Եկե՛ք տոն դառնանք մեր սիրելիների համար, իսկ ուտեստները կսպասեն. Անկա
2014 թվականն իր տեղը զիջեց 2015 թվականին: Ոմանց համար 2014-ը հաջողակ, իսկ ոմանց համար պարզապես սովորական տարի էր: Operativ.am-ի թղթակիցն Ամանորի հետ կապված երազանքների, մտադրություների ու նախասիրությունների մասին զրուցել է ռադիոհաղորդավարուհի Անկայի հետ:
-Ո՞րն է 2014-ի Ձեր ձեռքբերումը:
2014-ին ձեռքբերումներս շատ են: Բազմաթիվ նախագծերի եմ մասնակցել: Նաև, թե՛ մշակութային, և թե՛ հասարակական կյանքում ձեռքբերում եմ համարում այն մարկանց, ովքեր ինձ հետ են:
-Ամանորյա Ձեր ամենասիրած նվերը:
Ինձ նվեր մատուցողները գիտեն, որ սիրում եմ, երբ դրանք կրեատիվ են և սիրով են նվիրված: Արժեքը էական չէ:
-Որտե՞ղ և ու՞մ հետ եք սիրում դիմավորել Ամանորը:
Մասնագիտությանս առումով շատ երկար տարիներ Ամանորը դիմավորում եմ բեմում՝ շոուի շրջանակներում: Թեպետ Ամանորն ընտանեկան տոն է, և ես շատ եմ կարոտում այն պահերը, երբ միասին էինք անցկացնում Ամանորը, բայց պետք է նշեմ, որ աշխատավայրում ևս հետաքրքիր է: Մարդիկ վայելում են մեր կողմից ներկայացված շոուն, և տարին սկսվում է բուռն:
-Հայաստանում ինչպե՞ս կցանկանայիք նշվեր Ամանորը:
Ես ցանկանում եմ, որ հայրենակիցներս տոնն ուտելու չդարձնեն և քաղաքավարության զոհ չդառնան՝ ինչպես Պարոնյանի հերոսը: Ամանորը մեր ուրախությամբ պետք է տոն դառնա: Եկե՛ք տոն դառնանք մեր սիրելիների համար, իսկ ուտեստները կսպասեն:
-Հավատու՞մ եք Ձմեռ պապիկին:
Այո, նրա հրաշքներն ինձ համար շատ են, ու թեև ես նրան այլ անվանում եմ տալիս, բայց Ամանորին նա իմ Ձմեռ պապիկն է:
-Ի՞նչ եք ակնկալում 2015-ից:
2015-ին շատ եմ սպասել. գիտեմ, որ գերզբաղված ու երջանիկ տարի է լինելու: Ուղղակի պետք է հավատալ երազանքներին, նրանք կատարվելու բնավորություն ունեն:
-Ամանորյա Ձեր սիրած կերակուրը:
Այն ամենն ինչ պատրաստում են մայրս ու տատիկս: Նրանք ֆանտաստիկ են խոհանոցում: Այս տարի ես դարձել եմ բուսակեր, և չեմ համտեսել իմ սիրելի ուտեստները:
-Ի՞նչ չհասցրիք իրականացնել 2014-ին:
Չհասցրի մեկնել հանգստի: Օրս սկսվել է առավոտյան 9-ին և վերջացել գիշերվա 4-ին: Եթերներ, համերգներ, շոուներ. մաքսիմալ ուժերս ներդրել եմ իմ սիրելի RADIO JAN-ում աշխատանքիս: Այն ինչ չեմ հասցրել, կիրականացնեմ 2015-ին:
-Ի՞նչ կմաղթեք հայ ժողովրդին:
Ուզում եմ, որ մեր երկրի դարպասները խաղաղ լինեն: Բոլորս երջանիկ լինենք ու սիրով լեցուն: Լինենք հանդուրժող և անդավաճան:
-Երազանք, որ դեռևս չի կատարվել:
Երազանքներ շատ կան: Ես երկար երազողներից չեմ: Գիտեմ մի պարզ բան. ամեն ինչ սկսվում է երազանքից, վազի՛ր նրա հետևից: Երազում եմ՝ չկորցնել երազելու ունակությունս:
-Ո՞վ է Ձեր Ձմեռ պապիկը:
Ես շատ Ձմեռ պապիկներ ունեմ, ովքեր միշտ իմ կողքին են կյանքիս ամենածանր պահերին: Ես անգամ ամռանը կարող եմ նրանց Ձմեռ պապ անվանել: Իսկ առաջին հերթին իմ Ձմեռ պապը եղբայրս է՝ շատ կարևոր մարդ իմ կյանքում:
-Գույներ, որ Ձեզ Ամանոր են հիշեցնում:
Բոլոր վառ և գունառատ գույները, իսկ ամենասիրելի գույնն ինձ համար կարմիրն է:
-Եթե Ձմեռ պապիկ լինեիք….
Ես ձյունանուշի կերպարով էլ կարող եմ աշխարհին մաղթել խաղաղություն, որը գնալով ամենակարևորն է դառնում:
-Յուրաքանչյուր Նոր տարի ի՞նչն է, որ մշտապես Ձեր սեղանին է:
Բոլոր ուտեստներից զատ՝ աղն ու հացը:
-Ո՞րն է Ձեր ամենասիրելի տոնը:
Սուրբ Զատիկը. այդ օրն ընտանիքիս բոլոր անդամները նվերներ են ստանում իմ կողմից:
***
Աշխարհի եռակի ռեկորդակիր Դավիդ Ֆահրադյանի հարցը ուղղված հահաղորդավարուհուն: (մարզիկը չգիտեր, թե ում է ուղղում հարցը)
-Ո՞ր տոնն է Ձեզ համար ավելի կարևոր կամ առաջնահերթ, Ամանո՞րը, թե Սուրբ Ծնունդը:
Անկա. Իհարկե, որպես հավատացյալ քրիստոնյա՝ Սուրբ Ծնունդը: Չեմ ուզում համեմատել, քանի որ դրանք տարբեր կետերում են: Ինձ համար ամենակարևորը տոնին հավատով և սիրով պատրաստվելն է: Ինչպես ասվում է՝ Աստծո խոսքի համար լավագույն պահեստը սիրտն է:
Թո՛ղ տոնառատ լինեն բոլորիս սրտերը:
Operativ.am-ը շնորհավորում է հաղորդավարուհուն և մաղթում հաջողություններ:
Կարինե Գևորգյան