Նոր երկաթուղին կառուցվելու է Չինաստանի վարկով
«Հրապարակ» թերթը գրում է. «Հարավային երկաթուղին, որի մասին վերջերս կառավարության նիստում հայտարարեց տրանսպորտի և կապի նախարար Գագիկ Բեգլարյանը, միացնելու է Գեղարքունիքի մարզի Գագարին կայարանը Սյունիքի մարզի Ագարակ բնակավայրի հետ և նոր ելք է ապահովելու դեպի Իրան: Այն ակնկալվում է կառուցել Չինաստանի տրամադրած վարկի միջոցներով: Այս մասին տեղեկացանք տրանսպորտի նախարարությունից:
Ներդրումներն ամբողջությամբ կիրականացնի Արաբական Միացյալ Էմիրություններում հիմնադրված «Ռոսիա ՖԶԷ» ընկերությունը, որի հետ ՀՀ կառավարությունը 2012 թվականի հուլիսի 28-ին ստորագրել է Հայաստանի հարավային երկաթուղու կառուցման կոնցեսիոն պայմանագիր: Նախագծի համար պահանջվող ներդրումը, նախնական գնահատականներով, կազմելու է մոտ 3.2 մլրդ ԱՄՆ դոլար, որի ինքնածախսածածկումը կտևի մոտ 24 տարի:
Ըստ տրանսպորտի և կապի նախարարությունից ստացված տեղեկությունների, Չինաստանի արտահանման-ներմուծման բանկը կոնցեսիոներին վարկ կտրամադրի նախագծի արժեքի 60 տոկոսի չափով, իսկ ֆինանսավորման մնացյալ 40 տոկոսի համար «Ռոսիա ՖԶԷ»-ն նախատեսում է ներգրավել այլ միջոցներ: 2013 թվականին «Ռոսիա ՖԶԷ»-ի կողմից ներկայացվել է «Հայաստանի հարավային երկաթուղու» կառուցման տեխնիկատնտեսական հիմնավորումը: Նախնական ծրագիրը 2014 թվականի օգոստոսի 7-ին արժանացել է ՀՀ կառավարության հավանությանը:
Այժմ կոնցեսիոները պետք է ձեռնամուխ լինի նախագծի պատվիրմանը, որին կհաջորդի շինարարության մեկնարկը: Հիշեցնենք, որ երկաթգծի երկարությունը կկազմի 305 կիլոմետր: «Վարկային միջոցների դիմաց ՀՀ կառավարությունը պետական երաշխիքներ չի ստանձնելու, իսկ հավատարմագրային կառավարման հանձնելու հարցը կորոշվի հետագայում»,- ասված է տրանսպորտի և կապի նախարար Գագիկ Բեգլարյանի մեր թերթին ուղարկած գրավոր պատասխանում: Բեգլարյանն ընդգծել է, որ Իրան-Հայաստան երկաթուղու կառուցումը հնարավորություն կտա վերականգնել Հայաստանի դերը որպես տարանցիկ երկիր»:
Առավել մանրամասն՝ «Հրապարակ» թերթի այսօրվա համարում: