Ալիևն ու Դավութօղլուն քննարկել են ղարաբաղյան հարցը

Թուրքիան միշտ կլինի Ադրբեջանի կողքին: Այս մասին սեպտեմբերի 19-ին թուրքական լրատվամիջոցների հետ տեղի ունեցած ճեպազրույցի ժամանակ ասել է Թուրքիայի վարչապետ Ահմեդ Դավութօղլուն: Այս նույն կարծիքն է հայտնել նաև Ադրբեջանի նախագահ Իլհամ Ալիևը: 

«Շնորհիվ ՀՀ-ի «ոչ կառուցողական» դիրքորոշման` Լեռնային Ղարաբաղի հարցը լուծում չի ստանում»,- այս մասին հայտարարել է Թուրքիայի վարչապետ Դավութօղլուն, Բաքվում Իլհամ Ալիև հետ տեղի ունեցած հանդիպման ժամանակ: 

Ըստ նրա` այսօր Դավութօղլուն կծանոթանա գործի ամբողջ ընթացքին և քայլեր կձեռնարկի, որպեսզի ղարաբաղյան հարցը շուտափույթ լուծում ստանա: Ադրբեջանի նախագահը նշել է, որ այս հակամարտության հարցը գալիս է դեռևս Խորհրդային տարիներից, որի լուծումը իր վրա է վերցրել ՄԱԿ-ի Անվտանգության խորհուրդը՝ իր մի շարք բանաձևերով: 

«Անվտանգության խորհուրդը ամենաազդեցիկ միջազգային կազմակերպությունն է աշխարհում: Այս կառույցը հարցի կապակցությամբ ընդունել է արդեն 4 բանաձև: Սակայն հայկական կողմը «անտեսում» է բանաձևով հաստատված կետերը, որի արդյունքում ադրբեջանական հողերի 20 տոկոսը «օկուպացված» է: Այդ օկուպացման պայմաններում ադրբեջանցի հազարավոր փախստականներ ստիպված են եղել հարկադիր վերաբնակեցում իրականացնել»,-ասել է Ալիևը:

Հ.Գ. Փոստորեն, Ադրբեջանն այսպես կարողանում է խոսել միայն Թուրքիայի պաշտոնական ներկայացուցիչների կողքին, սակայն երբ հերթը հասնում է միջազգային ֆորմատով հանդիպումներին, հիշում է տխուր անցյալը և ցավոտ ու խղճուկ ներկան ու խոնարհ հարսի պես լռում է միջազգային հարթակում: