Առայժմ ամենակարևոր նպատակն Աշխարհի չեմպիոն դառնալն է. Իտալիայում 1-ին տեղ զբաղեցրած ազատ ոճի ըմբշամարտիկ Վոլոդիա Ֆրանգուլյանն իր հաղթանակի և ապագա պլանների մասին

Մայիսի 31-ի Իտալիայի Սասարի քաղաքում տեղի է ունեցել ըմբշամարտի խոշոր մրցաշար, որին 61 կգ քաշային կարգում մասնակցել է նաև հայ մարզիկ Վոլոդիա Ֆրանգուլյանը: 22-ամյա մարզիկը գոտեմարտել է 1 անգլիացի /12-2/ և 3 կանադացի մարզիկների /10-3 հաշվով/ հետ, որից հետո ազատ ոճի ըմբշամարտիկը տոնել է իր հաղթանակը՝ զբաղեցնելով առաջին տեղը: Վերջինս 2000թ.-ից զբաղվում է ըմբշամարտով: Մինչև 2009թ. նրա մարզիչը Անդրանիկ Հարոյանն էր, իսկ նրա մահից հետո, մարզիկը անձնական մարզիչ է ընտրել Ցոլակ Հարոյանին, ով Անդրանիկ Հարոյանի որդին է: Ֆեդերացիայի մարզիչը Արայիկ Բաղդադյանն է:

Operativ.am-ի թղթակիցը զրուցել է մարզիկի հետ հաղթանակի և ապագա պլանների մասին: Թղթակցի այն հարցին, թե ինչն է կարևոր մարզիկի համար. երկիրը ներկայացնե՞լ, թե՞ հանդես գալ սեփական անվան համար, մարզիկը պատասխանել է. «Յուրաքանչյուր տեղ ներկայացնում ես առաջինը քո երկիրը, իսկ հաջողություններից հետո, բոլորը քեզ ճանաչում են հենց անունով»:

Հունիսի 8-ին ըմբշամարտիկը կմեկնի  Վլադիկովկաս, որտեղ կանցկացվի ուսումնամարզական հավաք, այնուհետև Ծաղկաձորում ևս ուսումնամարզական հավաք կլինի, իսկ Վանաձորում տեղի կունենա Ստեփան Սարգսյանի անվան մրցաշար:

Սակայն այս ամենից զատ, Վոլոդիան կարևորում է սեպտեմբերին Տաշքենդում կայանալիք Աշխարհի առաջնությունը, որին իր մասնակցությունը կհաստատվի Սարգսյանի մրցաշարից հետո:

-Ո՞րն է Ձեր գերագույն նպատակը:

-Կարծում եմ յուրաքանչյուր մարզիկի համար կարևորն Օլիմպիական խաղերին մասնակցելն է, սակայն նոր կանոնակարգի փոփոխություններից հետո, իմ քաշային կարգը չի համապտասխանում, և առայժմ ամենակարևոր նպատակն Աշխարհի չեմպիոն դառնալն է, որից հետո երբ քաշային կարգս կփոխվի՝ կպատրաստվեմ Օլիմպիական խաղերին:

22-ամյա Վոլոդիա Ֆրանգուլյանը, ով գտնվում է ծառայության մեջ, և թեև իր կյանքը չի պատկերացնում առանց սպորտի, սակայն մտադիր է ծառայությունն ավարտելուց հետո նոր մասնագիտություն ձեռք բերել:

Այն հարցին, թե ծառայությունը չի խանգարում լիարժեք մարզումներին, մարզիկը պատասխանեց.«Գոյություն ունի Բանակի կենտրոնական մարզական ակումբ, որտեղ  ես և՛ ծառայում եմ,  և՛  ներկայացնում ակումբը ծառայության ժամանակ: Հայաստանի Օլիմպիական կոմիտեն և ՊՆ-ն, թույլ են տալիս, որ մարզիկը գտնվի ֆեդերացիայի հսկողության տակ, այսինքն՝մասնակցի մարզումներին, մրցումներին, հավաքներին»:

-Բանակում ինչպե՞ս են ընդունում ընկերներն իրենց չեմպիոն ընկերոջը:

-Մեր զորամասում միայն ուժեղագույններն են ծառայում, բոլորն էլ չեմպիոններ են իրենց մարզաձևերում:Մեզ համար արդեն սովորական երևույթ է:

Հիշեցնենք, որ Իտալիայում կայացած ըմբշամարտի խոշոր մրցաշարում Հայաստանի ներկայացուցիչներից ազատ ոճայիններ Վոլոդյա Ֆրանգուլյանը (61 կգ) և Գրիգոր Գրիգորյանը (70 կգ) գրավել են առաջին տեղերը:

Operativ.am-ը նորանոր հաջողություն և բարի ծառայություն է մաղթում Վոլոդիա Ֆրանգուլյանին:

Կարինե Գևորգյան