Երազում եմ, որ աշխարհի բոլոր երեխաները առողջ լինեն. երգիչ Արման Սիմոնյան
2014 թվականն իր տեղը զիջեց 2015 թվականին: Ոմանց համար 2014-ը հաջողակ, իսկ ոմանց համար՝ պարզապես սովորական տարի էր: Operativ.am-ի թղթակիցն Ամանորի հետ կապված, երազանքների, մտադրություների ու նախասիրությունների մասին զրուցել է երգիչ, և արդեն հաղորդավար Արման Սիմոնյանի հետ:
-Ո՞րն է 2014-ի Ձեր ձեռքբերումը:
2014-ն ինձ համար, իսկապես, ձեռքբերումների տարի եղավ:
2014թ-ի «Կովկաս» միջազգային մրցույթում դասական երգով գրավել եմ առաջին պատվավոր տեղը՝ արժանանալով ոսկե մեդալի:
Մասնակցել եմ նաև «Վերածնունդ» միջազգային մրցույթ-փառատոնին, որտեղ զբաղեցրել եմ երկրորդ տեղը և արժանացել ժյուրիի համակրանքին:
Էլինա Չոլախյանի հետ դուետով հանդես եկանք «Մանկական եվրատեսիլ 2014»-ի հայաստանյան ընտրական փուլին՝ «Տիեզերք» երգով:
Ինձ համար կարևոր է նաև այն, որ նոյեմբերին վերապատրաստվեցի Իգոր Կրուտոյի ակադեմիայում, որտեղ ստացա պատվոգիր և ոսկե մեդալ:
Երգից բացի, սկսեցի հաղորդավարությամբ զբաղվել և վարում եմ «Sweet Baby» մանկական հաղորդաշարը:
Մասնակցել եմ բարեգործական և այլ համերգային ծրագրերի:
-Ամանորյա Ձեր ամենասիրած նվերը:
Ձմեռ պապիկի նվերը:
-Որտե՞ղ և ու՞մ հետ եք սիրում դիմավորել Ամանորը:
Ընտանիքիս հետ, Ծաղկաձորում, քանի որ ես ձյուն շատ եմ սիրում և անհամբեր սպասում եմ, թե երբ եմ սահելու:
-Հայաստանում ինչպե՞ս կցանկանայիք նշվեր Ամանորը:
Այնպես, ինչպես նշվում է, լավ է:
-Հավատու՞մ եք Ձմեռ պապիկին:
Այո, ես ուզում եմ հեքիաթը շարունակվի:
-Ի՞նչ եք ակնկալում 2015-ից:
Խաղաղություն հայրենիքիս, և առաջընթաց իմ կարիերայում. նոր երգեր, տեսահոլովակներ:
-Ամանորյա Ձեր սիրած կերակուրը:
Հնդկահավ և խոզի բուդ:
-Ի՞նչ չհասցրիք իրականացնել 2014-ին:
Կարծում եմ ամեն բան իր ժամանակին հասցրել եմ:
-Ի՞նչ կմաղթեք հայ ժողովրդին:
Խաղաղություն, և որ իմ ազգը աշխատելու համար ստիպված չլինի լքել իր հայրենիքը:
-Երազանք, որ դեռևս չի կատարվել:
Շնորհակալ եմ Աստծուն, նա իմ բոլոր երազանքները իրականացրել է: Իսկ Հիմա երազում եմ, որ աշխարհի բոլոր երեխաները առողջ լինեն:
-Ո՞վ է Ձեր Ձմեռ պապիկը:
Հայրս:
-Գույներ, որ Ձեզ Ամանոր են հիշեցնում:
Կարմիր, սպիտակ:
-Եթե Ձմեռ պապիկ լինեիք….
Այնպես կանեի, որ կարիքավոր և հիվանդ մարդիկ չլինեն, բայց առաջին հերթին երեխաներին կառողջացնեի:
-Յուրաքանչյուր Նոր տարի ի՞նչն է, որ մշտապես Ձեր սեղանին է:
Հնդկահավը, ես այն շատ եմ սիրում:
Ո՞րն է Ձեր ամենասիրելի տոնը:
Սուրբ Ծնունդը և հունիսի 1-ը:
***
Դերասան Հովհաննես Բաբախանյանի հարցը ուղղված երգիչ Արման Սիմոնյանին (դերասանը չգիտեր, թե ում է ուղղում հարցը)
-Եթե հրաշքով հանդիպեք Ձմեռ պապին, ի՞նչ կխնդրեք:
Արման Սիմոնյան.Կխնդրեի, որ նա բարություն սփռի ամբողջ աշխարհում:
Operativ.am-ը շնորհավորում է փոքրիկ երգչին և մաղթում հաջողություններ:
Կարինե Գևորգյան