«Մանկական եվրատեսիլ 2014»-ի մեր մասնակիցը վերադարձավ Հայաստան. բացառիկ հարցազրույց օդանավակայանից (լուսանկարներ)
Նոյեմբերի 15-ին Մալթայում կայացավ «Մանկական եվրատեսիլ 2014»-ը, որտեղ «People of the sun» երգով Հայաստանը պատվով ներկայացրեց հրաշամանուկ երգչուհի, հաղորդավարուհի Բեթթին՝ Էլիզաբեթ Դանիելյանը: Ժամեր առաջ, փոքրիկ արևը վերադարձավ Հայաստան, ում դիմավորելու էին շտապել, մոտ 100 մարդ:
Մինչ Բեթթին վայրէջք էր կատարում, Operativ.am-ի թղթակիցը զրուցել է հավաքվածների հետ և տեղեկացել նրանց տպավորությունների մասին:Օրվա հերոսին կարոտած հայրը 2 ժամ շուտ էր ժամանել օդանավակայան՝ կարծես հուսալով աղջկա շուտափույթ վերադարձը:
«Պայծառ ելույթ ունեցավ Բեթթին, շատ եմ հուզվել աղջկաս ելույթի ժամանակ և հիմա էլ՝ դիմավորելիս, հուզվում եմ: Անկախ զբաղեցրած հորիզոնականից, Բեթթին բոլորիս հպարտանալու առիթ տվեց»,-ասաց հայրը՝ Հակոբ Դանիելյանը:
Բեթթիի փոքրիկ գործընկերոջ՝ Դավիթ Վարդանյանի խոսքով, գեղեցկուհի, բարի ու տաղանդավոր իր ընկերն արժանի էր հաղթանակի, քանի որ անթերի է կատարել իր առջև դրված առաջադրանքները:
«Ամեն անգամ աշխատելիս, ես զարմանում և հիանում եմ նրանով: Հրաշամանուկ բառը ստեղծված է Բեթթիի համար»,-ասաց «Տանը մենակ» հեռուստահաղորդման (հաղորդումը վարում է Բեթթին) ռեժիսոր Անահիտ Հովհաննիսյանը:
Բեթթիին դիմավորելու էին եկել նրա փոքրիկ և ավագ գործընկերները, ընկերերը, հարազատները, Հայաստանի եվրատեսիլի պատվիրակության ներկայացուցիչները, անգամ՝ անծանոթներ:
«Ամենաարևային, գեղեցիկ աղջնակն էր եվրատեսիլի մասակիցների մեջ: Բեթթին, իսկապես մանկակա՛ն եվրատեսիլի մասնակից էր, շատ-շատ գոհ եմ իրենից: Նա իր առջև դրված առաջադրանքները մաքսիմալ կատարեց, պարզապես փայլեց»,-ասաց Հայաստանի եվրատեսիլի պատվիրակության ղեկավարի օգնական Անուշիկ Տեր- Ղուկասյանը»:
«Թեև Բեթթին, ինչպես նաև ողջ պատվիրակությունը վատառողջ էին, պայմաները այնքան էլ լավ չի եղել, սակայն դա մեզ չխանգարեց վայելել հաղթանակը,- ավելացրեց եվրատեսիլի աշխատանքային թիմի անդամ Դավիթ Ծերունյանը:
Բեթթիին դիմավորելու էր շտապել նաև հաղորդավար Էրիկ Անթառանյանը, ով կիսվեց իր տպավորություներով.«Սրտի տրոփյունով սպասում էի Հայաստանի պատվիրակի ելույթին՝ անկախ նրանից, թե ով էր մասնակիցը: Շատ-շատ եմ հավանել երգը, անկախ նրանից, թե որ երկրի երգն էր ավելի լավը, կարծում եմ պրոֆեսիոնալության տեսանկյունից Բեթթին պետք է հաղթեր: Այդ փոքրիկ մարմնի մեջ, նա այնքան մեծ ջերմություն ու զորություն ցույց տվեց ողջ Եվրոպային, որ շատերը չկարողացան անել դա այլ մրցաշարերում: Շնորհակալություն եմ հայտնում ամբողջ թիմին, և նրա ծնողներին, որ այս հրաշամանուկին նվիրել են մեզ»:
Հրաշամանուկին դռների հետևում տեսնելով՝ հավաքվածները ծաղկեփնջերն ու նվերները ձեռքներին այնպես առաջ վազեցին, որ օդանավակայանի անվտագության աշխատակիցն անգամ չկարողացավ հետ պահել նրանց, որպեսզի չանցնեն թույլատրելի սահմանը:
«Տպավորությունները շատ մեծ են, մենք հանգիստ կարող էինք երկրորդ տեղում լինել, անգամ՝ առաջին: Միակ բացասական բանը այն էր, որ ետնաբեմում շատ ցուրտ էր, երեխան մրսել էր, և ելույթից առաջ հազալով բեմ բարձրացավ: Բոլորս լարված էինք, բայց հիանալի ելույթ ունեցավ, շա՛տ ապրի նա»,-ասաց վոկալիստ Ռուզաննա Ջամբազյանը:
Չնայած հավաքվածները շրջափակել էին «Արևի մարդուկին», այնուամենայնիվ, Operativ.am-ի թղթակիցը հասցրել է խոսել նաև Բեթթի հետ:
«Շատ լավ տպավորություններ ունեմ, հասցրել եմ ընկերանալ բոլոր մասնակիցների հետ և շատ լավ ժամանակ եմ անցկացրել: Կարծում եմ միասին դեռ շատ ճանապարհորդություններ ենք ունենալու: Միակ բանը, որ ինձ տխրեցնում էր, այն էր, որ հայրիկիս շատ էի կարոտել»,-ասաց Բեթթին:
Փոքրիկ երգչուհին ասաց նաև, որ ինքը ևս ցանկանում էր, որ մրցանակային տեղերը զբաղեցներ Իտալիան և Բուլղարիան:
Հայաստան վերադարձած եվրատեսիլի մեր պատվիրակությունից տեղեկացանք, որ Մալթայում պայմաններն այնքան էլ բարվոք չեն եղել, որի պատճառով Բեթթին և մեր պատվիրակության գրեթե բոլոր անդամները հիվանդացել են: Հիշեցնենք, որ Բեթթին բեմ է բարձրացել 39 աստիճան ջերմությունով, ինչը հայերս արևին հատուկ հատկություն համարեցինք, սակայն դա չխանգարեց նրան փայլուն ելույթ ունենալ և իհարկե զբաղեցնել 3-րդ հորիզոնականը, որը մրցանակային է համարվում:
«Ճանաչելով Բեթթիին՝ կասեմ հետևյալը. գիտեի, որ հրաշամանուկ է, շնորհալի, խելացի, ինտելեկտով: Նա այդ ամենի կատարյալ միքսն է, որին ականատեսը եղանք բոլորս: Շնորհակալ եմ արև փոքրիկին, որ աշխարհի բարձր բեմերից մեկում Հայաստանի դրոշը ծածանեց արժանվույն: Վստահ եմ՝ դեռ շատ նվաճումներ է ունենալու Բեթթին»,-ասաց «ՎԵՀ» բարեգործական հիմնադրամի տնօրեն Մայ Անուշավանյանը:
Հատուկ ուշադրության արժանացնենք նաև այն, որ Էլիզաբեթ Դանիելյանը Հայաստանը պատվով ներկայացրեց ոչ միայն երգով, այլև իր տված երկլեզու հարցազրույցներով, որը տպավորել էր Եվրոպային:
Operativ.am-ը շնորհավորում է Բեթթին հաղթանակի կապակցությամբ, և մաղթում նորանոր հաջողություններ:
Կարինե Գևորգյան