որ իրենց հարգում եմ: Մանավանդ, որ այդքան խենթ են: Ես սիրում եմ խենթ ու անկանխատեսելի մարդկանց:
-Ի՞նչ կարծիքի եք ՀՀ վարչապետի հետ հանդիպման և Քիմի ստացած նվիրատվության մասին:
-Ես միշտ լավն եմ ուզում գնահատել: Շատ ուրախ եմ, որ նա լինելով հայ, սակայն ապրելով Հայաստանից դուրս, իր արմատները չի մոռացել: Նա եկել է իր հայրենիք, ինչը նաև մեզ համար շատ լավ եղավ, վստահ եմ: Շատ հայեր ունենք, որ իրենց արմատները մոռանում են, իսկ այս դեպքում այս քայլը չգնահատել չի լինի:
-Քանյեի համերգի և պահվածքի մասին ի՞նչ կարծիքի եք:
-Նա շատ ճանաչված, կայացած, բայց միաժամանակ հասարակ մարդ էր: Խենթ, ինչը շատ կարևոր է արտիստի համար: Մարդը այդ պահին այդպես ցանկացավ և ցատկեց ջրի մեջ` առանց ավելորդ ձևականությունների: Անկեղծ ասած, ես էլ եմ այդպիսին: Միշտ ազատ եմ ու անկաշկանդ, երևի իմ համարձակությունն էլ հենց կարևոր դեր ունեցավ, որ ես Հայաստանին հաղթանակ բերեցի:
-Երբևե մտածե՞լ եք, որ արժե երգելու ժամանակ ցատկել ջրի մեջ:
-Ջրի մեջ ցատկել չեմ մտածել, բայց ձմռանը Կարապի լճում համերգի ժամանակ ես ռիսկով սահեցի, ու շարունակեցի այդպես երգել: Սիրում եմ խենթություններ:
- Ի՞նչ կասեք այն մասին, որ հայտնիները սկսեցին քննադատություններով հանդես գալ:
-Ամեն մարդ իր կարծիքն ունի, բայց ես չեմ ընդունում դա: Մեր շոուբիզնեսն այնքան քիչ է մնացել, որ չարժե վիճաբանություններ ունենալ, հարաբերություններ խզել: Չգիտեմ PR քայլ է եղել, թե ոչ, բայց նման բաներ չեմ սիրում: Ամեն մարդ թող հիշի, իր անցյալը, հետո քննադտի, վատաբանի դիմացինին: Մարդ պետք է հիշի որտեղից է եկել և ով է հիմա. Անցյալը մոռանալոց վատ բան չկա:
-Եթե մի օր համաշխահային փառք ձեռք բերեք, կփոխե՞ք Ձեր անուն ազգանունը, թե կշարունակեք հանդես գալ որպես Սոնա Շահգելդյան:
-Ինչի էլ որ ես հասնեմ, երբեք չեմ փոխի անունս, ազգանունս: Ինձ իմ երգով են սիրում, ես դրանով եմ ձեռք բերում հանդիսատեսի սերը:
-Կցանկանայի՞ք հանդիպել նրանց, ինչու չէ՝ նաև համատեղ ելույթ ունենալ:
Այո', շատ կցանկանայի: Ես այդ ոճում էլ կարող եմ երգեր կատարել: Թո'ղ նրանք էլ իմանան, որ Հաաստանում էլ ոչ պակաս տաղանդավոր երգիչ-երգչուհիներ կան: