Մենք՝ ի դեմս Թուրքիայի, ռուսական շուկայում մեծ մրցակից ունենք. Արթուր Աթոյան

Այսօր լրագրողների հետ հանդիպման ժամանակ «Հայ ձկնարտադրողների և ձկնարդյունաբերողների միասնություն» ՀԿ նախագահ Արթուր Աթոյանը անդրադարձավ երեկ ՀՀ վարչապետի հետ տեղի ունեցած հանդիպմանը: Բանախոսը նշեց, որ հանդիպման ժամանակ մի շարք կարևոր հարցեր են քննարկվել, որոնցից նա շեշտեց հատկապես հետևյալները:

«Մենք առաջարկել ենք, որպեսզի կառավարությունն ուսումնասիրի և արդյունավետ լուծումներ կիրառի նախ արտահանման ընթացքում առաջացած խոչընդոտները վերացնելու ուղղությամբ: Այստեղ մեզ համար առաջնայինը բարձր ինքնարժեքով հայկական ձկնամթերքը Ռուսաստանի շուկա արտահանելն է, քանի որ մենք՝ ի դեմս Թուրքիայի, ռուսական շուկայում ունենք մեծ մրցակից: Ներկայումս եվրոպական ձկնամթերքի արտադրությունը ռուսական շուկա դադարեցվել է քաղաքական դրդապատճառների հետևանքով, բայց դեռ պարզ չէ, թե որքան ժամանակ դա կտևի: Սա ևս մեծ խոչընդոտներ կարող է առաջացնել Հայաստանի համար, ուստի պետք է մշակել համապատասխան ռազմավարություն տնտեսապես մեր արտահանողներին պաշտպանելու համար»,-նշեց բանախոսը:

ՀԿ-ն ՀՀ կառավարությանն առաջարկել է միավորել փոքր տնտեսությունները մեկ տնտեսության մեջ, որը կհեշտացնի փոքր տնտեսությունների արտահանման իրավունքի ձեռքբերումը: 

Բանախոսը տեղեկացրեց, որ առաջիկայում ՀԿ-ն Գյուղատնտեսության և Բնապահպանության նախարարությունների հետ մշակելու է ծրագրեր այս ուղղությամբ և հավելեց, որ ցանկացողները ևս կարևող են  ոլորտի բարելավմանն ուղղված իրենց առաջարկություններն անել:

Վարդուհի Ստեփանյան