ԱՄՆ կոնգրեսի առաջնորդները համաձայնության են հասել` շաթդաունից խուսափելու համար

ԱՄՆ ներկայացուցիչների պալատի և Սենատի ղեկավարները երկկուսակցական համաձայնության են հասել՝ խուսափելու կառավարության աշխատանքի մասնակի դադարեցումից (շաթդաուն), որն այլապես տեղի կունենար մարտի 1-ին։ Այս մասին հաղորդում է Reuters գործակալությունը։

Ըստ ձեռք բերված համաձայնության՝ Ներկայացուցիչների պալատը փետրվարի 29-ին կքվեարկի ժամանակավոր ֆինանսավորման օրինագծի օգտին, այնուհետև քվեարկություն կկայանա Սենատում։

Եթե օրինագիծը հաստատվի, ապա մարտի 1-ին հնարավոր կլինի խուսափել մասնակի շաթդաունից մինչև նոր սահմանված վերջնաժամկետները մարտի 8-ին և մարտի 22-ին։ Սա օրենսդիրներին ժամանակ կտա ուսումնասիրելու և քննարկելու ամբողջ տարվա ֆինանսավորման վերաբերյալ օրինագծերը։

Կոնգրեսում Հանրապետական և Դեմոկրատական կուսակցությունների առաջնորդներն այժմ կաշխատեն ձեռք բերված պայմանավորվածությունը մյուս կոնգրեսականների հետ քննարկելու և նրանց աջակցությունը ստանալու ուղղությամբ։

Այս պայմանավորվածության համաձայն՝ մինչև մարտի 8-ը պետք է հաստատվեն 2024 ֆինանսական տարվա ֆինանսավորման 12 օրինագծերից 6-ը, իսկ մնացածը մինչև մարտի 22-ը: