Նախկին ռեկտորն իր տան պայթյունի մասին
«Ժողովուրդ» թերթը գրում է. «Երևանի Հերացու անվան պետական բժշկական համալսարանի նախկին ռեկտոր Վիլեն Հակոբյանն իր դեմ իրականացված մահափորձը դեռևս թյուրիմացություն է համարում: Այս մասին «Ժողովուրդ»-ի հետ զրույցում ասաց Վիլեն Հակոբյանը՝ նշելով, որ թշնամիներ չունի, բոլորը բարեկամներ են:
Ըստ ոստիկանության պաշտոնական հաղորդագրության՝ հոկտեմբերի 21-ին՝ ժամը 22.30-ին, ոստիկանության Արաբկիրի բաժնում հաղորդում է ստացվել, որ Երևանի Օրբելի Եղբայրների փողոցի 33 շենքի բնակիչներից մեկը հայտնել է, որ շենքի թիվ 28 բնակարանի պատշգամբի դռան բռնակից կոշիկ է կախված, որի մեջ նռնականման առարկա է նկատել: Ավելի ուշ պարզվել է, որ նշված չօգտագործվող բնակարանի մուտքի դռան բռնակից կախված սպորտային կոշիկի միջից հայտնաբերվել են «Ֆ-1» տիպի նռնակ և պայթուցիչ, որոնք վնասազերծվել են: Իսկ, ահա, չօգտագործվող բնակարանը պատկանում է Երևանի Հերացու անվան պետական բժշկական համալսարանի նախկին ռեկտոր Վիլեն Հակոբյանին:
Եվ այսպես՝ ով և ինչու էր ցանկանում պայթեցնել Վիլեն Հակոբյանի բնակարանը կամ արդյո՞ք ցանկանում էր պայթեցնել: Այս հարցերի շուրջ «Ժողովուրդ»-ը զրուցեց բժշկական համալսարանի նախկին ռեկտոր Վիլեն Հակոբյանի հետ:
-Պարո՛ն Հակոբյան, ի՞նչ է կատարվում Ձեր շուրջ, ինչի՞ հետևանք է պայթյունի փորձը:
-Սա ոչնչի հետ կապված չէ, իմ դիմացի բնակարանի վրա է այդ սարքը եղել ու վերագրել են ինձ: Այնտեղ, որտեղ ես եմ ապրում, մուտք ու ելք ունեմ, այդ բնակարանի վրա չի եղել:
-Ոստիկանության պաշտոնական հաղորդագրության մեջ նշված է, որ Երևանի Օրբելի Եղբայրների փողոցի 33 շենքի 28 բնակարանի պատշգամբի դռան բռնակից կոշիկ է կախված, որի մեջ նռնականման առարկա է նկատվել: Ըստ տեղեկությունների՝ այդ չօգտագործվող բնակարանը Ձեզ է պատկանում:
-Չգիտեմ: Այն ինձ հետ չեմ կապում, ծայրահեղ դեպքում՝ թյուրիմացություն կարող է լինել:
-Իսկ եթե պարզվի հակառակը, որ Ձեր թշնամիներն են Ձեր մահը կամ հարազատների մահը ցանկանում:
-Թշնամիներ չունեմ, չեմ էլ ունեցել, միայն բարեկամներ ունեմ: Ես դեռ ենթադրում եմ, որ դա կարող է երեխաների խաղալիք լինել, դեռ վստահ չեմ, որ դա կարող է մարտական պայթուցիկ սարք լինել:
-Ոստիկանության պաշտոնական հաղորդագրության մեջ նշված է, որ այն խաղալիք չէ, այլ «Ֆ-1» տիպի նռնակ:
-Չգիտեմ: Կրկնում եմ՝ չեմ կապում իմ հետ, քանի որ, առավել ևս հիմա, ոչ մի ֆինանսական հարցեր չունեմ որևէ մեկի հետ, ոչ էլ աշխատանքային հարցեր կան:
-Իսկ նախկինում ունեցե՞լ եք:
-Դե, հիմա…:
Առավել մանրամասն՝ «Ժողովուրդ» թերթի այսօրվա համարում: