Չարենցի հալածանքների, նրա ստեղծագործությունները գրաքննության ենթարկելու և կյանքի դրվագների մասին պատմում է գրականագետը

Այսօր Չարենցի հիշատակի օրն է, որին ընդառաջ լրագրողների հետ հանդիպման ժամանակ գրականագետ Դավիթ Գասպարյանն անդրադարձավ գրողի կյանքի որոշ իրադարձությունների:

«Մինչև 1935 թվականը Չարենցի վիճակը բավականին լավ էր, մինչդեռ, 35-ից հետո նրա վիճակը վատթարանում է, որովհետև նրա հանդեպ հալածանքներ և հարցաքննություններ են սկսվել: Չարենցն ուզում էր Գրողների միությունից հեռանալ, ասելով, որ եթե սա է գրողների վիճակը, ապա ինքը չի ուզում նման վիճակում շարունակել մնալ: Ի վերջո Չարենցին հեռացնում են Գրողների միությունից: Շուտով Չարենցը կրկին վերականգնվում է միությունում, բայց արդեն իսկ զրկված էր որոշ արտոնություններից»,-նշեց բանախոսը:

Ըստ գրականագետի՝ սրա պատճառն այն է, որ 1935 թվականին «Գիրք ճանապարհին»-ը արգելափակվեց, քանի որ անգամ մինչև Ստալին հասավ: Վերջինս, կարդալով պոեմը, ԽՍՀՄ գրաքննիչի միջոցով պատասխան էր ուղարկել Չարենցին, որում ասվում էր, որ որպես գեղարվեստական գործ լավ է մտածված, բայց հեղինակը թող դեռևս զերծ մնա գիրքը հրատարակելուց: Արդյունքում գրքում եղած որոշ գործեր դուրս մնացին գրքից:

«1936 թվականի օգոսոստի 9-ը մեր ժամանակի 1915 թվականի ապրիլի 24-ն է: Այս օրերին ողջ մտավորականությունը բանտարկվեց և ոչնչացվեց: Չարենցին ևս անհիմն պատճառաբանություններով կալանեցին: Մեկ տարի անց Չարենցը մահացավ»,-նշեց բանախոսը:

Վերջինս հավելեց, որ Չարենցը բազմաթիվ գործեր է թողել, որոնք պետք է հրապարակել: Դրանցից շատերը մասնավոր անձանց մոտ են գտնվում, ուստի գրականագետը կոչ է անում այդ մարդկանց վաճառել կամ հրապարակել իրենց ձեռքի տակ եղած գործերը:

Վարդուհի Ստեփանյան