Մասնագիտական առումով, ձեռքբերումը միջազգային մրցույթներին իմ ներկայացրած հայաստանյան ներկայացուցիչների հաղթանակներն էին. Սերգեյ Գրիգորյան

2014 թվականն իր տեղը զիջեց 2015 թվականին: Ոմանց համար 2014-ը հաջողակ, իսկ ոմանց համար պարզապես սովորական տարի էր: Operativ.am-ի թղթակիցն Ամանորի հետ կապված, երազանքների, մտադրությունների ու նախասիրությունների մասին զրուցել է երգիչ Սերգեյ Գրիգորյանի հետ:

-Ո՞րն է 2014-ի Ձեր ձեռքբերումը:

2014-ը մի շարք կորուստների տարի էր, թեև, ինձ համար ամենագլխավոր ձեռքբերումը դա սիրո առկայությունն է, որն ինձ երջանկացնում և հանգստություն է պարգևում: Մասնագիտական առումով, ձեռքբերումը միջազգային մրցույթներին իմ ներկայացրած հայաստանյան ներկայացուցիչների հաղթանակներն էին:

Ամանորյա Ձեր ամենասիրած նվերը:
Նվերներ շատ եմ ստանում, և որքան օրիգինալ և ինձ համար հաճելի, պետքական են դրանք, այնքան՝ ստացված եմ համարում: Սիրում եմ լավ ընտրված, ինձ հետ կապ ունեցող և  հարկավ, արժանվույնս գնահատված նվերներ ստանալ (չափն ու արժեքը կարևոր չեն), նույն կարգախոսով առաջնորդվում եմ որևէ մեկի համար նվեր ընտրելիս:

Որտե՞ղ և ու՞մ հետ եք սիրում դիմավորել Ամանորը:
Ամանորն, իհարկե, ընտանեկան տոն է  և  այն պետք է ընտանիքի և  տան պայմաններում դիմավորել: Այնպես է ստացվել, որ ինձ ոչ միշտ է հաջողվում այս տոնն իմ ուզած ձևաչափով դիմավորել, սակայն ճոխություններ, ալկոհոլային երեկույթներ և այլ կեղտոտություններ այդ գիշեր չեմ ընդունում: Սա հրաշքի հետ կապ ունեցող խորհուրդներով լի տոն է, ուստի այն պատշաճ ուշադրության, ջերմության, հարմարավետության և  հարգանքի է արժանի: Հաճախակի դիմավորում եմ ընկերական շրջապատում, պատահել է նաև՝ միայնակ, տանը:

Հայաստանում ինչպե՞ս կցանկանայիք նշվեր Ամանորը:
Հակիրճ և ուղիղ պատասխան՝ ոչ ՛չտեսավարի: Կարծում եմ այս արտահայտությունից բխող մնացած հանգամանքներն ու իրականությանը քաջատեղյակ է Հայաստանում բնակվող ցանկացած քաղաքացի:

Հավատու՞մ եք Ձմեռ պապիկին:
Հավատում եմ, երբ կյանքում գոյություն ունի որոշակի մի անձ, որը կարող է այդ օրը երկրորդ անձի համար Ձմեռ պապիկ կամ Ձյունանուշիկ լինել:

Ի՞նչ եք ակնկալում 2015-ից:
Այծային բարություն, համառություն և  խաղաղասիրություն՝ բնականի և  վառի ուղեկցությամբ: Մնացած ակնկալիքները յուրաքանչյուր տարի կախված են միայն մեզանից, մեր նպատակասլացությունից և  մեր ունեցած հնարավորություններից:

Ամանորյա Ձեր սիրած կերակուրը:
Կերակուրը կարելի է պատրաստել միշտ և  ուտել անկախ տոնի պատկանելիությունից: Սիրում եմ համեղ կերակուր, բացառությամբ գառան մսի և այլ տհաճ հոտերով մթերքների:

Ի՞նչ չհասցրիք իրականացնել 2014-ին:
Ինչը, որ չեմ պլանավորել, ինքն իրեն իրականացել է: Ըստ բնավորությանս, եթե իմ առաջ խնդիր կա կամ նպատակ, անկախ տարուց, աշխատում եմ ցանկացած գնով իրականացրել այն: 2014-ը բացառություն չէր:

Ի՞նչ կմաղթեք հայ ժողովրդին:
Համարձակություն...խելացիություն....առաջ շարժվելու ցանկության իրականացում:

Երազանք, որ դեռևս չի կատարվել:

Մի շարք նպատակներ կան, որոնց պետք է հասնել, բայց ամեն ինչն իր ճիշտ ժամանակին թող լինի:

Ո՞վ է ձեր Ձմեռ պապիկը
Առաջին հերթին՝ ես, մնացած դեպքերում միշտ անակնկալ է լինում, թող այդպես էլ լինի, ինձ դա դուր է գալիս:

Գույներ, որ Ձեզ Ամանոր են հիշեցնում:
Կանաչի, կարմիրի, նարնջագույնի և սպիտակի միքսը:

Եթե Ձմեռ պապիկ լինեիք….
Ես իմ ուժերի չափով բարեգործություն եմ անում, կշարունակեի նույնպես: Մեծ հաճույքով կապրեի Լապլանդիայում:

Յուրաքանչյուր Նոր տարի ի՞նչն է, որ մշտապես Ձեր սեղանին է:
Մանդարինը պարտադիր է, մնացածն ըստ տարվա տրամադրության և մենյուի:

Ո՞րն է Ձեր ամենասիրելի տոնը:

Սուրբ Ծննդյան տոն, Գոհանակության օր (ամերիկյան՝ ThanksGiving):

***

Զինվոր Վարշամ Ասուլյանի հարցը երգիչ Սերգեյ Գրիգորյանին (զինվորը չգիտեր, թե  ում է ուղղում հարցը)

Եթե ունենաք հնարավորություն ՝զինվորին  Ամանորին տուն ուղարկել, կամ ընտանիքով անմոռանալի տոն անցկացնել Դուբայում, ո՞րը կընտրեք, և ինչու՞:

Սերգեյ.Գրիգորյան.Բնականաբար, պատասխանը ենթադրում է՝ հայրենասիրություն և  հոգացություն ցուցաբերել, սակայն ես ռեալիստ մարդ եմ. անկախ այն ամենից՝ ինչ կա իմ սրտում,  հակասական հարց է: Անձնական գրպանի և Կառավարության հոգացության հարց: Հստակ չեմ կարող պատասխանել, դա կախված է կոնկրետ պահի հանգամանքներից:

Operativ.am-ը շնորհավորում է երգչին և մաղթում նրան հաջողություններ:

Կարինե Գևորգյան