Ինձ համար Ձմեռ պապը միայն կարմիր հագուստով և սպիտակ մորուքով մեծ մարդը չէ. Ալբերտ Բոյադջիան (լուսանկարներ)
Շատերի պնդմամբ չկա ավելի գեղեցիկ տոն, քան նոր տարին է: Այս կարծիքը կիսում է նաև մեր զրուցակից ազգությամբ հայ հայտնի երաժիշտ, պարող և պարուսույց Ալբերտ Բոյաջյանը, ով բնակվում է Լիբանանում: Վերջինս մեզ հետ զրույցում կիսվեց ամանորյա իր հետաքրքիր հուշերով և հիշողություններով:
-Ի՞նչ ձեռքբերումներ եք ունեցել այս տարի և ի՞նչ եք ակնկալում 2015-ից:
-Այս տարի ես ճանապարհորդեցի և եղա այն երկրներում, որոնցում չէի եղել և այն վայրերում, ուր վաղուց էի պլանավորում գնալ: Այս տարի ես հավաքեցի իմ խումբը, որն ավելի մոտ է կանգնած հանրությանը և տեղավորվում է տարբեր ժանրերի և թեմաների մեջ, ինչպես նաև մասնակցեցի նոր շոուների: Ես նաև որոշ նոր աստղերի «Star Academy»-ում սովորեցրի հարվածային գործիքներ նվագել: Երբ նրանք առաջին անգամ ելույթ ունեցան հանրության առաջ, ես շատ հպարտ էի զգում: Ես նրանց համար առաջին երկրպագուն եմ դարձել: Ինչ վերաբերում է 2015-ին, ապա ես հույս ունեմ այս տարի ավելի ընդլայնել իմ աշխարհագրական ճանաչումը և ձեռք բերել երկրպագուներ աշխարհի տարբեր մասերում: Գուցե նոր երգեր թողարկեմ և ավելին, բայց փակագծերը շատ չեմ բացի: Հստակ կարող եմ ասել, որ գալիք տարում նոր երկրներում շոուներ կունենամ և մոտ կլինեմ երկրպագուներիս:
-Ո՞րն է եղել Ամանորին ստացած Ձեր լավագույն նվերը:
-Ընտանիքս: Ես չեմ կարող մտաբերել ավելի լավ նվեր, քան ընտանիքս է, նրանց անսահման աջակցությունը: Նրանք միշտ եղել են իմ համար առաջին երկրպագուները: Ես երջանիկ եմ, որ առողջ եմ, ունեմ երկրպագուներ, ովքեր հետևում են ինձ սոցցանցերով և օգնում են ինձ իմ արվեստն ավելի լավը դարձնել: Սրանից լավ նվեր չկա:
-Ի՞նչ հետաքրքիր պատմություն կարող եք հիշել Ամանորի հետ կապված
-8 տարի առաջ Ամանորն ընտանիքիս հետ չէի դիմավարում: Իմ աշխատանքային գրաֆիկը շատ ծանրաբեռնված էր տարվա այդ հատվածում: Բարեբախտաբար ընտանիքս ինձ հասկացավ` ակնկալելով, որ հաջորդ տարիները միասին կանցկացնենք:
-Հավատո՞ւմ եք Ձմեռ պապիկին:
-Այո, իհարկե: Ես արդեն գրել եմ իմ նամակը և այս տարի լավ տղա եմ եղել, անգամ կաթ ու թխվածք եմ թողել նրա համար: Իրականում ինձ համար Ձմեռ պապը միայն կարմիր հագուստով և սպիտակ մորուքով մեծ մարդը չէ: Այս տոնի ամբողջ ոգին հոգ տանելն է այն մարդկանց մասին, ովքեր դրա կարիքն ունեն, հատկապես վատառողջների, աղքատների, որբերի, տարեցների, անտունների և իհարկե կենդանիների: Պետք է մեծահոգի լինել նրանց հանդեպ. սա Ձմեռ պապը հաստատ կգնահատի:
- Ի՞նչ կմաղթեք մեր ընթերցողներին:
-Սիրելի ընթերցողներ և երկրպագուներ ես անչափ շնորհակալ եմ ձեր աջակցության համար և միշտ կանեմ ուժերիս ներածին չափով ամեն ինչ ձեզ անմոռանալի ակնթնարթներ պարգևելու համար: Ես մաղթում եմ, որպեսզի դուք այնպիսի պահեր ունենաք ձեր կյանքում, որ ամեն օր ինքներդ ձեզ ասեք` «Դու հիասքանչ ես»: Ես ցանկանում եմ ձեզ այն, ինչ դուք ինքներդ եք կամենում, քանի որ դուք ինձանից լավ գիտեք` ինչ է ձեզ պետք, իսկ իմ կողմից ձեզ մաղթում եմ` առողջություն, սեր և համբերություն: Առանց սիրո դուք կկորցնեք ձեր հանգիստը, սերը պետք է ապրելու համար, իսկ համբերությունը` անելու համար այն, ինչ սիրում եք: Առանց սիրո դուք կհիվանդանաք և չեք կարող անել, այն ինչ չեք սիրում և տեսնել մարդկանց, որոնց չեք սիրում: Առանց համբերության ամեն ինչ մռայլ կդառնա: Այնպես որ, այս երեքը պետք է միասին լինեն, և ես մաղթում եմ որպեսզի դուք դրանց միասնությունն ունենաք ձեր կյանքում:
Operativ.am-ը շնորհավորում է Ալբերտ Բոյադջիանին և մաղթում նոր հաջողություններ՝ 2015 թվականին:
Վարդուհի Ստեփանյան