Շոու բիզնեսի ներկայացուցիչները՝ մարդու իրավունքների ոտնահարման մասին
Մարդու իրավունքներն այն իրավունքներն են, որոնք մարդ արարածն ուներ հազարավոր տարիներ առաջ և նույն կերպ ունի նաև մեր օրերում: Այդ իրավունքները մարդը ստանում է իր աշխարհ գալու օրից և դրանք կրում մինչև մահ: Այդ իրավունքները տրված են միայն մարդ արարածին: Այն տրվում է ի վերուստ:
Մեր նախորդ նյութում ձեզ էինք ներկայացրել տարբեր բնագավառի ներկայացուցիչների կարծիքն այն մասին, թե Հայաստանում մարդու ո՞ր իրավունքներն են ոտնահարված և ո՞ր իրավունքի պաշտպանության հետ կապված է դրական շարժ տեղի ունեցել: Operativ.am-ի թղթակիցը զրուցել է նաև շոու բիզնեսի ներկայացուցիչների հետ, ովքեր իրենց կարծիքն են հայտնել այս մասին:
Սերգեյ Գրիգորյան-Մարդու ազատության իրավունքն իր բոլոր ֆակտորներով ոտնահարված է: Դրական ոչ մի տեղաշարժ չեմ նկատի, քանի դեռ կա բարեկեցության պակաս, գործազրկություն, և բարոյական կրիմինալը: Այդ բոլորը նպաստում են արտագաղթին:
Սուրեն Թադևոսյան- Ոտնահարվում է ընտրության ազատությունը:Մարդիկ դրված են շրջանակների մեջ: Քչերն են, որ կարող են ընտրել իրենց սիրած աշխատանքը, զբաղմունքը, առօրյան, որից էլ կախված են մի շարք հանգամանքներ: Դրական մի փոքր տեղաշարժ եմ նկատում խոսքի ազատության մեջ, որը սակայն միշտ չէ, որ անպատիժ է մնում:
Խաչիկ Եղոյան- Իմ կարծիքով՝ ամենաշատը Հայաստանում խախտվում է մարդու ընտրական իրավունքը: Իմ գիտակցական տարիքից սկսած ես չեմ հիշում Հայաստանում անցկացված որևէ ընտրություն, որն անցել է արդար և թափանցիկ:
Բագիրա Բաղդասարյան-Բոլոր իրավունքները ոտնահարվում են: Նայած թե ով և ինչ աստիճանի է թույլ տալիս: Մենք՝ հայերս սիրում ենք առաջնորդ լինել:
Անի Քոչար- Մեծ ցավով պետք է նշեմ, որ մարդու իրավունքները մեր երկրում պաշտպանված չեն, ավելին շատերն անգամ իրենք չգիտեն իրենց իրավունքները, որպեսզի կարողանան նաև իրենց պաշտպանել կամ համապատասխան տեղերում պահանջել իրավունք կամ օրենք: Իրավագիտակցությունը ցածր մակարդակի է մեր պետությունում, քաղաքացի տեսակը մարդու լիովին ձևավորված չէ, մարդիկ հավատում են ծանոթ բարեկամի զորությանը և ամեն բան լուծվում է այդ մակարդակում և ոչ օրինական հարթությունում: Սկսած հաշմանդամություն ունեցող մարդկանց իրավունքներից և շահերից, ավարտած հղի կանանցով և երեխաներով, ինչու ոչ ծերերով և ազատամարտիկներով և բոլոր մարդկանցով, որևէ մեկի իրավունքը մեր երկրում պաշտպանված չէ: Մեր երկրում դեռևս արդիական է «տերովին տերն է տարել, անտերին գելն է տարել» ասացվածքը: Էլ ինչ իրավունքի մասին է խոսքը: Ցավոք, ով էլ պայքարում է հանուն իրավունքի և օրենքի գերակայության, նա իր ճանապարհին միայն փշեր ու տատասկներ է հանդիպում:
Գաբի Գալոյան- Ազատ պայքարելու իրավունքը ոտնահարված է, իսկ խոսքի ազատության իրավունքը քիչ թե շատ դրական տեղաշարժ ունի:
Զառա Սահակյան- Իմ խորին համոզմամբ, մենք բոլորս պետք է պայքարենք յուրաքանչյուր մեր իրավունքի համար, և եթե շարունակենք թույլ տալ, խախտողներն էլ չեն ուշանա: Քաղաքացու իրավունքները, ընտրողի իրավունքները:Ամեն քայլափոխի կարելի է հանդիպել մարդու իրավունքի ոտնահարման: Միակ դրական տեղաշարժը կարող եմ համարել 150 դրամի դեմ պայքարի հաղթանակը: Քանի դեռ մենք բոլորս միասին չպայքարենք, հայ ազգը բաժանվելու է մասերի, և դժվար թե իրավունքի պահանջներ ներկայացնեն:
Հ.Գ.Այս ամենից կարելի է ենթադրել, որ մարդու իրավունքները հնարավոր չէ վաճառել, տալ վարձով, կամ նվիրել: Մարդ արարածն ի զորու չէ ինքնակամ կամ ստիպողաբար բաժանվել այդ իրավունքներից:Մարդ ծնվում է ազատ և պետք է ապրի ազատ:
Կարինե Գևորգյան