Արամ Մանուկյանի տեղատարափ հարցերի շարքը Ռուբեն Ջաղինյանին

ԱԺ հոկտեմբերի 1-ի նիստին շարունակվում է քննարկվել «Հեռուստատեսության և ռադիոյի մասին» Հայաստանի Հանրապետության օրենքում փոփոխություն և լրացում կատարելու մասին» օրինագիծը:

Քննարկումը շարունակվեց հիմնական զեկուցող, Հանրային հեռուստաընկերության խորհրդի նախագահ Ռուբեն Ջաղինյանին հարցեր տալու փուլում:

Ռուբեն Ջաղինյանին հարց հնչեցրեց ՀԱԿ խմբակցության անդամ, ԱԺ պատգամավոր Արամ Մանուկյանը: Նա, մինչ հարցերը տալը, Ռուբեն Ջաղինյանին զգուշացրեց, որ բոլոր հարցերն իր մոտ նշի:

«Կցանկանայի իմանալ, վարկերի քանակը գումարային և քանի վարկ է, որ վերցրել եք: Ինչո՞ւ եկամուտների աղյուսակում նշված չէ, որ վարկերը փակվել է կառավարության պահուստային ֆոնդից: Արդյո՞ք կառավարությունը փակել է միայն վարկի տոկոսը, թե՞ վարկը: Իսկ հաջորդ հարցը վերաբերում է ծախսերին: Ինչո՞ւ ծախսերում հոդվածների մի մասը չկա: Ի՞նչն է պատճառը: Եվ վերջապես, ինչո՞ւ եք վարկի դիմում, եթե ֆինանսական ելքերը և մուտքերը կայուն են»,-հարցրեց Արամ Մանուկյանը: 

«Հարցերի կապակցությամբ հստակ պատասխաններ ստանալու համար ավելի լավ կլիներ, որպեսզի գրավոր դիմում ներկայացնեիք, որի շրջանակներում գրավոր կպատասխանենք ձեր բոլոր հարցերին, քանի որ տրված պատասխանն ավելի հստակ կլինի այն դեպքում, երբ մասնագիտական ֆինանասական բլոկը ևս մասնակցի, որովհետև հնարավոր են վրիպակներ լինեն թվերի մեջ: Սակայն, մինչ գրավոր պատասխանին, նշեմ, որ կան որոշակի կառույցներ, որոնք ոչ թե վթարային վիճակում են, այլ ամբողջովին ավիրված են և ունեն անհապաղ վերանորոգման կարիք»,-ասաց Ռուբեն Ջաղինյանը: