Վիզային ռեժիմը Վրաստանի ծանր իրավիճակի արդյունք է
«Ժողովուրդ» թերթը գրում է. «Վրաստանի նախկին նախագահ Միխեիլ Սաակաշվիլու խորհրդական Վան Բայբուրդը «Ժողովուրդ»-ի հետ զրույցում խոսելով Թբիլիսիի Սուրբ Էջմիածին եկեղեցու բակում տեղի ունեցած միջադեպի մասին, ասաց, որ եթե Վիրահայոց թեմի առաջնորդ Վազգեն եպիսկոպոս Միրզախանյանը դեպքի օրը լիներ Թբիլիսիում, նման բովանդակության, կրքերը բորբոքող հայտարարություն չէր արվի:
Հիշեցենենք, որ հուլիսի 19-ին վրացուհի մի կնոջ մեքենայի տեղաշարժման պատճառով մի խումբ վրացիներ հավաքվել էին շենքի բակում և ծեծի ենթարկել եկեղեցու առջև կանգնած Տեր Մանուկ քահանա Զեյնալյանին, թեմի Իրավական հարցերով և համագործակցության բաժնի տնօրեն Լևոն Իսախանյանին և տնտեսվար Ռոբերտ Իսախանյանին:
Ըստ Վան Բայբուրդի՝ հայկական եկեղեցու դեմ հարձակումը կրոնական հողի վրա տեղի չի ունեցել. «Այո, տեղի է ունեցել տհաճ միջադեպ, սակայն դա որակավորել որպես հարձակում եկեղեցու վրա, մեղմ ասած, չի համապատասխանում իրականությանը: Ցանկանում եմ հանգստացնել հայաստանյան հասարակայնությանը։ Ասեմ, նախ՝ միջադեպը տեղի է ունեցել ոչ թե եկեղեցու բակում, առավելևս եկեղեցում, այլ դրա հարակից տարածքում: Երկրորդ. տեղի ունեցածը ծագել է բացարձակապես կենցաղային հողի վրա:
Իսկ թե ինչպես զարգացավ կենցաղային հողի վրա տեղի ունեցած միջադեպը, դատեք ինքներդ: Մի խոսքով, Հովհաննես Թումանյանի «Մի կաթիլ մեղր»-ի պատմության թբիլիսյան տարբերակի խաղարկման փորձ էր, որը, բարեբախտաբար, ժամանակին կանխվեց: Ավելին՝ միջադեպի բոլոր մասնակիցները, անխտիր, եկեղեցու հարևանությամբ թաղամասի բնակիչներ էին, ընդ որում՝ նրանց թվում կային նաև հայեր: Ահա թե ինչու համոզված ենք, որ միջադեպը կրոնական բնույթ չի ունեել, զուտ կենցաղային էր»:
Երբ Բայբուրդին հիշեցրինք հայկական եկեղեցու ներկայացուցիչների պնդումն այն մասին, որ ազգային հողի վրա իրականացված հանցագործություն է, քանի որ Վրաստանի լրատվամիջոցներով հայ եկեղեցու և, ընդհանրապես, հայության հանդեպ ատելություն է սերմանվում, Վան Բայբուրդը պատասխանեց. «Իմ կարծիքով, եթե Վիրահայոց թեմի առաջնորդ Վազգեն եպիսկոպոս Միրզախանյանը դեպքի օրը լիներ Թբիլիսիում, նման բովանդակության, կրքերը բորբոքող հայտարարություն չէր արվի: Ըստ երևույթին, այն գրվել է ծայրահեղությունների հակված անձնավորության կողմից»:
Ըստ մեր զրուցակցի՝ ցավոք, երկու կողմերում էլ կան առանձին մարդիկ, ովքեր հրահրում են դիմակայություն. «Սակայն նշեմ, որ Վրաստանում վիրահայերի և Հայաստանի հանդեպ առկա է շատ բարյացակամ վերաբերմունք: Վիրահայերի իրավունքներն այստեղ խախտվում են այնպես, ինչպես կարող են խախտվել, օրինակ, հենց վրացիների, ադրբեջանցիների, ռուսների, եզդիների, օսերի կամ այլ ազգի ներկայացուցիչների իրավունքները:
Կրկնում եմ՝ ազգամիջյան հարաբերություններին առնչվող ամեն հայտարարություն անելուց առաջ պետք է լինել չափավոր զգույշ, նախօրոք տեղեկանալ երկու կողմերի փաստարկներին: Միանգամից ասեմ, որ մենք՝ հայերս, ու վրացիները չարակամներին թույլ չենք տա սեպ խրել վրաց-հայկական հարաբերություններում: Թող անգամ չերազեն այդ մասին, միևնույն է՝ դա ոչ մեկին չի հաջողվի»:
Շարունակելով մեր հարևան երկրի հետ առկա փոխհարաբերությունների թեման, Վան Բայբուրդից հետաքրքրվեցինք, թե ինչո՞ւ է Վրաստանը որոշել այս տարվա սեպտեմբերից վիզային ռեժիմ սահմանել երկիր մուտք գործողների համար և ինչո՞ւ է այդ կարգը գործում նաև հենց Հայաստանի համար. հնարավո՞ր չէր այս հարևանին շրջանցել:
«Իրականում, Վրաստանի կառավարության՝ վերջերս ընդունած «Օտարերկրյա քաղաքացիների և քաղաքացիություն չունեցող անձանց իրավական կարգավիճակի մասին» օրենքի նպատակն է կարգավորել ինտեգրացիոն հարաբերություններն այլ պետությունների հետ։ Այդ երկրների թվում է նաև Հայաստանը և առանց վիզային ռեժիմի Հայաստանի քաղաքացիները կարող են գտնվել Վրաստանում 180 օրվա ընթացքում 90 օր»:
Առավել մանրամասն՝ «Ժողովուրդ» թերթի այսօրվա համարում: