Ավագանու ընտրություններում առաջադրված կուսակցությունների շանսերը գնահատում է Կարեն Քոչարյանը

Operativ.am-ի թղթակցի հետ զրույցում քաղտեխնոլոգ Կարեն Քոչարյանը խոսեց  Երևանի ավագանու ընտրություններում առաջադրված կուսակցությունների շանսերի մասին և նշեց, որ բացի «Առաքելություն» կուսակցությունից, մնացած բոլոր կուսակցություններն էլ հաղթելու շանսեր ունեն:

-Ես մատից հոտ քաշող չեմ, որ նշեմ, թե ինչքան ձայն կարող են ստանալ, այդ հարցը կարող եք պրն. Ադիբեկյանին ուղղել,- նշեց Քոչարյանը՝ այն հարցին, թե կուսակցությունները քանի տոկոս ձայն կարող են ստանալ:

ՀՀԿ-ականների այն տեսակետի հետ կապված, որ իրենք են հաղթելու են, և պայքարը գնալու է երկրորդ տեղի համար, քաղտեխնոլոգը պատասխանեց.

-Այնպես չէ, որ առաջին անգամ են դա նշում. ավանդույթները շարունակվում են:

Քոչարյանը չցանկացավ պատասխանել այն հարցին, թե ինչպես կգնահատի քաղաքապետ Տարոն Մարգարյանի պաշտոնավարումը:

Խոսելով առաջադրված կուսակցությունների և իրենց ցուցակը գլխավորած անձանց մասին՝ Քոչարյանը նշեց, որ ինքն արդեն վաղուց է, ինչ լուրջ չի ընկալում ՕԵԿ-ին, սակայն  Արմեն Երիցյանը լուրջ անձնավորություն է և ցույց է տվել, որ կարողանում է աշխատել:

-ԲՀԿ-ի ցուցակը  Վարդան Օսկանյանն է գլխավորում, սակայն հասկանալի է, որ իրենք ավելի շատ Գուրգեն Արսենյանին են տեսնում քաղաքապետի պաշտոնում, քանի որ Օսկանյանը դիվանագետ է, այլ ոչ թե գործադիր իշխանության ներկայացուցիչ,- նշեց Քոչարյանը:

Խոսելով «Ժառանգության» ցուցակի մասին՝ քաղտեխնոլոգը նշեց, որ «Ժառանգության» այդ կազմը՝ Արմեն Մարտիրոսյանը, Զարուհի Փոստանջյանը, Ստյոպա Սաֆարյանը, Անահիտ Բախշյանն ապացուցեցին, որ խորհրդարանական լավ գործիչներ են, սակայն որպես գործադիր մարմին չի պատկերացնում, թե ինչպիսին կարող են լինել, քանի որ նրանց չի տեսել  այդ պաշտոնում:

-Վահագն Խաչատրյանը աշխատել է որպես քաղաքապետ, այստեղ խնդիրն այն է, թե ՀԱԿ-ը որպես կուսակցություն 5-6%-ը կարող է հաղթահարել, թե ոչ,- ասաց Քոչարյանը՝ խոսելով ՀԱԿ կուսակցության ցուցակը գլխավորողի մասին:

Խոսելով ՀՅԴ-ի ցուցակի մասին Քոչարյանը նշեց, թե  ֆեյսբուքի իր էջում էլ է գրել, որ ՀՅԴ-ն շատ լավ ցուցակ է ներկայացրել, եթե չլինեին Արմեն Ռուստամյանն ու Աղվան Վարդանյանը:

-Գալիս են նստում  ու մոռանում են, որ արդեն ծերացել են, փչացել են, որ արդեն իրենց չի ընկալում ընտրողը, դա բոլորին է վերաբերում և՛ ՀՀԿ-ին, և՛ ՀՅԴ-ին, ա'յ, երբ երիտասարդները պայքարի դուրս գան, շատ հնարավոր է, որ այլ պատկեր ստացվի, ՀՅԴ-ի կորիզը կառչած է բյուրոյից, հնարավոր է, որ իրենք չլինեն բյուրոյում և ՀՅԴ-ի վարկանիշը նորից բարձրանա, քանի որ մեր երկրում ՀՅԴ-ն ամեն դեպքում պետք է,- ասաց Քոչարյանը:

Զրուցեց Սեդա Ղուկասյանը