Նոր ցնցումներին սպասելիս
«Ժողովուրդ» թերթը գրում է. «Մինչ մեր իշխանությունները զբաղված են Հայաստանի առջև ԵՏՄ-ին անդամակցելու արդյունքում բացվելիք զարգացման հեռանկարների մասին վարդագույն հեքիաթներ պատմելով, միջազգային պատժամիջոցների տակ հետզհետե կքող Ռուսաստանի տնտեսությունն արագ տեմպերով անկում է ապրում: Ռուբլու՝ արդեն 28 տոկոսից ավել արժեզրկումն իր հետևից բերելու է բազմաթիվ ցնցումներ, որոնք ուղղակիորեն անդրադառնալու են Հայաստանի տնտեսության վրա:
Ընդ որում, մի կողմ թողնելով Հայաստանում առկա հսկայական ռուսական կապիտալի, հազարից ավել ռուսական ձեռնարկությունների գործունեության և հայ-ռուսական հետագա տնտեսական ծրագրերի վրա ռուբլու անկման հետևանքների կանխատեսումները՝ նշենք, որ շատ ավելի արագ և ցավոտ է լինելու Ռուսաստանից Հայաստան ուղարկվող մասնավոր տրանսֆերտների կրճատումը:
Հիշեցնենք, որ Հայաստանի ՀՆԱ-ի շուրջ 10 տոկոսը գոյանում է հենց Ռուսաստան «խոպան գնացած» մեր հայրենակիցների ուղարկած փողերի շնորհիվ, և հիմա` ռուբլու 28 տոկոսանոց անկման դեպքում, ըստ տարբեր մասնագիտական գնահատականների, մեր երկիր մտնող դրամային փոխանցումները կնվազեն գրեթե նույնքան, լավագույն դեպքում` 20 տոկոսով, ինչը կազմում է ավելի քան կես միլիարդ դոլար:
Թե ինչպիսի հարված կլինի մեր տնտեսության համար այդ չափով դրամական հոսքի դադարեցումը, կարծում ենք` դժվար չէ պատկերացնել: Առավել ևս, որ դրանից շեշտակիորեն ընկնելու է ՀՀ այն քաղաքացիների կենսամակարդակը, ովքեր այդ փոխանցումներից զատ եկամտի այլ աղբյուր չունեն: Իսկ դա, ինչպես հայտնի է, կազմում է Հայաստանի քաղաքացիների զգալի մասը: Այնպես որ, տնտեսական անկումն ու մարդկանց կենսամակարդակի շեշտակի վատթարացումն անխուսափելի են, համենայն դեպս՝ առաջիկա մի քանի ամիսների կտրվածքով»:
Առավել մանրամասն՝ «Ժողովուրդ» թերթի այսօրվա համարում: