Թող Աստված գթասիրտ գտնվի Արարատի փեշին ծվարած փոքրաթիվ, բայց մեծ ազգիս նկատմամբ. Հովհաննես Բաբախանյան

2014 թվականն իր տեղը զիջեց 2015 թվականին: Ոմանց համար 2014-ը հաջողակ, իսկ ոմանց համար պարզապես սովորական տարի էր: Operativ.am-ի թղթակիցն Ամանորի հետ կապված, երազանքների, մտադրություների ու նախասիրությունների մասին զրուցել է դերասան Հովհաննես Բաբախանյանի  հետ:

-Ո՞րն է 2014-ի Ձեր ձեռքբերումը:

2014-ի ամենամեծ ձեռքբերումս ամերիկյան թատրոնում, ամերիկացի հանդիսատեսի առաջ անգլերենով ներկայացում խաղալն էր:Ուզում եմ առանձնացնել  «Congressman Adam Schiff» -ի պաշտոնական շնորհավորանքը և  «Assembly Mike Gatto»-ի պաշտոնական  գրավոր ուղերձը, որոնք գնահատել են   վերջին տարիների իմ ստեղծագործական աշխատանքներն ԱՄՆ-ում: Ավելացնեմ նաև  «Eugene Sidney»-ի կողմից շնորհված մրցանակս, որը ստացա դեկտեմբերի 28-ին. տարին փակվեց գեղեցիկ ու գնահատված:

-Ամանորին Ձեր ամենասիրելի նվերը, որ կցանկանաք ստանալ:

Այն անակնկալը, որ խնամքով և սիրով փաթեթավորված դրված է տոնածառի տակ:

-Որտե՞ղ և ու՞մ հետ եք սիրում դիմավորել Ամանորը:

Ամենուրեք, բայց ընտանիքիս հետ:

Ինչպե՞ս  է Ամանորը նշվում ԱՄՆ-ում:

Շատ զուսպ, քանի որ ԱՄՆ-ում դեկտեմբերի 25-ին Սուրբ  Ծնունդն է մեծ շուքով նշվում:

-Հայաստանում ինչպե՞ս կցանկանայիք նշվեր Ամանորը:

Այնպես, ինչպես նշվում է: Յուրաքանչյուրն իր մշակութային մոտեցումն ունի, և բոլորն էլ  գեղեցիկ և յուրովի են իրենց ձևի մեջ:

-Հավատու՞մ եք Ձմեռ պապիկին:

Իհարկե, անկասկած:

-Ի՞նչ եք ակնկալում 2015-ից:

Առողջություն, երջանկություն և ստեղծագործական հաջողություններ:

 -Ամանորյա Ձեր սիրած կերակուրը:

Չիր, չամիչ ու չարազ, սրանք կարծես խորհուրդ ունեն:

-Ի՞նչ չհասցրիք իրականացնել 2014-ին:

Շատ են թվարկելու համար, սակայն հուսամ 2015-ին դրանց մի մասը կիրականանան:

-Երազանք, որ դեռևս չի կատարվել:

Կյանքում, աշխատանքում և մարդկային հարաբերություններում հասնել կատարելության:

-Ո՞վ է ձեր Ձմեռ պապիկը:
Հիմա արդեն իմ բալիկներն են Լիանը, Էլլան և Գոռը: Նրանք ամեն ինչ անում են, որ ես ու Մարին մեզ սիրված և գնահատված զգանք Ձմեռ պապիկի կողմից:

-Գույներ, որ Ձեզ Ամանոր են հիշեցնում:
Կանաչ, կարմի, ոսկեգույն:

-Եթե Ձմեռ պապիկ լինեիք, ապա...

Նվերներ  կհանձնեի ամբողջ աշխարհին: Գեղեցիկ ու հաճելի պարտավորվածություն՝ չէ, որ բոլորն արդեն քո թոռնիկներն են, անկախ տարիքից, իսկ դու բարի ու առատաձեռն Ձմեռ պապը:

-Յուրաքանչյուր Նոր տարի ի՞նչն է, որ մշտապես Ձեր սեղանին դրվում է:

Նախ Աստվածաշունչը, որովհետև աղոթքով ենք, ճանապարհում հին, ու դիմավորում Նոր տարին: Ուտեստներից՝ ընկույզն ու չամիչը:

-Ո՞րն է Ձեր ամենասիրելի տոնը:

Բոլոր տոներն էլ սիրում եմ, քանզի տարբեր են  իրեց խորհրդով և նշանակությամբ: Ամանորը հենց տարեմուտ է, նոր կյանքի սկիզբ և շարունակվում է Հիսուսի ծնունդով, Տիառն ընդառաջով, Բարեկենդանով և այս ոսկեզօծ շղթան  շարունակվում է մինչև Սուրբ Զատիկ: Ամանորն ինձ համար տոնաշխարհի սկիզբն է:

-Ի՞նչ կմաղթեք հայ ժողովրդին:

Իմ ժողովրդին մաղթում եմ խաղաղություն և պայծառ ապագա: Թող Աստված գթասիրտ գտնվի Արարատի փեշին ծվարած փոքրաթիվ, բայց մեծ ազգիս նկատմամբ:

Operativ.am-ը շնորհավորում է դերասանին և մաղթում նոր հաջողություններ:

Կարինե Գևորգյան