Վարչապետին չէր խանգարի շփման էթիկայի մասին որևէ ձեռնարկ թերթել
«Հրապարակ» թերթը գրում է. «Հովիկ Աբրահամյանի՝ կառավարություն տեղափոխվելուց հետո այստեղ այնպիսի փոխհարաբերություններ են հաստատվել, որ լրիվ համապատասխանում են կառավարությանը հարակից «Ֆիրդուսնոցի» բարքերին: Վարչապետը ենթակաների հետ խոսում է «դու»-ով, հրամայական տոնով, իսկ փոխնախարարներին ընդհանրապես համարում է 3-րդ սորտի մարդիկ: Տպավորությունն այնպիսի է, որ Աբրահամյանը կարծում է, թե ուժի, հզորության, խիստ ղեկավարի իմիջը տարրական կուլտուրայի բացակայությամբ է ձևավորվում:
Երեկ, կառավարության նիստի ժամանակ, երբ տրանսպորտի և կապի նախարարի տեղակալը ներկայացնում էր «Ավտոմոբիլային ճանապարհների մասին» և այլ օրենքներում փոփոխություններ և լրացումներ կատարելու նախագծերը, նշեց, որ մտադիր են 1 տոննա բեռի տեղափոխման համար սահմանել 10 հազար դրամ պետտուրք: Աբրահամյանը հետաքրքրվեց սահմանելու հիմքերով, մինչ Արթուր Առաքելյանը կավարտեր միտքը՝ ասելով, թե իր կարծիքով 10 հազար դրամն այնքան էլ շատ չէ, վերջինը ընդհատեց նրան՝ «քո կարծիքը կարևոր չէ»:
Իհարկե, եթե ներկայացնողը Գագիկ Բեգլարյանը լիներ, նման արտահայտություն չէր հնչի: Անցած նիստին ևս Արթուր Առաքելյանն Աբրահամյանի թիրախում էր:
Կառավարության երեկվա նիստում քաղաքաշինության նախարարը ներկայացրեց, որ վերակառուցման կամ հիմնանորոգման ենթակա կրթական հաստատություններից 13-ի աշխատանքները հարկավոր է հետաձգել մինչև 2016-2017 թվականները, ՎՊ նախագահ Իշխան Զաքարյանն էլ հետաձգման ու դպրոցաշինության հետ կապված աղաղակող փաստեր հրապարակեց: Ըստ նրա, դպրոցաշինության ծրագրով 2006-2012թթ. նախատեսված է եղել 74 դպրոցի շինարարություն՝ 33 միլիարդ դրամ, բայց ծախսվել է 21 միլիարդը, և աշխատանքները մոտ էլ չեն ավարտին:
Եվ չնայած բավականաչափ գումար է տրամադրվել, 2013 թվականի դրությամբ ՎՊ-ն արձանագրել է, որ 74 դպրոցից որեւ մեկի շինարարությունն ավարտված չէ: «Օրինակ՝ Գավառի թիվ 5 դպրոցը պայմանագրով նախատեսված է 574 միլիարդ դրամ վերանորոգման համար, 2006 թվականին հատկացրել են 29,9 միլիոն դրամ, 2007-ին չեն հատկացրել, 2008-ին՝ 59 միլիոն, 2009-ին՝ 30, 2010-ին՝ 20, 2011-ին՝ 33, 2012-ին՝ 19, 2013-ին՝ 13:
Արդյունքում հատկացրել են 270 միլիոն դրամ, դեռևս 304 միլիոն պիտի հատկացնեն, որ ավարտեն շինարարությունը, և, ցավոք սրտի, բոլոր դպրոցների ու ծրագրի համար նույն ձեռագիրն է»,-ներկայացրեց ՎՊ նախագահ Իշխան Զաքարյանը՝ ընդգծելով, որ պատշաճ ուշադրություն չի դարձվել նաև սեյսմակայունությանը, և շատ տեղերում շենքերն արդեն քանդվել են՝ փոշիացնելով ծախսված գումարները: «Խնդիրը լուրջ է, ես մտահոգվեցի: Ես չեմ հասկանում՝ ո՞նց կարելի է դպրոցում շինարարություն սկսել՝ առանց սեյսմիկ անվտանգության խնդիրներն ուսումնասիրելու»,- մտահոգված ասաց Հովիկ Աբրահամյանը, սակայն այդպես էլ չհնչեց միակ տրամաբանական հարցադրումը՝ իսկ ո՞վ պիտի պատասխան տա այդ ամենի համար»:
Առավել մանրամասն՝ «Հրապարակ» թերթի այսօրվա համարում: