Նախասեպտեմբերյան գնումներ` նոր ուսումնական տարվա համար. Ի՞նչ գնային սահմաններում կարելի է գնումներ կատարել այս տարի

Սեպտեմբերի մեկն արդեն մոտենում է: Այս օրերին բոլորը զբաղված են նախասեպտեմբերյան գնումներով: Աշակերտների համար նոր ուսումնական տարվա համար արվող գնումները զվարճանքի են վերածվում, իսկ ծնողների համար ՝ գլխացավանքի:

Գրենական պիտույքների գները պարզելու նպատակով Operativ.am-ի թղթակիցը շրջեց գրենական պիտույքների վաճառակետերով, ինչպես նաև զրուցեց նախասեպտեմբերյան առևտրի մեջ գտնվող ծնողների հետ:Պետք է նշել, որ շուկան բազմազան է: Այստեղ կարելի է գտնել ցանկացած գնի և որակի ապրանք:

Տետրերի ու գրենական պիտույքների գները, կախված արտադրող ֆիրմայից, տարբեր է: Այս տարի ամենաթանկ տետրերը «Scarlet» ֆիրմայի տետրերն են: Եթե 12 թերթանոց սովորական տետրերը կարելի է գնել 30-45 դրամ, ապա «Scarlet» ֆիրմայի արտադրության 12 թերթանի տետրերն արժեն 60-70 դրամ: Նույն ֆիրմայի 96 թերթանի լայն տետրերն արժեն 195-400 դրամ, նեղերը՝ 140-220, իսկ 40 թերթանի նեղ տետրերն արժեն 90 դրամ: Սրանք մեծամասամբ ֆիքսված գներ են, մինչդեռ կան խանություներ, որտեղ տետրերի մեջ 15-20 դրամի տարբերություն է զգացվում: Օրագրերի գները ևս տարբեր են: Շուկայում կարելի է գտնել 250-2300 դրամանոց օրագրեր:

Գրիչները կարելի է գնել 30 դրամից սկսած: Այս տարի շատ են տարածված անվանական գրիչները, որոնք վաճառվում են 450 դրամով: Քանոնների հավաքածուն գրեթե բոլոր վաճառակետերում կարելի է գնել 350 դրամով, մինչդեռ որոշ խանութներում քանոնի միևնույն հավաքածուն վաճառվում է 500 դրամով:

Ինչ վերաբերում է դպրոցական պայուսակներին, ապա վաճառակետերում առկա են 2500 դրամից սկսվող պայուսակներ:

Գնորդները բողոքում են տարեցտարի աճող թանկացումներից, որոնք առկա են թե′ գրենական պիտույքների, թե′ հագուստի շրջանում:

«Հագուստ, կոշիկ ամեն ինչ թանկացել է: Հասարակ սպիտակ վերնաշապիկը 15 հազար դրամ արժե, իսկ օրագիրը՝ 600-1200 դրամ: Մենք այս տարի միայն առաջին օրերի համար անհրաժեշտ բաներն ենք գնել, մնացածն ընթացքում կգնենք, բայց իմ հաշվարկով նախորդ տարուց մոտ 15 հազար դրամ ավել ենք ծախսել»,-Operativ.am-ի թղթակցի հետ զրույցում նշեց տիկին Սինարան:

Կան գնորդներ, ովքեր գնումների մի մասը նախընտրում են հանգստավայրերից բերել, քանի որ այնտեղ գներն ավելի հարմար են: Տիկին Աննան նշեց, որ տղաների համար այս տարի պայուսակներ գնել է Վրաստանից 6000 դրամով, մինչդեռ այստեղ նույն պայուսակները վաճառվում են 10000 դրամ:

«Այս տարի դեռ հագուստ չեմ գնել, տաբատներ երևի չգնեմ: Իսկ տետրեր նախորդ տարի կապոցով էի գնել ու դեռ մնացել են: Այս տարի մի քանի հատ եմ գնել՝ միայն սկզբի համար: Ինչ վերաբերում է գներին, ապա չեմ կարծում, որ գները նախորդ տարվա համեմատությամբ թանկացել են»,-նշեց զրուցակիցս:

Հ.Գ.Ինչպես տեսնում ենք թանկացումն, ինչպես ամեն տարի, այս տարի ևս նորություն չէ, մինչդեռ շուկան իր հերթին բազմազան է, ինչը թույլ է տալիս գնել ցանկացած գրենական պիտույք տարբեր գներով: Ամեն դեպքում, տանելով համեմատականներ նախորդ տարիների հետ, ծնողները մեծամասամբ նկատում են, որ տարեցտարի նոր ուսումնական տարին ավելի թանկ է նստում:

Վարդուհի Ստեփանյան